AKP កំពង់ធំ ថ្ងៃទី៩ ខែកក្កដា ឆ្នាំ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី៩ ខែកក្កដា ឆ្នាំ២០២៦ បានរៀបចំកិច្ចប្រជុំ ត្រួតពិនិត្យត្រៀមរៀបចំពិធីចាប់ឆ្នោតប្រគល់ផ្ទះថ្មី និងដីសម្បទានសង្គមកិច្ចដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជននិងនិវត្តជនកម្ពុជានិងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនបងប្អូនអតីតយុទ្ធជនដែលមានជីវភាពលំបាកខ្វះខាត គ្មានដី គ្មានផ្ទះ ឬរស់នៅលើដីសាធារណៈចំនួន៣៥គ្រួសារថ្មីទៀត ដើម្បីបានមករស់នៅក្នុងមណ្ឌលអភិវឌ្ឍន៍អតីតយុទ្ធជនមរតកតេជោធិបតីថ្លុកព្រីងឃុំក្រយា ស្រុកសន្ទុក ខេត្តកំពង់ធំ ក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានប្រចាំការ និងជាប្រធានលេខាធិការដ្ឋានសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ ដោយមានការចូលរួមពី អាជ្ញាធរដែនដី ក្រុង ស្រុក និងថ្នាក់ដឹកនាំសមាគមអតីតយុទ្ធជននិងនិវត្តនជនទាំង៩ ក្រុង ស្រុក និងក្រុមលេខាធិការដ្ឋានសមាគមអតីតយុទ្ធជននិងនិវត្តជនកម្ពុជាខេត្តកំពង់ធំ។

លោកវរសេនីយ៍ទោ កែ ម៉ៃ នាយសេនាធិការរងនៃបញ្ជាការដ្ឋានតំបន់ប្រតិបត្តិការសឹកររងកំពង់ធំ និងជាសមាជិកក្រុមលេខាធិការដ្ឋានសមាគមអតីតយុទ្ធជននិងនិវត្តជនកម្ពុជាខេត្តកំពង់ធំ បានឡើងរាយការណ៍អំពីការធ្វើបច្ចុប្បន្នភាព និងការធ្វើអធិការកិច្ច ចំពោះក្រុមគ្រួសារអតីតយុទ្ធជន ដែលបានដាក់ពាក្យស្នើសុំសរុបចំនួន ៤៨គ្រួសារ ក្នុងនោះបានធ្វើការត្រួតពិនិត្យក្រុមគ្រួសារដែលមិនគ្រប់តាមលក្ខខណ្ឌត្រូវទទួលបានចំនួន ៥គ្រួសារ។ ក្រុមគ្រួសារអតីតយុទ្ធជនសុំសាងសង់ផ្ទះនៅក្នុងមូលដ្ឋានវិញចំនួន ៨គ្រួសារ និងគ្រួសារអតីតយុទ្ធជនចំនួន ៣៥គ្រួសារទៀត ដែលមានគ្រប់លក្ខខណ្ឌត្រូវទទួលបានផ្ទះថ្មី និងដីសម្បទានសង្គមកិច្ច។

ជាមួយនេះដែរលោក ជុំ វិរៈ អភិបាលរងស្រុកសន្ទុក ក៏បានឡើងរាយការណ៍បញ្ជាក់អំពីការរៀបចំដីសម្បទានសង្គមកិច្ច និងការសហការជាមួយអង្គភាពពាក់ព័ន្ធក្នុងការសាងសង់ផ្ទះថ្មីចំនួន ៣៥ ខ្នង ជូនអង្គប្រជុំផងដែរ។
ឧត្តមសេនីយ៍ទោ សោម ស៊ុន បានថ្លែងអំណរគុណចំពោះថ្នាក់ដឹកនាំសមាគមអតីតយុទ្ធជននិងនិវត្តជននៅគ្រប់ថ្នាក់ ដែលបានយកចិត្តទុកដាក់រួមចំណែកជួយដោះស្រាយនៅរាល់ការលំបាកជូនដល់បងប្អូនអតីតយុទ្ធជនបានយ៉ាងល្អប្រសើរនាពេលកន្លងទៅ និងបានថ្លែងអំណរគុណចំពោះក្រុមអធិការកិច្ចដែលបានសហការល្អជាមួយអាជ្ញាធរដែនដី និងថ្នាក់ដឹកនាំសមាគមអតីតយុទ្ធជន និងនិវត្តជននៅគ្រប់បណ្ដាថ្នាក់ក្នុងការបំពេញភារកិច្ចប្រកបដោយស្មារតីទទួលខុសត្រូវខ្ពស់។

ឧត្តមសេនីយ៍ទោ សោម ស៊ុន ក៏បានណែនាំដល់ស្ថាប័នជំនាញនៃមន្ទីរសុរិយោដីខេត្តកំពង់ធំ ត្រូវរៀបចំឯកសារនិងសម្ភារពាក់ព័ន្ធនានា ដើម្បីបម្រើឱ្យការចាប់ឆ្នោតទទួលយកដីសម្បទានសង្គមកិច្ច និងផ្ទះថ្មី ប្រកបដោយសុក្រឹតភាព និងបានណែនាំដល់អាជ្ញាធរដែនដី និងថ្នាក់ដឹកនាំសមាគមអតីតយុទ្ធជន និងនិវត្តជនក្រុង ស្រុកនីមួយៗត្រូវបង្កលក្ខណៈងាយស្រួលជូនដល់បងប្អូនអតីតយុទ្ធជន ដែលត្រូវមកចាប់ឆ្នោតទទួលយកផ្ទះថ្មី និងដីសម្បទានសង្គមកិច្ច ឱ្យបានល្អប្រសើរ។ដោយឡែក ក្រុមលេខាធិការដ្ឋានត្រូវរៀបចំអញ្ជើញសមាសភាពចូលរួមក្នុងពិធីនេះឱ្យបានសមរម្យ និងប្រកបដោយកិត្តិយស។

នៅក្នុងឱកាសនោះឧត្តមសេនីយ៍ទោ សោម ស៊ុន តំណាងឱ្យឯកឧត្តម នួន ផារ័ត្ន អភិបាលខេត្ត ប្រធានសមាគមអតីតយុទ្ធជននិងនិវត្តជនកម្ពុជាខេត្តកំពង់ធំ សូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម ដែលបានសាងសង់ផ្ទះជូនអតីតយុទ្ធជននៅក្នុងមណ្ឌលអភិវឌ្ឍន៍អតីតយុទ្ធជនមរតកតេជោធិបតីថ្លុកព្រីង ដែលមកដល់ពេលនេះសរុបមានចំនួន ២៤១ខ្នងផ្ទះរួចមកហើយ និងសូមគោរពជូនពរសម្ដេច និងលោកជំទាវ ព្រមទាំងបុត្រាបុត្រី ចៅប្រុសចៅស្រី សូមទទួលបាននូវពរទាំងឡាយ ៥គឺអាយុ វណ្ណៈ សុខៈ ពលៈ និងបដិភាណៈកុំបីឃ្លានទៀតឡើយ៕

ដោយ ស៊ុម វណ្ណា