AKP ភ្នំពេញ ថ្ងៃទី១៤ ខែកក្កដា ឆ្នាំ២០២៦ -- យោងតាមរបាយការណ៍ថ្មីមួយដែលចេញផ្សាយកាលពីថ្ងៃអាទិត្យ បានឱ្យដឹងថា មូលនិធិកុមារអង្គការសហប្រជាជាតិ (UNICEF) បានលើកឡើងពីការព្រួយបារម្ភថាកុមារចំនួន ៣,៧លាននាក់ដែលមានអាយុក្រោម ៥ឆ្នាំនៅក្នុងប្រទេសអាហ្វហ្គានីស្ថានកំពុងប្រឈមនឹងហានិភ័យខ្ពស់នៃកង្វះអាហារូបត្ថម្ភ។

របាយការណ៍នេះបានគូសបញ្ជាក់ពីភាពអសន្តិសុខស្បៀងអាហារ និងអាហារូបត្ថម្ភរបស់កុមារជាកត្តាជំរុញចម្បងនៃកង្វះអាហារូបត្ថម្ភ ដោយរបាយការណ៍បានព្រមានថា របបអាហារមិនល្អ និងការកើនឡើងនៃអសន្តិសុខស្បៀងអាហារកំពុងជំរុញឱ្យកុមារតូចៗដែលងាយរងគ្រោះខិតទៅជិតស្ថានភាពគំរាមកំហែងដល់អាយុជីវិត។

របាយការណ៍នេះបាននិយាយថា កត្តាជាច្រើនដែលធ្វើឱ្យវិបត្តិកាន់តែធ្ងន់ធ្ងរឡើងគឺកត្តាដែលទាក់ទងគ្នា រួមទាំងការផ្ទុះឡើងនៃជំងឺដដែលៗ ការគ្របដណ្តប់ការចាក់វ៉ាក់សាំងទាប សេវាទឹក អនាម័យ និងការលាងសម្អាតមិនគ្រប់គ្រាន់ ក៏ដូចជាការពង្រីកគម្លាតថវិកា និងការផ្គត់ផ្គង់។

លោក តាជូឌីន អូយេវ៉ាល់ (Tajudeen Oyewale) តំណាងអង្គការUNICEF ប្រចាំប្រទេសអាហ្វហ្គានីស្ថានបាននិយាយថា ការរកឃើញនេះបានបង្ហាញពីសញ្ញាព្រមានដំបូងដូចជា ការថយចុះភាពចម្រុះនៃរបបអាហារការរំលងលើរបបអាហារ និងកុមារទទួលទានតិចជាងតម្រូវការអាហារូបត្ថម្ភរបស់ពួកគេ។ «កុមារតូចៗនៅក្នុងប្រទេសអាហ្វហ្គានីស្ថានកំពុងត្រូវបានជំរុញឱ្យខិតទៅជិតកង្វះអាហារូបត្ថម្ភមុនពេលរដូវស្រកទម្ងន់ចាប់ផ្តើម»។

ទីភ្នាក់ងារនេះកំពុងអំពាវនាវជាបន្ទាន់ឱ្យមានការវិនិយោគកាន់តែច្រើនដើម្បីការពាររបបអាហាររបស់កុមារ និងទប់ស្កាត់ការកើនឡើងបន្ថែមទៀតនៃករណីកង្វះអាហារូបត្ថម្ភ ដោយសង្កត់ធ្ងន់លើតម្រូវការសម្រាប់អន្តរាគមន៍ដំបូង ដើម្បីការពារអ្នកដែលងាយរងគ្រោះបំផុតមុនពេលស្ថានភាពកាន់តែយ៉ាប់យ៉ឺនបន្ថែមទៀត៕

ដោយ៖ មូល មិនា (ប្រភព៖ ស៊ីនហួ)