AKP ត្បូងឃ្មុំ ថ្ងៃទី៩ ខែកក្កដា ឆ្នាំ២០២៦-- លោកជំទាវ ម៉ាត់ ម៉ារ៉ា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងារថ្នាក់កណ្តាលចុះជួយឃុំគរ បានអញ្ជើញជាអធិបតីក្នុងយុទ្ធនាការដាំកូនឈើ «ត្បូងឃ្មុំស្អាត ត្បូងឃ្មុំបៃតង» ក្រោមមូលបទ «ផ្លូវស្អាត ធម្មជាតិបៃតង» ចំនួន៣០០ដើម នៅព្រឹកថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ដោយមានការនិមន្ត និងអញ្ជើញចូលរួមពីសំណាក់ ព្រះតេជគុណ ព្រះសង្ឃ លោកស្រី កូវ សារ៉ន មេឃុំគរ សមាជិកក្រុមប្រឹក្សាឃុំ ប្រជាពលរដ្ឋ លោកគ្រូ អ្នកគ្រូ សិស្សានុសិស្ស អាជ្ញាធរមូលដ្ឋាន និងអ្នកពាក់ព័ន្ធជាច្រើនរូបទៀតផងដែរ។

ព្រឹត្តិការណ៍នេះមិនត្រឹមតែជានិមិត្តរូបនៃការដាំកូនឈើប៉ុណ្ណោះទេ ប៉ុន្តែថែមទាំងបានបង្កប់នូវអត្ថន័យយ៉ាងជ្រាលជ្រៅនៃការអភិវឌ្ឍហេដ្ឋារចនាសម្ព័ន្ធ ដែលផ្សារភ្ជាប់រវាង «ធម្មជាតិ» និង «សមិទ្ធផលផ្លូវថ្នល់» ដែលថ្នាក់ដឹកនាំបានខិតខំស្វែងរក។

ថ្លែងនៅក្នុងកម្មវិធីនោះ លោកជំទាវ ម៉ាត់ ម៉ារ៉ា បានមានប្រសាសន៍លើកឡើងថា ផ្លូវថ្នល់គឺជាសរសៃឈាមនៃសេដ្ឋកិច្ច។ ការមានផ្លូវល្អ មានន័យថាប្រជាពលរដ្ឋមានឱកាសស្មើគ្នាក្នុងការប្រកបរបរចិញ្ចឹមជីវិត សិស្សានុសិស្សធ្វើដំណើរទៅសាលារៀនបានងាយស្រួល ហើយការដឹកជញ្ជូនកសិផលកាន់តែមានភាពរលូន។ ប៉ុន្តែ ផ្លូវដែលល្អពេញលេញ មិនមែនមានត្រឹមតែភាពរឹងមាំ និងក្រាលកៅស៊ូ ឬបេតុងនោះទេ គឺទាមទារឱ្យមានបរិស្ថានបៃតងនៅអមសងខាងផងដែរ។

លោកជំទាវបានគូសបញ្ជាក់បន្ថែមថា ដើមឈើជួយស្រូបយកឧស្ម័នពុល ផ្តល់នូវខ្យល់អុកស៊ីសែនបរិសុទ្ធ និងធ្វើឱ្យភូមិឃុំក្លាយជាទីកន្លែងដែលគួរឱ្យចង់រស់នៅ (Livable Community)។ ចំណែកឯឫសឈើ ជួយទប់ដីមិនឱ្យបាក់ស្រុតនៅរដូវវស្សា ខណៈដែលម្លប់ឈើជួយរក្សាសំណើមដី និងការពារផ្លូវពីការប្រេះស្រុតដោយសារកម្ដៅថ្ងៃហួសប្រមាណ។

ទន្ទឹមនឹងនេះ លោកជំទាវប្រធានក្រុមការងារបានសង្កត់ធ្ងន់ថា នៅពីក្រោយសមិទ្ធផលផ្លូវកៅស៊ូ និងផ្លូវបេតុងដ៏ខ្វាត់ខ្វែងក្នុងមូលដ្ឋាន គឺកើតចេញពីការតស៊ូ ការស្វះស្វែងរកថវិកា និងការគិតគូរឥតឈប់ឈររបស់ថ្នាក់ដឹកនាំ ជាពិសេសក្រសួងអភិវឌ្ឍន៍ជនបទ។ លោកជំទាវផ្ទាល់ ក៏ដូចជាក្រុមការងារថ្នាក់កណ្ដាលចុះជួយឃុំគរ បាននិងកំពុងប្រែក្លាយចក្ខុវិស័យ «អភិវឌ្ឍន៍ដើម្បីប្រជាជន» ឱ្យលេចចេញជារូបរាងពិតប្រាកដ។ ជាមួយគ្នានេះ ថ្នាក់ដឹកនាំមិនត្រឹមតែផ្តល់ជូននូវហេដ្ឋារចនាសម្ព័ន្ធរូបវន្ត (ផ្លូវថ្នល់) ប៉ុណ្ណោះទេ តែបានគិតគូរដល់ការអភិវឌ្ឍប្រកបដោយចីរភាព (Sustainable Development)។

លើសពីនេះទៅទៀត លោកជំទាវបានចាត់ទុកថា ការផ្ដួចផ្ដើមយុទ្ធនាការដាំកូនឈើនៅថ្ងៃនេះ គឺជាការបង្ហាញពីសេចក្តីស្រឡាញ់ចំពោះបរិស្ថាន ដែលជាមរតកសម្រាប់កូនចៅជំនាន់ក្រោយ។ ទម្រាំបានផ្លូវមួយខ្សែៗ គឺត្រូវឆ្លងកាត់ការសិក្សា ការរៀបចំផែនការ និងការលះបង់កម្លាំងញើសឈាមរបស់ថ្នាក់ដឹកនាំ និងមន្ត្រីពាក់ព័ន្ធ ដើម្បីធានាថាប្រជាជននៅតាមមូលដ្ឋានដាច់ស្រយាលទទួលបាននូវអ្វីដែលល្អបំផុត មិនចាញ់អ្នករស់នៅទីក្រុងឡើយ។

ជាមួយគ្នានេះដែរ លោកជំទាវបានផ្ដាំផ្ញើទៅកាន់អង្គពិធីថា ការដាំកូនឈើមួយដើមនៅថ្ងៃនេះ គឺស្មើនឹងការបណ្តុះសេចក្តីសង្ឃឹម និងជីវិតសម្រាប់អនាគតកាល។ ផ្លូវស្អាតដែលកើតចេញពីញើសឈាមថ្នាក់ដឹកនាំ គួបផ្សំនឹងដើមឈើបៃតងដែលទាមទារការថែទាំពីប្រជាពលរដ្ឋ គឺជាការសហការគ្នាយ៉ាងស្អិតរមួតរវាង «រដ្ឋ និង ប្រជាជន»។

លោកជំទាវ ក៏បានធ្វើការអំពាវនាវយ៉ាងទទូចដល់ បងប្អូនប្រជាពលរដ្ឋក្នុងឃុំគរ ស្រុកត្បូងឃ្មុំ ចូលរួមថែរក្សាសមិទ្ធផលផ្លូវថ្នល់ (កុំដឹកទំនិញលើសទម្ងន់ កុំចាក់ដីបំពានចំណីផ្លូវ) និងចូលរួមស្រោចទឹកថែទាំកូនឈើដែលបានដាំនៅថ្ងៃនេះឱ្យដុះលូតលាស់ធំធាត់ ដើម្បីប្រែក្លាយឃុំគរ ឱ្យទៅជាគំរូនៃ «ភូមិឃុំអភិវឌ្ឍន៍ ផ្លូវស្អាត ធម្មជាតិបៃតង» យ៉ាងពិតប្រាកដជារៀងរហូត៕

ដោយ ហ៊ីម លុកម៉ាន