AKP ភ្នំពេញ ថ្ងៃទី៧ ខែកក្កដា ឆ្នាំ២០២៦--
មន្ត្រី១០រូបរបស់អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា បានចាកចេញពីកម្ពុជាហើយ នៅល្ងាចថ្ងៃទី៧ ខែកក្កដា ឆ្នាំ២០២៦ ដើម្បីទៅចូលរួមកិច្ចប្រជុំលើកទី៣ នៃក្រុមការងារត្រួតពិនិត្យសារធាតុគីមីផ្សំ ក្រុមការងារអប់រំបង្ការ និងក្រុមការងារកោសល្យវិច័យគ្រឿងញៀន នៃយន្តការប្រទេសហត្ថលេខីអនុស្សរណៈយោគយល់គ្នានៃប្រទេសមហាអនុតំបន់ទន្លេមេគង្គឆ្នាំ១៩៩៣ ដែលនឹងប្រព្រឹត្តទៅចាប់ពីថ្ងៃទី៧-១១ ខែកក្កដា ឆ្នាំ២០២៦ នៅទីក្រុងណាននីង ប្រទេសចិន។ 

ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀននិងជាប្រធានប្រតិភូកម្ពុជា បានជម្រាបជូនឱ្យដឹងមុនចាកចេញពីកម្ពុជាថា កិច្ចប្រជុំនេះរៀបចំឡើងដោយអង្គការទទួលបន្ទកគ្រឿងញៀននិងឧក្រិដ្ឋកម្ម UNODC ដែលមានសមាសភាពចូលរួមជាមន្រ្តីមកពីបណ្តាប្រទេសហត្ថលេខី MoU ឆ្នាំ១៩៩៣ ទាំង៦ គឺ កម្ពុជា ចិន ថៃ វៀតណាម ឡាវ មីយ៉ាន់ម៉ា និងអង្គការ UNODC សរុបចំនួន ៦០នាក់ ។ ឯកឧត្ដម ឧត្តមសេនីយ៍ឯកបានលើកឡើងថា កិច្ចប្រជុំនេះគឺជាកិច្ចប្រជុំលើកទី៣ ដើម្បីធ្វើបច្ចុប្បន្នភាពលើការអនុវត្តនូវគម្រោងស្តីពីការរួមគ្នាដោះស្រាយបញ្ហាគ្រឿងញៀនសំយោគនៅក្នុងមហាអនុតំបន់ទន្លេមេគង្គ។
ជាមួយគ្នានេះ ឯកឧត្ដម ឧត្តមសេនីយ៍ឯកបានបញ្ជាក់បន្ថែមថា ក្រោយអនុវត្តន៍បានរយៈកាលបីឆ្នាំរួចមក អង្គការ UNODC បានស្នើដល់ប្រទេសទាំងអស់ឱ្យធ្វើបច្ចុប្បន្នភាពការងារតាមវិស័យនៃក្រុមការងារនីមួយៗ ចែករំលែកបទពិសោធន៍ល្អៗ និងយន្តការឆ្លើយតបក្នុងការអនុវត្តការងារដោយផ្អែកលើផែនការសកម្មភាព គោលនយោបាយ លិខិតបទដ្ឋានគតិយុត្តនានាដែលបម្រើដល់ការងារប្រយុទ្ធប្រឆាំងគ្រឿងញៀនតាមបណ្ដាប្រទេសនីមួយៗ៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន