AKP ភ្នំពេញ ថ្ងៃទី៨ ខែកក្តដា ឆ្នាំ២០២៦--

ឯកឧត្តម ជា កុសល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះ បណ្តា លវិជ្ជាជីវៈ បានទទួលជួបសម្តែងការគួរ សម និងពិភាក្សាការងារជាមួយលោក ថមមី គ្រីសស្ទៀនសិន (Tommy Christensen) ប្រធានក្រុមប្រឹក្សាភិបាល និងជានាយកប្រតិបត្តិក្រុមហ៊ុន SCAN Industrial Services (Cambodia) Co., Ltd. ព្រមទាំងអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃកិច្ចព្រមព្រៀង (MoA)ស្តីពីភាពជាដៃគូក្នុងការបណ្តុះ បណ្តាលវិជ្ជាជីវៈ និងការអភិវឌ្ឍកម្លាំងពលកម្ម រវាងក្រសួងការងារនិងបណ្តុះ បណ្តាលវិជ្ជាជីវៈ និងក្រុមហ៊ុន Scan Industrial Services (Cambodia) Co., Ltd (SIS) នារសៀលថ្ងៃទី៨ ខែកក្កដា ឆ្នាំ២០២៦ នាទីស្តីការក្រសួង។

ជំនួបដ៏មានសារៈសំខាន់នេះក៏រៀបចំ ឡើង ដើម្បីឯកភាពគ្នាលើផែនការ និងជំហានបន្ទាប់សម្រាប់ការអនុវត្តអនុស្សរ ណៈនៃកិច្ចព្រមព្រៀង ក្នុងទិសដៅពង្រឹងកិច្ចសហប្រតិបត្តិការលើការអប់រំបណ្តុះប ណ្តាលបច្ចេកទេស និងវិជ្ជាជីវៈ (TVET) ការអភិវឌ្ឍជំនាញ និងការអភិវឌ្ឍកម្លាំងពលកម្ម ស្របតាមគោលន យោបាយរបស់រាជរដ្ឋាភិបាលកម្ពុជា។

នាឱកាសនោះ ក្នុងនាមឯកឧត្តមរដ្ឋមន្រ្តី ឯកឧត្តមរដ្ឋលេខាធិការបានស្វាគមន៍យ៉ាងកក់ក្តៅចំពោះលោក ថមមី គ្រីសស្ទៀនសិន និងសហការី ព្រមទាំងបានវាយតម្លៃខ្ពស់ចំពោះការសម្រេចបាននូវសមិទ្ធផលគួរជាទីមោទនៈនេះ ដែលកើតចេញពីទំនាក់ទំនងល្អ កិច្ចខិតខំប្រឹងប្រែងរបស់ក្រុមការងារបច្ចេកទេស និងការជឿទុកចិត្តគ្នាទៅវិញទៅមក។

ពិធីចុះហត្ថលេខានេះ មានអត្ថន័យលើសពីការបង្កើតកិច្ចព្រមព្រៀងជាផ្លូវការរវាងភាគីទាំងពីរទៅទៀត ដែលជាព្រឹត្តិការណ៍ដ៏សំខាន់មួយក្នុងការពង្រឹងកិច្ចសហប្រតិបត្តិការអន្តរជាតិលើវិស័យ TVET ការអភិវឌ្ឍជំនាញ និងការត្រៀមកម្លាំងពលកម្មកម្ពុជាតាមស្តង់ដាអន្តរជាតិ។

ឯកឧត្តមបានលើកឡើងពីសារៈសំខាន់នៃគ្រឹះស្ថាន TVET ដែលជាមូលដ្ឋានយុទ្ធសាស្ត្ររបស់កម្ពុជាក្នុងការបំប្លែងកម្លាំងពលកម្ម ដោយអនុញ្ញាតឱ្យមានការបណ្ដុះជំនាញឡើងវិញ ការលើកកម្ពស់ជំនាញ ដើម្បីបំពាក់ជំនាញសមស្របនឹងតម្រូវការឧស្សាហកម្មដល់យុវជន ជាពិសេសក្នុងការលើកកម្ពស់ស្តង់ដាវិជ្ជាជីវៈ និងការអភិវឌ្ឍសមត្ថ ភាពកម្លាំងពលកម្មទំនើប។

ទន្ទឹមនេះ រាជរដ្ឋាភិបាលកម្ពុជា ដែលមានក្រសួងការងារជាសេនាធិការ តែង តែផ្តោតការយកចិត្តទុកដាក់ខ្ពស់ក្នុងការអភិវឌ្ឍវិស័យ TVET ហើយគម្រោងត្រូវបានចុះហត្ថលេខានាឱកាសនេះនឹងរួមចំណែកលើកកម្ពស់ឧត្តមភាពរបស់វិទ្យាស្ថានបច្ចេកទេសឧស្សាហកម្ម (ITI) នៃក្រសួងការងារនិងបណ្តុះបណ្តាលវិជ្ជាជីវៈ ឱ្យឈានដល់កម្រិតថ្មីមួយ ទៀត។ សមិទ្ធផលនេះគឺជាអ្វីដែលឯកឧត្តមរដ្ឋមន្ត្រី និងថ្នាក់ដឹកនាំក្រសួងចង់ទទួលបានជាយូរមកហើយ។

ក្នុងនាមឯកឧត្តម ហេង សួរ ឯកឧត្តមរដ្ឋលេខាធិការបានសម្តែងនូវការគាំទ្រយ៉ាងពេញទំហឹងចំពោះគម្រោងនេះ និងទន្ទឹងរង់ចាំប្រកបដោយភាពជឿជាក់យ៉ាងមុតមាំនូវវឌ្ឍនភាពនៃការអនុវត្តគម្រោងប្រកបដោយភាពជោគជ័យ ក្នុងការរួមចំណែកមិនត្រឹមតែអភិវឌ្ឍធនធានមនុស្សប្រកបដោយគុណភាពប៉ុណ្ណោះទេ ប៉ុន្តែក៏នឹងរួមចំណែកលើកកម្ពស់កិត្យានុភាពរបស់វិស័យ TVET ជារួម ស្របតាមស្មារតីនិងយោងតាមផែនការអនុវត្តនៃអនុស្សរណៈនៃកិច្ចព្រមព្រៀងនេះ សម្រាប់ជាឧត្តមប្រយោជន៍សង្គមជាតិនិងយវុជនកម្ពុជាផងដែរ។

ជាការឆ្លើយតប លោក ថមមី បានថ្លែងអំណរគុណយ៉ាងជ្រាលជ្រៅ និងសម្តែងនូវក្តីរំភើបរីករាយយ៉ាងខ្លាំងក្រសួង និងក្រុមហ៊ុនដែលឈានមកដល់ការចុះហត្ថលេខានេះ ដែលនឹងក្លាយជាក្របខ័ណ្ឌ និងវេទិកាសម្រាប់កិច្ចសហប្រតិបត្តិការរវាងភាគីទាំងពីរ។ លោកសង្ឃឹមយ៉ាងមុតមាំថា តាមរយៈកិច្ចសហការនេះ ភាគីទាំងពីរ នឹងអាចសម្រេចបានលទ្ធផលជាក់ស្តែងប្រកបដោយជោគជ័យក្នុងការសម្រេចគោលដៅដែលគ្រោងទុក ដែលនឹងរួមចំណែកអភិវឌ្ឍវិស័យ TVET នៅកម្ពុជា។

សូមបញ្ជាក់ថា គោលបំណងនៃអនុស្សរណៈនៃកិច្ចព្រមព្រៀងនេះ មានទិសដៅបង្កើតក្របខ័ណ្ឌស្របច្បាប់សម្រាប់លើកកម្ពស់កម្មវិធី TVET និងការអភិវឌ្ឍកម្លាំងពលកម្មនៅកម្ពុជា។ កិច្ចសហការនេះនឹងប្រើប្រាស់ជំនាញរបស់ក្រសួងការងារនិងបណ្តុះបណ្តាលវិជ្ជាជីវៈក្នុងកម្មវិធីផ្សារដែក និងគ្រឿង ចក្រ ដើម្បីលើកកម្ពស់នាយកដ្ឋានវិស្វកម្មលោហៈ និងផ្សារដែកសន្លឹកនៃវិទ្យាស្ថាន ITI ឱ្យស្របតាមស្តង់ដាអន្តរជាតិ និងគាំទ្រការអនុវត្តយុទ្ធសាស្ត្របញ្ចកោណ ផែនទីបង្ហាញផ្លូវអភិវឌ្ឍជំនាញកម្ពុជា ឆ្នាំ២០២៣-២០៣៥ ក៏ដូចជាគោលនយោបាយ TVET របស់រាជរដ្ឋាភិបាលកម្ពុជា៕

ដោយ៖ ប៊ុនរិទ្ធ,ប្រភព៖ក្រសួងការងារ