AKP កែប ថ្ងៃទី៩ ខែកក្កដា ឆ្នាំ២០២៦-- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្រោយការអនុវត្តគម្រោងជលផលតំបន់ឆ្នេរ និងសមុទ្រប្រកបដោយចីរភាព (SCMF) អស់រយៈពេលជាង៣ឆ្នាំ ធនធានជលផល និងប្រព័ន្ធអេកូឡូស៊ីសមុទ្រនៅខេត្តកែប ត្រូវបានស្តារឡើងវិញយ៉ាងល្អប្រសើរ ដោយមានវត្តមានសត្វសមុទ្រកម្រជាច្រើនប្រភេទ ដូចជា ជ្រូកទឹក ផ្សោតផ្កាឈូក អណ្តើកសមុទ្រ និងសេះសមុទ្រ។ ទន្ទឹមនឹងនេះ ឯកឧត្តមរដ្ឋមន្ត្រីបានអំពាវនាវឱ្យប្រជានេសាទ និងគ្រប់ភាគីពាក់ព័ន្ធ បន្តគោរពច្បាប់ អភិរក្សធនធានសមុទ្រ និងបង្កើនការកែច្នៃផលិតផលជលផល ដើម្បីបង្កើនតម្លៃបន្ថែម លើកកម្ពស់ជីវភាព និងជំរុញសេដ្ឋកិច្ចមូលដ្ឋាន។

ឯកឧត្តមរដ្ឋមន្រ្តីថ្លែងបែបនេះក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារខណ្ឌរដ្ឋបាលជលផលខេត្តកែប នៅក្រុងកែប ខេត្តកែប នាថ្ងៃទី៩ ខែកក្កដា ឆ្នាំ២០២៦ ពិធីនេះមានការអញ្ជើញចូលរួមពីសំណាក់ឯកឧត្តម អ៊ុក ថា ប្រធានក្រុមប្រឹក្សាខេត្ត ឯកឧត្តមបណ្ឌិត សោម ពិសិដ្ឋ អភិបាលខេត្ត និងលោកស្រី Yasmin Sidigi នាយិកាធនាគារអភិវឌ្ឍន៍អាស៊ី (ADB) ប្រចាំកម្ពុជា និងឯកឧត្តមលោកជំទាវប្រតិភូអមដំណើរ រួមជាមួយក្រុមអង្គការដៃគូ ប្រជានេសាទ និងអ្នកពាក់ព័ន្ធច្រើនរូបទៀត។

ឯកឧត្តម ឌិត ទីណា បានមានប្រសាសន៍ថា គម្រោងជលផលតំបន់ឆ្នេរ និងសមុទ្រប្រកបដោយចីរភាព (SCMF ) ជាគម្រោងគាំទ្រការស្តារ និងគ្រប់គ្រងធនធានជលផលតំបន់ឆ្នេរ និងសមុទ្រប្រកបដោយចីរភាព ដើម្បីលើកកម្ពស់ជីវភាពសហគមន៍នេសាទ និងការពារប្រព័ន្ធអេកូឡូស៊ីសមុទ្រនៅខេត្តកែប។ ជាក់ស្តែងជាង៣ឆ្នាំចុងក្រោយនេះ កិច្ចខិតខំប្រឹងប្រែងរួមគ្នា ទាំងរាជរដ្ឋាភិបាល អាជ្ញាធរ មន្ត្រីជំនាញ អង្គការដៃគូ បានធ្វើឲ្យប្រព័ន្ធអេកូឡូស៊ីសមុទ្រខេត្តកែបមានសុខភាពល្អ សម្បូរដោយជីវៈចម្រុះ ពិសេសវត្តមាននៃពពួកសត្វកម្រធំៗ ដូចជាជ្រូកទឹក ផ្សោតផ្កាឈូក អណ្តើកសមុទ្រ និងសេះសមុទ្រជាដើម។

ឯកឧត្តមរដ្ឋមន្ត្រីបានបន្ថែមថា ការរៀបចំឱ្យមានតំបន់ការពារជលផល ការទម្លាក់ប្រអប់សិប្បនិម្មិតជា គឺដើម្បីការពារប្រយោជន៍យូរអង្វែង មិនមែនដើម្បីហាមឃាត់ ឬធ្វើឱ្យរំខាន់ដល់ការនេសាទរបស់ពលរដ្ឋឡើយ ឯកឧត្តមរដ្ឋមន្ត្រីក៏បានស្នើដល់ប្រជានេសាទឱ្យចូលរួមគោរពច្បាប់ អភិរក្សព្រែកកោងកាង ធនធាន និងជីវៈចម្រុះទាំងនៅតាមតំបន់ឆ្នេរទឹករាក់ និងនៅបាតសមុទ្រ ពង្រឹងការកែច្នៃជលផល និងទាញយកប្រយោជន៍ ពីវិស័យទេសចរណ៍នៅតំបន់ឆ្នេរ និងតំបន់ប្រជុំកោះឱ្យបានច្រើន ដើម្បីលើកម្ពស់ជីវភាព ក៏ដូចជាជួយទ្រទ្រង់ដល់សេដ្ឋកិច្ចខេត្ត ខណៈដែលការអនុវត្តវិធានការច្បាប់ ចាប់ផ្តើមធ្វើចំពោះប្រជានេសាទដែលប្រព្រឹត្តបទល្មើស។

ក្នុងឱកាសនោះ ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានលើកឡើងថា ស្របពេលធនធានសមុទ្រកែបមានភាពល្អប្រសើរដូចនេះក៏បានពីការខិតខំប្រឹងប្រែងរបស់សមត្ថកិច្ចជំនាញ ធ្វើការទប់ស្កាត់ និងបង្រ្កាប់រាល់បទល្មើសនានា ក្នុងនោះគិតត្រឹមឆមាសទី១ ឆ្នាំ២០២៦នេះ មន្ត្រីខណ្ឌរដ្ឋបាលជលផលកែបបានចេញល្បាតត្រួតពិនិត្យ បទល្មើស និងធ្វើអធិការកិច្ចទូកនេសាទបានចំនួន៥៦លើក មានរយៈពេល៥៦ថ្ងៃ ដោយបានត្រួតពិនិត្យ ទូកសរុបចំនួន ១២០គ្រឿង ក្នុងនោះ ទូកដែលពុំបានប្រព្រឹត្តបទល្មើសមានចំនួន ១១៥គ្រឿង និងទូក ដែលបានប្រព្រឹត្តបទល្មើសមានចំនួន ០៤គ្រឿង។ ជាមួយនេះ បានធ្វើការអប់រំណែនាំដល់អ្នកនេសាទចំនួន២៥លើក ដែលមានមនុស្សសរុបចំនួន៥៦នាក់ ស្រី០៩នាក់។ ឯកឧត្តមបន្ថែមថា ក្នុងឆមាសទី១ ឆ្នាំ២០២៦នេះ ផលនេសាទទឹកសាប និង សមុទ្រស្រស់អនុវត្តបានចំនួន ២.៨១៦តោន ក្នុងនោះ ផលនេសាទទឹកសាបអនុវត្តបានចំនួន ៦៧តោន និងផលនេសាទសមុទ្រអនុវត្តបានចំនួន ២.៧៤៩តោន។

សូមបញ្ជាក់ថា គម្រោង SCMF បាន និងកំពុងអនុវត្តនៅខេត្តកែប កំពត កោះកុង និងព្រះសីហនុ ដោយមានការគាំទ្រពី ធនាគារអភិវឌ្ឍន៍អាស៊ី (ADB)។ គោលបំណងសំខាន់ៗរួមមាន ស្តារធនធានត្រីនៅតំបន់ជិតឆ្នេរ ការពារស្មៅសមុទ្រ និងផ្កាថ្ម កែលម្អទីតាំងចុះចតនេសាទ លើកកម្ពស់ជីវភាពសហគមន៍នេសាទ បង្កើនភាពធន់នឹងការប្រែប្រួលអាកាសធាតុ ជំរុញការគ្រប់គ្រងធនធានសមុទ្រប្រកបដោយចីរភាព៕

ដោយ AKP