AKP បន្ទាយមានជ័យ ថ្ងៃទី៨ ខែកក្កដា ឆ្នាំ២០២៦--ឱកាសការងារ និងការលើកកម្ពស់ជីវភាពរស់នៅរបស់បងប្អូនអតីតពលករ និងប្រជាពលរដ្ឋជនភៀសសឹក បានឈានមកដល់ដល់មូលដ្ឋានហើយ។ នាព្រឹកថ្ងៃទី០៨ ខែកក្កដា ឆ្នាំ២០២៦ នេះ វេទិកាចុះផ្សព្វផ្សាយស្តីពី «ការជ្រើសរើសសិស្សឱ្យចូលរៀនវគ្គបណ្តុះបណ្តាលសញ្ញាបត្របច្ចេកទេស និងវិជ្ជាជីវៈ១ (C1-1.5M) រយៈពេល ៤ខែ ដោយឥតគិតថ្លៃ និងការវាយតម្លៃតេស្តសមត្ថភាពទទួលស្គាល់ជំនាញពីមុន (RPL)» ត្រូវបានរៀបចំឡើងនៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ ដោយមានបងប្អូនអតីតពលករ និងប្រជាពលរដ្ឋជនភៀសសឹកចូលរួមយ៉ាងកុះករ។

ពិធីនេះត្រូវបានផ្តល់កិត្តិយសចូលរួមជាអធិបតីភាពដោយ លោក ឃ្លោក នួយ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្តម អ៊ុ រាត្រី អភិបាលនៃគណៈអភិបាលខេត្ត រួមជាមួយ លោកស្រី សំរិទ្ធ សូរ្យជាតិ នាយិកាវិទ្យាស្ថានពហុបច្ចេកទេសខេត្តបន្ទាយមានជ័យ ព្រមទាំងមានការចូលរួមពីក្រុមការងារផ្សព្វផ្សាយ អភិបាលរងស្រុកថ្មពួក និងអាជ្ញាធរមូលដ្ឋានជាច្រើនរូបទៀត។ វេទិកានេះត្រូវបានរៀបចំឡើងក្នុងគោលបំណងយុទ្ធសាស្ត្រ ដើម្បីផ្តល់ឱកាសពិតប្រាកដដល់បងប្អូនអតីតពលករដែលកំពុងស្នាក់នៅបណ្ដោះអាសន្ន(ផ្ទះអតីតយុទ្ធជន) មកពីភូមិចំនួន ៣ រួមមាន៖ ភូមិត្រពាំងសំរោង ភូមិផ្លូវបំបែក និងភូមិបឹងសុក្រម។

នៅក្នុងឱកាសនោះ លោកស្រី សំរិទ្ធ សូរ្យជាតិ នាយិកាវិទ្យាស្ថានពហុបច្ចេកទេសខេត្តបន្ទាយមានជ័យ បានឡើងថ្លែងមតិស្វាគមន៍ និងធ្វើការផ្សព្វផ្សាយយ៉ាងក្បោះក្បាយអំពីអត្ថប្រយោជន៍នៃកម្មវិធីបណ្តុះបណ្តាលនេះ។ លោកស្រីបានសង្កត់ធ្ងន់ថាការបណ្តុះបណ្តាលសញ្ញាបត្របច្ចេកទេស និងវិជ្ជាជីវៈ១ (C1-1.5M) រយៈពេល ៤ខែនេះ មិនត្រឹមតែសិក្សាដោយមិនបង់ប្រាក់នោះទេ ប៉ុន្តែថែមទាំងជាស្ពានចម្លងដ៏សំខាន់សម្រាប់បងប្អូនប្រជាពលរដ្ឋ ក្នុងការទទួលបានជំនាញមួយពិតប្រាកដយកទៅប្រកបរបរចិញ្ចឹមជីវិត។ ចំណែកឯកម្មវិធីវាយតម្លៃតេស្តសមត្ថភាពទទួលស្គាល់ជំនាញពីមុន (RPL) វិញ គឺជាឱកាសមាសសម្រាប់បងប្អូនអតីតពលករ ដែលមានបទពិសោធន៍ការងារស្រាប់ពីក្រៅប្រទេស ប៉ុន្តែគ្មានសញ្ញាបត្របញ្ជាក់។ វិទ្យាស្ថាននឹងធ្វើការវាយតម្លៃដើម្បីផ្តល់វិញ្ញាបនបត្រផ្លូវការ ដែលជាខ្នងបង្អែកជួយឱ្យបងប្អូនងាយស្រួលរកការងារធ្វើដែលមានប្រាក់បៀវត្សរ៍ខ្ពស់ និងសមរម្យ។

លោកស្រីនាយិកា ក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យចាប់យកឱកាសដ៏កម្រនេះកុំឱ្យកន្លងហួស ព្រោះវិទ្យាស្ថានពហុបច្ចេកទេសខេត្តបានត្រៀមលក្ខណៈសម្បត្តិរួចជាស្រេច ទាំងសម្ភារឧបទេស និងលោកគ្រូ-អ្នកគ្រូដែលមានជំនាញច្បាស់លាស់ ដើម្បីបណ្តុះបណ្តាលបងប្អូន «ឱ្យចប់ ឱ្យចេះ និងឱ្យមានការងារធ្វើ»។

មានប្រសាសន៍សំណេះសំណាលក្នុងពិធីនោះដែរ លោក ឃ្លោក នួយ អភិបាលរងខេត្តបន្ទាយមានជ័យ បានពាំនាំនូវការសាកសួរសុខទុក្ខពីសំណាក់ ឯកឧត្តម អ៊ុ រាត្រី និងបានលើកឡើងពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការលើកកម្ពស់ជីវភាពប្រជាពលរដ្ឋតាមរយៈការបណ្តុះបណ្តាលជំនាញវិជ្ជាជីវៈ។

លោកអភិបាលរងខេត្ត បានមានប្រសាសន៍សង្កត់ធ្ងន់ថា បងប្អូនជនភៀសសឹក និងអតីតពលករ គឺជាកម្លាំងចលករសំខាន់។ រដ្ឋបាលខេត្តមិនបោះបង់បងប្អូនណាម្នាក់ចោលឡើយ។ វគ្គបណ្តុះបណ្តាលឥតគិតថ្លៃ និងការវាយតម្លៃសមត្ថភាព RPL នេះ គឺជាកាដូដ៏វិសេសវិសាល ដើម្បីជួយឱ្យបងប្អូនមានភាពម្ចាស់ការលើជីវភាព លែងពឹងផ្អែកលើការចំណាកស្រុកប្រថុយប្រថាន និងមានសមត្ថភាពបង្កើតមុខរបរផ្ទាល់ខ្លួននៅក្នុងសហគមន៍។

លោក ឃ្លោក នួយ ក៏បានថ្លែងអំណរគុណយ៉ាងជ្រាលជ្រៅចំពោះ វិទ្យាស្ថានពហុបច្ចេកទេសខេត្ត អាជ្ញាធរស្រុកស្វាយចេក ស្រុកថ្មពួក និងអាជ្ញាធរមូលដ្ឋានទាំងអស់ ដែលបានសហការគ្នាយ៉ាងល្អ បង្កើតឱ្យមានវេទិកាដ៏មានសារៈសំខាន់នេះឡើង ចំគោលដៅ និងដល់ដៃប្រជាពលរដ្ឋដែលកំពុងត្រូវការជំនាញពិតប្រាកដ។

វេទិកាចុះផ្សព្វផ្សាយនាព្រឹកនេះ បានបញ្ចប់ទៅក្រោមបរិយាកាសរីករាយ និងទទួលបានការចាប់អារម្មណ៍យ៉ាងខ្លាំងពីសំណាក់បងប្អូនប្រជាពលរដ្ឋជនភៀសសឹក និងអតីតពលករមកពីភូមិទាំង៣។ នេះជាសញ្ញាណវិជ្ជមានថ្មីមួយទៀត ក្នុងការកាត់បន្ថយភាពក្រីក្រ និងពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅក្នុងខេត្តបន្ទាយមានជ័យ ឱ្យកាន់តែរីកចម្រើនប្រកបដោយបរិយា

បន្ន៕ដោយ ឈុន សារ៉ាត