AKP ភ្នំពេញ ថ្ងៃទី១៤ ខែកក្កដា ឆ្នាំ២០២៦--ក្រសួងអប់រំ យុវជន និងកីឡាបាន និងកំពុងពិនិត្យវឌ្ឍនភាពនៃការងាររៀបចំច្រកចេញ-ចូលតែមួយ និងការអភិវឌ្ឍប្រព័ន្ធស្នើសុំអាជ្ញាបណ្ណ ឬលិខិតអនុញ្ញាត តាមប្រព័ន្ធបច្ចេកវិទ្យាព័ត៌មាន ឬថ្នាលបច្ចេកវិទ្យាព័ត៌មានរួមក្នុងវិស័យអប់រំ យុវជន និងកីឡា ដើម្បីធានាឱ្យការផ្ដល់សេវាសាធារណៈមានប្រសិទ្ធភាព តម្លាភាព គណនេយ្យភាព និងភាពងាយស្រួលសម្រាប់ប្រជាពលរដ្ឋ ស្ថាប័នអប់រំ និងអ្នកពាក់ព័ន្ធ។

ថ្លែងក្នុងឱកាសដឹកនាំកិច្ចប្រជុំស្ដីពីការពិនិត្យវឌ្ឍនភាពនៃការអភិវឌ្ឍប្រព័ន្ធស្នើសុំអាជ្ញាបណ្ណ ឬលិខិតអនុញ្ញាតក្នុងវិស័យអប់រំ យុវជន និងកីឡា នាថ្ងៃទី១៣ ខែកក្កដា ឆ្នាំ២០២៦ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការនៃក្រសួងអប់រំ យុវជន និងកីឡា បានមានប្រសាសន៍ថា ការអភិវឌ្ឍប្រព័ន្ធស្នើសុំអាជ្ញាបណ្ណតាមប្រព័ន្ធបច្ចេកវិទ្យាព័ត៌មាន ឬថ្នាលបច្ចេកវិទ្យាព័ត៌មានរួមក្នុងវិស័យអប់រំ គឺជាជំហានគន្លឹះក្នុងបរិវត្តកម្មឌីជីថលរបស់ក្រសួង ដើម្បីឆ្លើយតបទៅនឹងគោលនយោបាយធ្វើទំនើបកម្មសេវាសាធារណៈរបស់រាជរដ្ឋាភិបាលកម្ពុជា។

លោកជំទាវបណ្ឌិត រដ្ឋលេខាធិការប្រចាំការបានបញ្ជាក់ថា ការដាក់ចេញនូវសេចក្ដីណែនាំស្ដីពីការប្រើប្រាស់ប្រព័ន្ធនេះ នឹងជួយបង្កើនភាពងាយស្រួលសម្រាប់ធុរជន វិនិយោគិន និងគណៈគ្រប់គ្រងគ្រឹះស្ថានសិក្សា ក្នុងការស្វែងយល់ពីរបៀបបំពេញព័ត៌មាន និងរៀបចំឯកសារតម្រូវបានត្រឹមត្រូវ ដែលជួយកាត់បន្ថយការខាតបង់ពេលវេលា និងធានាបាននូវការតាមដានស្ថានភាពឯកសារបានគ្រប់ជំហាន។ លោកជំទាវបណ្ឌិត រដ្ឋលេខាធិការប្រចាំការបានបន្ថែមថា តាមរយៈការប្រើប្រាស់ប្រព័ន្ធឌីជីថលនេះ នឹងជួយឱ្យក្រសួងមានមូលដ្ឋានទិន្នន័យរួម (Centralized Database) នៃគ្រឹះស្ថានសិក្សាឯកជនទាំងអស់ក្នុងប្រទេស ដែលងាយស្រួលក្នុងការគ្រប់គ្រង ធ្វើស្ថិតិ ត្រួតពិនិត្យគុណភាព និងវាយតម្លៃផែនការអភិវឌ្ឍន៍វិស័យអប់រំឱ្យកាន់តែមានប្រសិទ្ធភាពខ្ពស់។

សូមជម្រាបជូនថា ក្នុងកិច្ចប្រជុំនេះដែរ ក៏បានពិនិត្យពិភាក្សាលម្អិតលើការរៀបចំសេចក្ដីព្រាងសេចក្ដីណែនាំស្ដីពីការប្រើប្រាស់ប្រព័ន្ធស្នើសុំអាជ្ញាបណ្ណ ឬលិខិតអនុញ្ញាត ដើម្បីធានាឱ្យការអនុវត្តមានភាពច្បាស់លាស់ និងឯកភាពគ្នានៅទូទាំងក្រសួង៕

ដោយ៖ រិទ្ធី, ប្រភព៖ ក្រសួងអប់រំ យុវជន និងកីឡា