AKP បន្ទាយមានជ័យ ថ្ងៃទី៧ ខែកក្កដា ឆ្នាំ២០២៦--ទឹកប្រាក់សរុបចំនួន ១០០,០០០,០០០ រៀល (១០០លានរៀល) ដែលប្រមូលបានពីទឹកចិត្តសប្បុរសធម៌របស់មន្ត្រីរាជការ កងកម្លាំងប្រដាប់អាវុធ អាជីវករ និងប្រជាពលរដ្ឋទូទាំងខេត្តបន្ទាយមានជ័យ តាមរយៈ«យុទ្ធនាការជិះកង់»ពេញមួយខែមិថុនា ត្រូវបាននាំយកទៅប្រគល់ជូនមូលនិធិគន្ធបុប្ផាកម្ពុជាដោយផ្ទាល់ហើយ ដើម្បីចូលរួមចំណែកជាមួយរាជរដ្ឋាភិបាលក្នុងការទ្រទ្រង់ និងធានានិរន្តរភាពកិច្ចដំណើរការសង្គ្រោះជីវិតកុមារកម្ពុជា។

ពិធីប្រគល់ និងទទួលថវិកាមនុស្សធម៌ដ៏ធំធេងនេះ បានប្រព្រឹត្តទៅនារសៀលថ្ងៃទី០៦ ខែកក្កដា ឆ្នាំ២០២៦ នេះ នៅមន្ទីរពេទ្យគន្ធបុប្ផាខេត្តសៀមរាប (មន្ទីរពេទ្យជ័យវរ្ម័នទី៧) ក្រោមវត្តមានដ៏ខ្ពង់ខ្ពស់របស់ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានគណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំខេត្ត និងលោកជំទាវ ព្រមទាំង ឯកឧត្តម ប្លែក វ៉ារីប្រធានក្រុមប្រឹក្សាខេត្ត និងក្រុមការងារខេត្តបន្ទាយមានជ័យ។

យុទ្ធនាការជិះកង់ដើម្បីកុមារគន្ធបុប្ផា ដែលរៀបចំឡើងដោយរដ្ឋបាលខេត្តបន្ទាយមានជ័យពេញមួយខែមិថុនា កន្លងទៅនេះ មិនត្រឹមតែជាព្រឹត្តិការណ៍កីឡាដើម្បីសុខភាព និងការបំផុសស្មារតីសាមគ្គីភាពក្នុងសហគមន៍ប៉ុណ្ណោះទេ ប៉ុន្តែវាបានក្លាយជាចលនាមនុស្សធម៌ដ៏រស់រវើក និងមានអត្ថន័យជ្រាលជ្រៅបំផុត។ រាល់ការបង្វិលឈ្នាន់កង់របស់ថ្នាក់ដឹកនាំ មន្ត្រីរាជការ និងប្រជាពលរដ្ឋ គឺតំណាងឱ្យការរួមរួមគ្នាដោះស្រាយការលំបាក និងការផ្តល់ក្តីសង្ឃឹមដល់កុមាររាប់ម៉ឺននាក់ដែលកំពុងត្រូវការការព្យាបាល។

មានប្រសាសន៍ក្នុងឱកាសដ៏មានអត្ថន័យនោះ ឯកឧត្តម អ៊ុំ រាត្រី បានសម្តែងនូវសេចក្តីសោមនស្សរីករាយ និងក្តីរំភើបយ៉ាងក្រៃលែងចំពោះលទ្ធផលផ្លែផ្កាដុះចេញពីទឹកចិត្តសប្បុរសធម៌របស់ដួងព្រលឹងរួមគ្នារបស់ប្រជាជនខេត្តបន្ទាយមានជ័យ។

ឯកឧត្តមបានគូសបញ្ជាក់ថា «ថវិកាចំនួន ១០០ លានរៀលនាពេលនេះ គឺស្តែងចេញពីទឹកចិត្ត ពីបេះដូង និងជាការរួមចំណែកដ៏បរិសុទ្ធរបស់បងប្អូនប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធគ្រប់លំដាប់ថ្នាក់ក្នុងខេត្តបន្ទាយមានជ័យ ដែលបានលះបង់ធនធានផ្ទាល់ខ្លួនគាំទ្រដល់យុទ្ធនាការជិះកង់ពេញមួយខែ។ យើងដឹងច្បាស់ថា មន្ទីរពេទ្យគន្ធបុប្ផា គឺជាជម្រកដ៏កក់ក្តៅ និងជាអ្នកផ្តល់ជីវិតទីពីរដល់កុមារកម្ពុជា រាប់ទាំងកុមារមកពីខេត្តបន្ទាយមានជ័យផងដែរ។ ដូច្នេះ ការចូលរួមថែរក្សានិរន្តរភាពមន្ទីរពេទ្យនេះ គឺជាកាតព្វកិច្ចពលរដ្ឋ និងជាស្មារតីខ្មែរជួយខ្មែរដ៏ពិតប្រាកដ»។

ទន្ទឹមនឹងនេះដែរ ឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ ក៏បានលើកឡើងផងដែរអំពីសារៈសំខាន់នៃការបន្តវប្បធម៌ចែករំលែកនេះ។ ឯកឧត្តមបានថ្លែងអំណរគុណយ៉ាងជ្រាលជ្រៅចំពោះគណៈកម្មការរៀបចំយុទ្ធនាការ និងសប្បុរសជនទាំងអស់ដែលបានធ្វើឱ្យព្រឹត្តិការណ៍នេះទទួលបានជោគជ័យហួសពីការរំពឹងទុក ដោយអាចប្រមូលថវិកាបានរហូតដល់ទៅ ៩ខ្ទង់ ដើម្បីជួយដល់មន្ទីរពេទ្យដែលព្យាបាលកុមារដោយឥតគិតថ្លៃ និងប្រកបដោយគុណភាពមួយនេះ។

តំណាងមន្ទីរពេទ្យគន្ធបុប្ផា និងតំណាងមូលនិធិគន្ធបុប្ផាកម្ពុជាប្រចាំខេត្តសៀមរាប បានសម្តែងនូវការដឹងគុណយ៉ាងជ្រាលជ្រៅបំផុតចំពោះគំនិតផ្តួចផ្តើមដ៏ខ្ពង់ខ្ពស់របស់ថ្នាក់ដឹកនាំខេត្តបន្ទាយមានជ័យ ព្រមទាំងទឹកចិត្តសប្បុរសធម៌មិនអាចកាត់ថ្លៃបានរបស់ប្រជាពលរដ្ឋនៅក្នុងខេត្តជាប់ព្រំដែនមួយនេះ។

តំណាងមន្ទីរពេទ្យបានអះអាងថា ថវិកាទាំងនេះនឹងត្រូវយកទៅប្រើប្រាស់ចំគោលដៅប្រកបដោយតម្លាភាពបំផុត ដើម្បីទិញឱសថ បរិក្ខារពេទ្យ និងទ្រទ្រង់ការព្យាបាលសង្គ្រោះជីវិតកុមារកម្ពុជាឱ្យស្របតាមទិសដៅដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនិងលោកជំទាវ និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

យុទ្ធនាការជោគជ័យនៃខេត្តបន្ទាយមានជ័យនាពេលនេះ បានក្លាយជាគំរូដ៏បវរមួយនៃការគៀរគរមូលនិធិសហគមន៍តាមរយៈសកម្មភាពកីឡា និងកម្សាន្ត ដែលមិនត្រឹមតែជួយលើកកម្ពស់សុខុមាលភាពសាធារណៈប៉ុណ្ណោះទេ ថែមទាំងបានបំប្លែងកម្លាំងកាយទៅជាកម្លាំងមនុស្សធម៌ដ៏មានឥទ្ធិពល ក្នុងការបន្តនិរន្តរភាពស្នាមញញឹម និងអនាគតដ៏ភ្លឺស្វាងរបស់កុមារា កុមារីកម្ពុជាទូទាំងប្រទេស៕

ដោយ ឈុន សារ៉ាត