AKP កំពង់ធំ ថ្ងៃទី១៥ ខែកក្កដា ឆ្នាំ ២០២៦--លោក អ៊ុន បុត្ត អភិបាលរងខេត្តកំពង់ធំ បានមានប្រសាសន៍ថា យុវជនជាកម្លាំងចលករដែលបានដើរតួរជាភ្នាក់ងារសុវត្ថិភាពព័ត៌មានយ៉ាងសកម្ម នៅតាមគ្រឹះស្ថានសិក្សា។ លោកអភិបាលរងខេត្តបានលើកឡើងដូច្នេះ ក្នុងឱកាសអញ្ជើញជាអធិបតីក្នុងពិធីយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីសុវត្ថិភាពព័ត៌មាន» នៅវិទ្យាល័យទ្រៀល ស្រុកតាំងគោក ខេត្តកំពង់ធំ កាលពីថ្ងៃទី១៤ ខែកក្កដា ឆ្នាំ២០២៦ ដោយមានការអញ្ជើញចូលរួមពីលោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ និងមន្ត្រីក្រោមឱវាទ លោក ម៉ម ទីន អភិបាលរងស្រុកតាំងគោក លោកនាយកវិទ្យាល័យ លោកគ្រូ អ្នកគ្រូ យុវជន សិស្សានុសិស្សសរុបប្រមាណ ២.៥០០នាក់។

លោក អ៊ុន បុត្ត បានបញ្ជាក់ថា យុវជនមិនត្រឹមតែរៀនសូត្រពីរបៀបផ្ទៀងផ្ទាត់ព័ត៌មានសម្រាប់ខ្លួនឯងប៉ុណ្ណោះទេ ថែមទាំងបាននាំយកចំណេះដឹងទាំងនេះទៅចែករំលែកបន្តដល់ក្រុមគ្រួសារ និងមិត្តភក្តិនៅក្នុងសហគមន៍របស់ខ្លួន។ ប្រសិនបើយុវជនមានចំណេះដឹងលើអក្ខរកម្មព័ត៌មាន អក្ខរកម្មប្រព័ន្ធផ្សព្វផ្សាយ និងអក្ខរកម្មឌីជីថល នោះយុវជននឹងក្លាយជាភ្នាក់ងារសំខាន់ក្នុងការផ្សព្វផ្សាយព័ត៌មានពិត ទប់ស្កាត់ព័ត៌មានក្លែងក្លាយ និងចូលរួមកសាងសង្គមឌីជីថល ប្រកបដោយសុវត្ថិភាព សីលធម៌ និងការទទួលខុសត្រូវ។

លោក អ៊ុន បុត្ត បានបញ្ជាក់ទៀតថា យុទ្ធនាការ «និយាយថាទេចំពោះព័ត៌មានក្លែងក្លាយ»ជំហានទី២ នេះ គឺលើកកម្ពស់អក្ខរកម្មព័ត៌មាន និងការផ្សព្វផ្សាយក្នុងចំណោមសិស្សានុសិស្ស ដើម្បីប្រយុទ្ធប្រឆាំងព័ត៌មានក្លែងក្លាយ លើកកម្ពស់ការយល់ដឹងអំពីសិទ្ធិ សុវត្ថិភាពឌីជីថល និងការប្រើប្រាស់ដោយការទទួលខុសត្រូវ ជំរុញការគិតបែបស៊ីជម្រៅ និងផ្លាស់ប្តូរឥរិយាបទរបស់យុវជននិងអនុវត្តតាមគោលការណ៍គិតមុននឹងចែករំលែក លើកកម្ពស់ការស្វែងយល់អំពីគ្រោះថ្នាក់នៃព័ត៌មានក្លែងក្លាយ និងពង្រឹងសមត្ថភាពយុវជនក្នុងការទប់ស្កាត់ និងជៀសផុតពីអន្ទាក់នៃឧបាយកលនយោបាយបោកប្រាស់ និងឧក្រិដ្ឋកម្មបច្ចេកវិទ្យាទំនើប ចូលរួមតម្រង់ទិសយុវវ័យឱ្យក្លាយជាភ្នាក់ងារសុវត្ថិភាពព័ត៌មានជាមួយភាពម្ចាស់ការក្នុងការផ្ទៀងផ្ទាត់ និងផ្សព្វផ្សាយតែព័ត៌មានពិតប្រកបដោយគុណតម្លៃសម្រាប់គ្រួសារ និងសហគមន៍។

លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានលើកឡើងថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីសុវត្ថិភាពព័ត៌មាន» ពិតជាមានសារៈសំខាន់ក្នុងការលើកកម្ពស់ការយល់ដឹងដល់សិស្សានុសិស្ស លោកគ្រូ អ្នកគ្រូ និងសាធារណជនឱ្យចេះប្រើប្រាស់ប្រព័ន្ធផ្សព្វផ្សាយប្រកបដោយការទទួលខុសត្រូវ។ សិស្សានុសិស្សទាំងអស់ត្រូវក្លាយជាពលរដ្ឋឌីជីថលប្រកបដោយការទទួលខុសត្រូវ ដោយអនុវត្តគោលការណ៍ «ផ្ទៀងផ្ទាត់មុនចែករំលែក» មិនបង្កើត មិនផ្សព្វផ្សាយ និងមិនចូលរួមចែកចាយព័ត៌មានក្លែងក្លាយ ដែលអាចបង្កឱ្យមានការភាន់ច្រឡំនិងប៉ះពាល់ដល់សង្គម៕

ដោយ៖ ស៊ុម វណ្ណា