AKP ភ្នំពេញ ថ្ងៃទី០៨ ខែកក្កដា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) បានមានប្រសាសន៍ថា ប្រទេសចិន និងប្រទេសន័រវេស គួរតែពង្រឹងកិច្ចសហប្រតិបត្តិការ និងចូលរួមចំណែកក្នុងសន្តិភាពនិងការអភិវឌ្ឍពិភពលោក។

លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានធ្វើការកត់សម្គាល់នេះក្នុងអំឡុងពេលចរចាជាមួយរដ្ឋមន្ត្រីការបរទេសន័រវេស លោក អេស្ពេន បាត អ៊ីដ (Espen Barth Eide)។

ដោយកត់សម្គាល់ថា ប្រទេសន័រវេសគឺជាប្រទេសមួយក្នុងចំណោមប្រទេសលោកខាងលិចដំបូងគេដែលទទួលស្គាល់សាធារណរដ្ឋប្រជាមានិតចិន លោក វ៉ាង បាននិយាយថា ទំនាក់ទំនងចិន-ន័រវេស បានរក្សាការអភិវឌ្ឍប្រកបដោយស្ថិរភាព និងចីរភាពក្នុងរយៈពេលប៉ុន្មានឆ្នាំមកនេះ ដែលនាំមកនូវអត្ថប្រយោជន៍សំខាន់ៗដល់ប្រជាជនទាំងពីរ។

លោកបានមានប្រសាសន៍ថា ក្នុងប៉ុន្មានឆ្នាំថ្មីៗនេះ ដោយមានកិច្ចខិតខំប្រឹងប្រែងរួមគ្នារបស់ភាគីទាំងពីរ ទំនុកចិត្តគ្នាទៅវិញទៅមកខាងនយោបាយរវាងប្រទេសទាំងពីរបានបន្តពង្រឹង ខណៈដែលកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកបានរីកចម្រើនកាន់តែស៊ីជម្រៅ និងកាន់តែមានខ្លឹមសារ ដោយពង្រីកទៅជាវិស័យបៃតង និងប្រកបដោយភាពច្នៃប្រឌិតជាងមុន។

លោក វ៉ាង បាននិយាយថា ប្រទេសចិនបានត្រៀមខ្លួនរួចជាស្រេចដើម្បីធ្វើការជាមួយប្រទេសន័រវេស ដើម្បីពង្រឹងការផ្លាស់ប្តូរនៅគ្រប់កម្រិតនិងក្នុងវិស័យផ្សេងៗ រួមទាំងជាមួយរាជវង្សន័រវេស រដ្ឋាភិបាល សភា និងគណបក្សនយោបាយ ការពារមូលដ្ឋានគ្រឹះនយោបាយនៃទំនាក់ទំនងទ្វេភាគី ពង្រីកកិច្ចសហប្រតិបត្តិការជាក់ស្តែងក្នុងវិស័យដូចជាពាណិជ្ជកម្មនិងសេដ្ឋកិច្ចបៃតង និងពង្រឹងចំណងមិត្តភាពទ្វេភាគីជាបន្តបន្ទាប់។

លោក អ៊ីដ បានមានប្រសាសន៍ថា ភាពជាដៃគូស្ថាបនារវាងប្រទេសន័រវេស និងចិនបច្ចុប្បន្នកំពុងទទួលបានសន្ទុះកំណើនដ៏រឹងមាំ។ លោកបានមានប្រសាសន៍ថា ប្រទេសន័រវេសនៅតែប្តេជ្ញាចិត្តយ៉ាងមុតមាំចំពោះគោលនយោបាយចិនតែមួយ ហើយត្រៀមខ្លួនរួចជាស្រេចដើម្បីពង្រឹងការផ្លាស់ប្តូរកម្រិតកំពូល និងការសន្ទនាគ្រប់កម្រិតជាមួយប្រទេសចិន និងជំរុញបន្ថែមទៀតនូវកិច្ចសហប្រតិបត្តិការជាក់ស្តែងក្នុងវិស័យដូចជាពាណិជ្ជកម្ម សេដ្ឋកិច្ចបៃតង ការការពារបរិស្ថាន និងកិច្ចការសមុទ្រ។

ភាគីទាំងពីរក៏បានផ្លាស់ប្តូរទស្សនៈស៊ីជម្រៅលើវិបត្តិអ៊ុយក្រែនស្ថានភាពនៅតំបន់មជ្ឈិមបូព៌ា និងបញ្ហាអន្តរជាតិ និងតំបន់ផ្សេងទៀត៕

ដោយ៖ មូល មិនា (ប្រភព៖ ភីបផលដេលី)