AKP ភ្នំពេញ ថ្ងៃទី១០ ខែកក្តដា ឆ្នាំ២០២៦--ឯកឧត្តម ឃួន ដាវិត អគ្គលេខាធិការរងរដ្ឋសភា និងជាអនុប្រធានក្រុមការងារដឹកនាំរៀបចំសភាអេឡិចត្រូនិក បានអញ្ជើញជាអធិបតីក្នុងពិធីបិទវគ្គបណ្តុះ បណ្តាលស្តីពី «ការប្រើប្រាស់ប្រព័ន្ធសភាអេឡិចត្រូនិក (E-Parliament)» ជូនដល់ថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានរដ្ឋសភា បន្ទាប់ពីបានដំណើរការសិក្សាយ៉ាងសកម្មអស់រយៈពេលមួយសប្តាហ៍ពេញកន្លងមកនេះ។

នៅក្នុងឱកាសនោះ ឯកឧត្តម ឃួន ដាវិត បានគូសបញ្ជាក់ថា ការដាក់ឱ្យដំណើ រការប្រព័ន្ធ E-Parliament នេះ គឺជាជំហានបដិវត្តន៍ឌីជីថលដ៏សំខាន់ ក្នុងការកាត់បន្ថយការប្រើប្រាស់ក្រដាស កាត់បន្ថយការកកស្ទះឯកសារ និងជំរុញលំហូរការងារក្នុងស្ថាប័នឱ្យកាន់តែមានភាពរលូន រហ័ស និងមានប្រសិទ្ធភាពខ្ពស់ជាងមុន។

ដើម្បីធានាបាននូវនិរន្តរភាពការងារ ក្រុមការ ងារបច្ចេកទេសបានគិតគូរយ៉ាងហ្មត់ ចត់លើការអភិវឌ្ឍប្រព័ន្ធ Server ថ្មី ដែលមានលក្ខណៈទំនើប និងមានប្រព័ន្ធការពារសុវត្ថិភាពខ្ពស់ អាចទប់ទល់នឹងការវាយប្រហារពីខាងក្រៅ (Cyberattacks) បានយ៉ាងមានប្រសិទ្ធភាព។ ទោះជាយ៉ាងនេះក្តី ក្នុងដំណាក់កាលដំបូង ចំណុចចន្លោះប្រ ហោងបច្ចេកទេសតិចតួចអាចនឹងបន្តកើតមាន ដែលទាមទារឱ្យមានការផ្តល់មតិយោបល់ត្រឡប់ (Feedback) ពីសំណាក់មន្ត្រីរាជការជាអ្នកប្រើប្រាស់ផ្ទាល់ ដើម្បីឱ្យក្រុមការងារយកទៅធ្វើបច្ចុប្បន្នភាព ប្រព័ន្ធនេះឱ្យកាន់តែល្អប្រសើរឡើងជាលំដាប់។

ទន្ទឹមនឹងនេះ ឯកឧត្តមអគ្គលេខាធិការរង ក៏បានដាក់ចេញនូវអនុសាសន៍ណែនាំ និងការផ្ដាំផ្ញើដាស់តឿនសំខាន់ៗដល់មន្ត្រីទាំងអស់រួមមាន៖

ការដើរឱ្យទាន់បច្ចេកវិទ្យាតំបន់និងពិភពលោក៖ ជំរុញឱ្យមន្ត្រីរាជការទាំងអស់បន្តខិតខំរៀនសូត្រ បំពេញបន្ថែមនូវសមត្ថភាពពាក់ព័ន្ធនឹងប្រព័ន្ធឌីជីថល ជាពិសេសគឺបញ្ញានិមិត្ត (AI) ក្នុងពេលដែលបច្ចេកវិទ្យាកំពុងវិវត្តយ៉ាងគំហុក។

ការយកចំណេះដឹងទៅបម្រើស្ថាប័ន៖ ត្រូវបង្កើនការយកចិត្តទុកដាក់ និងនាំយកចំណេះដឹងពីវគ្គបណ្តុះបណ្តាលនេះ ទៅប្រើប្រាស់ឱ្យកើតជាប្រយោជន៍ជាក់ស្តែងក្នុងការលើកកម្ពស់សមត្ថភាពស្ថាប័ន។

ការបង្កើតផលប្រយោជន៍ជូនជាតិនិងប្រជាជន៖ ឆ្លើយតបទៅនឹងការរីកចម្រើននៃបច្ចេកវិទ្យា ដើម្បីបង្កើតជាសមិទ្ធផល និងផលប្រយោជន៍ថ្មីៗជូនដល់ប្រជាជាតិទាំងមូល។

គួររំលឹកផងដែរថា ក្នុងវគ្គបណ្តុះប ណ្តាលនេះ សិក្ខាកាមទាំងអស់បានសិក្សា និងអនុវត្តផ្ទាល់លើមុខងារគន្លឹះៗនៃប្រព័ន្ធសភាអេឡិចត្រូនិក រួមមាន៖ ការចុះវត្តមាន និងការប្រជុំតាមប្រព័ន្ធអេឡិចត្រូនិក ការគ្រប់គ្រងឯកសារឌីជីថល ការបោះឆ្នោតតាមប្រព័ន្ធអេឡិចត្រូនិក ការផ្សាយបន្តផ្ទាល់សម័យប្រជុំ និងការប្រើប្រាស់បណ្ណាល័យឌីជីថលជាដើម។ វគ្គបណ្តុះបណ្តាលនេះគឺជាជំហាននៃការត្រៀមខ្លួនដ៏សំខាន់ក្នុងការឈានទៅសម្រេចបាននូវការកសាង «រដ្ឋសភាឌីជីថល» ប្រកបដោយបរិយាបន្ន និងស្របតាមនិន្នាការនៃបរិវត្តកម្មឌីជីថលក្នុងវិស័យសាធារណៈរបស់រាជរដ្ឋាភិបាលផងដែរ៕

ដោយ៖ ប៊ុនរិទ្ធ