AKP ភ្នំពេញ ថ្ងៃទី០៧ ខែកក្កដា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) ត្រូវបានកំណត់ឱ្យចេញដំណើរនៅថ្ងៃអង្គារទៅកាន់ប្រទេសតួកគី ដែលជាដំណើរទស្សនកិច្ចពីរប្រទេសរបស់លោក ជាកន្លែងដែលលោកនឹងចូលរួមកិច្ចប្រជុំកំពូលអង្គការសន្ធិសញ្ញាអាត្លង់ទិកខាងជើង (NATO) មុនពេលធ្វើដំណើរទៅកាន់ប្រទេសម៉ុងហ្គោលី។

យន្តហោះប្រធានាធិបតីដែលដឹកលោក លី នឹងហោះឡើងទៅកាន់ទីក្រុងអង់ការ៉ា ជាកន្លែងដែលមេដឹកនាំនៃប្រទេសសមាជិកទាំង ៣២ របស់អង្គការណាតូ រួមទាំងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នឹងជួបជុំគ្នាសម្រាប់កិច្ចប្រជុំកំពូលចាប់ពីថ្ងៃអង្គារដល់ថ្ងៃពុធ។

លោក លី នឹងចូលរួមកិច្ចប្រជុំកំពូលអង្គការណាតូ តាមការអញ្ជើញរបស់អគ្គលេខាធិការសម្ព័ន្ធមិត្ត លោក ម៉ាក រូតតេ (Mark Rutte)។ លោកក៏នឹងធ្វើកិច្ចប្រជុំជាមួយប្រធានអង្គការណាតូភ្លាមៗបន្ទាប់ពីមកដល់ទីក្រុងអង់ការ៉ា។

យោងតាមការិយាល័យប្រធានាធិបតីបានឱ្យដឹងថា បន្ទាប់មក លោកលី នឹងធ្វើកិច្ចប្រជុំជាមួយតំណាងប្រទេសជប៉ុន អូស្ត្រាលី និងនូវែលសេឡង់ដែលប្រទេសទាំងបី រួមជាមួយកូរ៉េខាងត្បូង បានបង្កើតបានជា Indo-Pacific Four (IP4) របស់អង្គការណាតូ។

នៅថ្ងៃអង្គារ លោក លី គ្រោងនឹងថ្លែងសុន្ទរកថាសំខាន់មួយនៅក្នុងវេទិកាឧស្សាហកម្មការពារជាតិនៅខាងក្រៅកិច្ចប្រជុំកំពូលអង្គការណាតូដោយចូលរួមវគ្គមួយដែលមានចំណងជើងថា «មានតម្លៃរួម មូលដ្ឋានឧស្សាហកម្មរឹងមាំជាងមុន»។

នៅថ្ងៃពុធ លោក លី ត្រូវបានគេរំពឹងថានឹងធ្វើកិច្ចប្រជុំទ្វេភាគីជាបន្តបន្ទាប់ជាមួយមេដឹកនាំដែលចូលរួម ខណៈដែលប្រទេសកូរ៉េខាងត្បូងកំពុងស្វែងរកការពង្រីកវត្តមានរបស់ខ្លួននៅក្នុងទីផ្សារការពារជាតិធំបំផុតរបស់ពិភពលោក។

ចាប់ពីថ្ងៃព្រហស្បតិ៍ដល់ថ្ងៃសៅរ៍ លោក លី នឹងបំពេញទស្សនកិច្ចផ្លូវរដ្ឋទៅកាន់ប្រទេសម៉ុងហ្គោលី តាមការអញ្ជើញរបស់ប្រធានាធិបតីម៉ុងហ្គោលី លោក យូកណាអាជីន ឃូរេលស៊ូក      (Ukhnaagiin Khurelsukh) ដោយចាប់ផ្តើមជាមួយនឹងកិច្ចប្រជុំកំពូលរបស់មេដឹកនាំម៉ុងហ្គោលីនៅថ្ងៃដំបូង។

មេដឹកនាំទាំងពីរមានគម្រោងប្រកាស «យុគសម័យមាសនៃទំនាក់ទំនងកូរ៉េខាងត្បូង-ម៉ុងហ្គោលី» ដោយគូសបញ្ជាក់ពីចក្ខុវិស័យរួមសម្រាប់អនាគតនៃទំនាក់ទំនងទ្វេភាគី៕

ដោយ៖ មូល មិនា (ប្រភព៖ យ៉ុនហាប់)