AKP ភ្នំពេញ ថ្ងៃទី៩ ខែកក្កដា ឆ្នាំ២០២៦--នៅសណ្ឋាគារសាន់វ៉េ រាជធានីភ្នំពេញ កាលពីថ្ងៃទី៨ ខែកក្កដា ឆ្នាំ២០២៦ នាយកដ្ឋានមនុស្សចាស់ និងអតីតយុទ្ធជន បានរៀបចំសិក្ខាសាលា ស្តីពី« របាយការណ៍ពាក់កណ្តាលអាណត្តិនៃការអនុវត្តគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០» ដោយមានការគាំទ្រពី មូលនិធិសហប្រជាជាតិសម្រាប់ប្រជាជន (UNFPA) ក្រោមអធិបតីភាព ឯឧត្តម មុំ ប៊ុនថន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា។

ឯឧត្តម មុំ ប៊ុនថន បានលើកឡើងថា គោលបំណងនៃសិក្ខាសាលាគឺដើម្បីពិនិត្យឡើងវិញនូវ កាវាយតម្លៃការអនុវត្តសកម្មភាពនៃគោលនយោបាយជាតិស្តីពីមនុស្ស័យចាស់ឆ្នាំ២០១៧-២០៣០ ការពិនិត្យភាពស៊ីសង្វាក់គ្នា រវាងសកម្មភាពក្នុងគោលនយោបាយ និងផែនការសកម្មភាពក្នុងនាយកដ្ឋាននីមួយៗ ពង្រឹងការដឹកនាំ ការដកស្រង់បទពិសោធន៍ល្អៗ ការចូលរួមផ្តល់អនុសាសន៍ និងធាតុចូលសំខាន់ៗនៃនាយកដ្ឋានជំនាញនីមួយៗ។

លទ្ធផលទទួលបានពីសិក្ខាសាលានេះបានយល់ដឹងពីទម្រង់ប្រមូលធាតុចូល នៃរបាយការណ៍ពាក់កណ្តាលអាណត្តិនៃការអនុវត្តគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០ ដែលនាយកដ្ឋាននីមួយៗនិងរៀបចំរបាយការណ៏ពាក់កណ្តាលអាណត្តិនៃការអនុវត្តគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០ តាមកាលបរិច្ឆេទជាក់លាក់ ដោយទទួលបានការចូលរួមយ៉ាងផុសផុលពីនាយកដ្ឋានជំនាញ និងអង្គការដៃគូ។

ក្នុងសិក្ខាសាលានោះក៏មានការចូលរួមពីឯកឧត្តម វ៉េង រិទ្ធីស័ក្ត អនុរដ្ឋលេខាធិការ និងឯកឧត្តម សៅ ឡែន អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា  លោក ហ៊ុន ភក្តី អគ្គនាយករងសេវាសង្គមកិច្ច  លោកស្រី សាវន ស្រីមុំ ប្រធាននាយកដ្ឋាន មនុស្សចាស់ និងអតីតយុទ្ធជន-ឯកឧត្តម លោកជំទាវ លោក លោកស្រី ទទួលបន្ទុកការងារមនុស្សចាស់ នៃនាយកដ្ឋានជំនាញក្រោមឱវាទក្រសួង សង្គមកិច្ចអតីតយុទ្ធជន និង យុវនីតិសម្បទា និងអង្គការដៃគូជាច្រើនរូបទៀត៕

ដោយ ណយ នឿន (ប្រភព៖ ក្រសួងសង្គមកិច្ច)