AKP ភ្នំពេញ ថ្ងៃទី៩ ខែកក្កដា ឆ្នាំ២០២៦--សកម្មភាពចុះបាញ់ថ្នាំមូសត្រូវបានរដ្ឋបាលរាជធានីភ្នំពេញ ចុះអនុវត្តជាប់ជាប្រចាំរហូតមក សំដៅលុបបំបាត់ និងកម្ចាត់មូស ជាពិសេសនៅរដូវវស្សា ធ្វើយ៉ាងណាលើកកម្ពស់សុខុមាលភាពរបស់ប្រជាពលរដ្ឋ នៅក្នុងមូលដ្ឋាន ជាពិសេសទប់ស្កាត់ជំងឺគ្រុនឈាម។

ក្រោមកិច្ចសហការពីមន្ទីរសុខាភិបាល និងអាជ្ញាធរខណ្ឌ មន្ដ្រីជំនាញ បានបន្តចុះបាញ់ថ្នាំសម្លាប់មូសខ្លា នៅតាមមូលដ្ឋានខណ្ឌនានា បច្ចុប្បន្ននៅខណ្ឌច្បាអំពៅ ខណៈការអនុវត្តការងារនេះ ធ្វើឡើងតាមការចង្អុលបង្ហាញ និងការគិតគូរពីបញ្ហាសុខភាពសាធារណៈរបស់ប្រជាពលរដ្ឋនៅរាជធានីភ្នំពេញ ពីឯកឧត្ដម ឃួង ស្រេង អភិបាលរាជធានីភ្នំពេញ នៅរាត្រីថ្ងៃទី០៨ ខែកក្ដដា ឆ្នាំ២០២៦ ក្រុមមន្ដ្រីជំនាញសុខាភិបាល បានបន្ដចុះចាញ់ថ្នាំ នៅសង្កាត់ព្រែកប្រា ខណ្ឌច្បាអំពៅ។ 

សកម្មភាពរបស់អាជ្ញារាជធានីភ្នំពេញ ក្នុងការទប់ស្កាប់ និងកំចាត់មូលខ្លានេះ ធ្វើឡើងស្របគ្នាទៅនឹងសេចក្តីណែនាំក្រើនរំលឹក ស្តីពីការបង្ការជំងឺគ្រុនឈាម ក្នុងរដូវវស្សា និងការបញ្ជូនអ្នកជំងឺមកព្យាបាល នៅមន្ទីរពេទ្យឱ្យទាន់ពេលវេលារបស់ក្រសួងសុខាភិបាល នាថ្ងៃទី៨ ខែកក្កដា ឆ្នាំ២០២៦ផងដែរ។

តាមរយៈក្រសួងសុខាភិបាលបានក្រើនរំលឹកថា ក្នុងអំឡុងពេលរដូវវស្សា ជាទូទៅធ្វើឱ្យមានការកើនឡើង វត្ថុដក់ទឹកដែលជាកន្លែងបង្កបង្កើតកូនចៅមូសខ្លា។ ស្របពេលជាមួយគ្នានេះដែរ ប្រទេសកម្ពុជា កំពុងទទួលឥទ្ធិពល នៃបាតុភូតកើនកម្ដៅ (El Niño) អាចធ្វើឱ្យមានការកើនឡើង នៅតំបន់អាស៊ី ប៉ាស៊ីហ្វិក រួមទាំងព្រះរាជាណាចក្រកម្ពុជា។ ស្ថានភាពនេះអាចធ្វើឱ្យមានការកើនឡើងចំនួនមូសខ្លា និងជំងឺគ្រុនឈាម ដែលទាមទារឱ្យមានការចូលរួមយ៉ាងសកម្មពីបុគ្គលម្នាក់ៗ គ្រួសារ និងសហគមន៍។

តាមការសិក្សាស្រាវជ្រាវ សត្វមូសខ្លាចូលចិត្តរស់នៅកន្លែងទឹកដក់ នៅក្នុងវត្ថុដក់ទឹក ដូចជា សំបកកង់ ឡាន/កង់ម៉ូតូទុកចោលពាសវាលពាសកាល ត្រឡោកដូង កែវ ចានជ័រ/ស្ងោរ ក្រឡដែលបោះបង់ចោល ពាង អាង ធុងដាក់ទឹក ទឹកថូផ្កា ចានទ្រជើងតុ ទូ និងពែង ដែលបង្កើតជាប្រភពដក់ទឹក និងជំរកសត្វមូសខ្លា។ សត្វមូសខ្លា ចូលចិត្តសំងំលាក់ខ្លួននៅក្នុងទីកន្លែងងងឹតៗ ឬមិនសូវមានពន្លឺថ្ងៃចូលដល់។

ហេតុនេះ ក្រសួងសុខាភិបាលបានក្រើនរំលឹកដល់បងប្អូនប្រជាពលរដ្ឋ អាជ្ញាធរគ្រប់ជាន់ថ្នាក់ទាំងអស់ ចូលរួមចលនាកាត់បន្ថយ តាមដាន និងទប់ស្កាត់ការកកើតសត្វមូស ដោយប្រកាន់ខ្ជាប់នូវគោលជំហរស្រប នឹងពាក្យស្លោក “ខ្ញុំ និងគ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក” ព្រមទាំងអនុវត្តនូវវិធានការអន្តរាគមន៍ប្រកបដោយស្មារតីទទួលខុសត្រូវខ្ពស់ ដើម្បីការពារសុខភាពផ្ទាល់ខ្លួន ក្រុមគ្រួសារ និងសហគមន៍ ពាក់ព័ន្ធនឹងពាក្យស្លោក "ខ្ញុំ និងគ្រួសារខ្ញុំ ជាគ្រួសារគំរូ"។

លោក ងី មានហេង ប្រធានមន្ទីរសុខាភិបាលរាជធានីភ្នំពេញ ក៏បានអំពាវនាវឱ្យប្រជាពលរដ្ឋរស់នៅរាជធានីភ្នំពេញ ចូលរួមលុបបំបាត់ជម្រកមូសខ្លា។ កាប់ឆ្កាព្រៃជិតផ្ទះ ទឹកដក់ថ្លាជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀងជាជម្រកមូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៏របស់យើង ដើម្បីរួមចំណែកទុបស្កាត់ការចម្លងជំងឺគ្រុនឈាម៕

ដោយ សួស សំរិត