AKP ភ្នំពេញ ថ្ងៃទី១៤ ខែកក្កដា ឆ្នាំ២០២៦--សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ការកសាងនូវហេដ្ឋារចនាសម្ព័ន្ធរបស់កម្ពុជា មិនអាចកាត់ផ្ដាច់នូវតួនាទីរបស់ជប៉ុនបាននោះទេ ដូចជា ការកសាង ផ្លូវ ស្ពាន និងកំពង់ផែ ជាដើម ដែលជប៉ុន បានចូលរួមចំណែកយ៉ាងសកម្មនៅក្នុងការជួយដល់ប្រទេសកម្ពុជា។ នេះបើតាមការឱ្យដឹងរបស់ឯកឧត្តម ជា ធីរិទ្ធ អ្នកនាំពាក្យសម្ដេចតេជោ បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម UENO Atsushi ឯកអគ្គរាជទូតជប៉ុន ប្រចាំកម្ពុជា ចូលជួបសម្ដែងការគួរសម និងជម្រាបលា នាព្រឹកថ្ងៃទី១៤ ខែកក្កដា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា ក្នុងខណៈដែលឯកឧត្ដមឯកអគ្គរាជទូតត្រូវបញ្ចប់អាណត្តិបេសកកម្មការទូតនៅកម្ពុជា។

ក្នុងជំនួបនោះ សម្ដេចតេជោ ហ៊ុន សែន បានសម្ដែងនូវក្តីរីករាយក្នុងការជួបឯកឧត្តមជាថ្មី ជាពិសេសបានជួបជជែកជាមួយឯកឧត្តម មុននឹងឯកឧត្តមចាកចេញពីប្រទេសកម្ពុជា។ សម្ដេចតេជោសង្ឃឹមថា ទោះបីជាពេលនេះឯកឧត្តមបានផុតអាណត្តិជាឯកអគ្គរាជទូតប្រចាំនៅព្រះរាជាណាចក្រកម្ពុជាក៏ដោយ ឯកឧត្តម នឹងនឹកឃើញនូវអនុស្សាវរីយ៍ ដែលឯកឧត្តមបានខិតខំប្រឹងប្រែងក្នុងការកសាងពូនជ្រុំនូវទំនាក់ទំនងរវាងកម្ពុជា និងជប៉ុនឱ្យកាន់តែរីកចម្រើន។ សម្ដេចតេជោបានបបន្ដថា មកដល់ពេលនេះប្រទេសទាំងពីរបានក្លាយជាដៃគូយុទ្ធសាស្ត្រជាមួយគ្នា ដែលមានការរីកចម្រើនស្ទើរគ្រប់វិស័យ ជាពិសេសគឺវឌ្ឍនភាព នៃទំនាក់ទំនងរវាងប្រទេសទាំងពីរទាំងនៅក្នុងវិស័យសន្តិសុខ វិស័យសេដ្ឋកិច្ច ពាណិជ្ជកម្ម ការវិនិយោគ ទំនាក់ទំនង រវាងប្រជាជន និងប្រជាជន គឺមានភាពផុសផុល និងរីកចម្រើនជាលំដាប់ ដែលបង្ហាញយ៉ាងច្បាស់អំពីទំនាក់ទំនងរវាងកម្ពុជា និងជប៉ុន កាន់តែរឹងមាំបន្តទៀត។

ជាមួយគ្នានេះ ឯកឧត្តម UENO Atsushi បានកោតសរសើរចំពោះការរីកចម្រើននៅក្នុងប្រទេសកម្ពុជា ដែលឯកឧត្តមបានលើកឡើងថា មិនមែនត្រឹមតែឯកឧត្តមបានធ្វើជាឯកអគ្គរាជទូតទេ ប៉ុន្តែឯកឧត្តមបានអញ្ជើញមកដល់កម្ពុជាតាំងពីឆ្នាំ១៩៩១មកម្ល៉េះ ហើយបានឃើញអំពីភាពរីកចម្រើនរបស់កម្ពុជា ដែលឯកឧត្តមបានបញ្ជាក់ថារយៈពេលជាង៣០ឆ្នាំមកនេះ មិននឹកស្មានថា កម្ពុជា អាចដើរមកដល់ពេលនេះបានទេ។

សម្ដេចតេជោ ហ៊ុន សែន បានសម្ដែងការពេញចិត្ត ចំពោះការលើកឡើងរបស់ឯកឧត្តមអគ្គរាជទូតរបស់ជប៉ុនប្រចាំនៅព្រះរាជាណាចក្រកម្ពុជា ក្នុងការវាយតម្លៃខ្ពស់ចំពោះទំនាក់ទំនងទ្វេភាគី កម្ពុជា និងជប៉ុន។ សម្ដេចតេជោបានអរគុណជាចំពោះឯកឧត្តមដែលបានចូលរួមចំណែកនៅក្នុងការលើកស្ទួយនូវទំនាក់ទំនងទ្វេភាគី រវាងកម្ពុជា និងជប៉ុន ឱ្យកាន់តែរឹងមាំបន្ថែមទៀត។

សម្ដេចតេជោប្រធានព្រឹទ្ធសភាក៏បានអរគុណចំពោះជប៉ុន ដែលតែងតែគាំទ្រ និងជួយដល់កម្ពុជា នៅពេលកន្លងមក ទាំងនៅក្នុងក្របខ័ណ្ឌនៃការស្វែងរកនូវចូលរួមក្នុងការដោះស្រាយនូវបញ្ហាផ្ទៃក្នុងរបស់កម្ពុជា ជាផ្នែកនៃការរកសន្តិភាពសម្រាប់ប្រទេសកម្ពុជា ការចូលរួមចំណែកក្នុងការដោះស្រាយការដោះមីន នៅក្នុងកម្ពុជា។ សម្ដេចតេជោបានបន្ថែមថា អ្វីដែលពិសេសនោះ គឺការគាំទ្ររបស់ជប៉ុន គឺការកសាងនូវហេដ្ឋារចនាសម្ព័ន្ធរបស់កម្ពុជា ដែលមិនអាចកាត់ផ្ដាច់នូវតួនាទីរបស់ជប៉ុនបាននោះទេ ដូចជាការកសាងផ្លូវ ស្ពាន និងកំពង់ផែជាដើម ដែលជប៉ុន បានចូលរួមចំណែកយ៉ាងសកម្មនៅក្នុងការជួយដល់ប្រទេសកម្ពុជា៕

ដោយ៖ ជឹម ណារី