AKP ភ្នំពេញ ថ្ងៃទី០៩ ខែកក្កដា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) បានធ្វើកិច្ចប្រជុំកំពូលជាមួយប្រធានាធិបតីរ៉ូម៉ានី លោក នីកូស័រ ដាន (Nicusor Dan) កាលពីថ្ងៃពុធដោយលោកបាននិយាយថា ទីក្រុងសេអ៊ូលកំពុងស្វែងរកការពង្រីកកិច្ចសហប្រតិបត្តិការទ្វេភាគីលើសពីឧស្សាហកម្មការពារជាតិ។

កិច្ចប្រជុំនេះបានធ្វើឡើងនៅខាងក្រៅកិច្ចប្រជុំកំពូលអង្គការសន្ធិសញ្ញាអាត្លង់ទិកខាងជើងនៅទីក្រុងអង់ការ៉ា ជាកន្លែងដែលលោក លី បានចូលរួមក្នុងនាមជាមេដឹកនាំនៃប្រទេសដៃគូមួយរបស់សម្ព័ន្ធមិត្ត។

លោក លី បានលើកឡើងអំពីប្រទេសរ៉ូម៉ានីថាជា «ដៃគូសហប្រតិបត្តិការដ៏សំខាន់»សម្រាប់ប្រទេសកូរ៉េខាងត្បូង ដោយលោកបាននិយាយថាប្រទេសទាំងពីរបានឃើញកិច្ចសហប្រតិបត្តិការកាន់តែខ្លាំងឡើងក្នុងពាណិជ្ជកម្ម និងឧស្សាហកម្មការពារជាតិ។

លោកបានមានប្រសាសន៍ថា «យើងកំពុងសង្កត់ធ្ងន់លើការពិតដែលថាកិច្ចសហប្រតិបត្តិការដ៏សំខាន់កំពុងកើតឡើងនៅក្នុងឧស្សាហកម្មការពារជាតិរវាងប្រទេសទាំងពីរ ជាមួយនឹងការអភិវឌ្ឍ និងផលិតកម្មរួមគ្នា និងការពង្រីកទៅកាន់ប្រទេសទីបី (ទីផ្សារ)»។

លោកបាននិយាយថា ទីក្រុងសេអ៊ូលកំពុងស្វែងរកការពង្រីកកិច្ចសហប្រតិបត្តិការបែបនេះលើសពីឧស្សាហកម្មការពារជាតិទៅក្នុងវិស័យផ្សេងទៀត រួមទាំងថាមពលនុយក្លេអ៊ែរ ហើយក៏បានអញ្ជើញលោក ដានឱ្យទៅបំពេញទស្សនកិច្ចនៅប្រទេសកូរ៉េខាងត្បូងផងដែរ។

លោក ដាន បានគូសបញ្ជាក់ពីគម្រោងការពារជាតិរ៉ូម៉ានីដែលពាក់ព័ន្ធនឹងក្រុមហ៊ុន Hanwha Group របស់ប្រទេសកូរ៉េខាងត្បូង ក៏ដូចជាគម្រោងជួសជុលរោងចក្រថាមពលនុយក្លេអ៊ែរនៅក្នុងប្រទេសរ៉ូម៉ានីដែលពាក់ព័ន្ធនឹងក្រុមហ៊ុនកូរ៉េខាងត្បូង។

លោកបានមានប្រសាសន៍ថា ប្រទេសទាំងពីរនឹងមានឱកាសថ្មីៗដើម្បីពង្រីកកិច្ចសហប្រតិបត្តិការសេដ្ឋកិច្ច និងបានអញ្ជើញលោក លី ឱ្យទៅបំពេញទស្សនកិច្ចនៅប្រទេសរ៉ូម៉ានី៕

ដោយ៖ មូល មិនា (ប្រភព៖ យ៉ុនហាប់)