AKP កំពង់ធំ ថ្ងៃទី៧ ខែកក្កដា ឆ្នាំ២០២៦--លោក ជា វ៉ាន់ចាន់ អភិបាលរងខេត្តកំពង់ធំ បានដាក់ចេញនូវគោលការណ៍ណែនាំ៦ចំណុចជំរុញឱ្យអភិបាលរងស្រុកប្រាសាទសំបូរថ្មី បំពេញការងារឱ្យមានប្រសិទ្ធភាពខ្ពស់ដើម្បីជាត្រីវិស័យតម្រង់ទិសយកទៅអនុវត្តន៍ក្នុងអង្គភាពសំដៅធានាឱ្យបាននូវសាមគ្គីភាពផ្ទៃក្នុង និងប្រសិទ្ធភាពការងារជូនប្រជាពលរដ្ឋក្នុងមូលដ្ឋាន។  លោកអភិបាលរងខេត្តបានជំរុញនូវគោលការណ៍គន្លឹះទាំងនេះ នៅក្នុងកម្មវិធីប្រកាសចូលកាន់មុខតំណែងអភិបាលរងនៃគណៈអភិបាលស្រុកប្រាសាទសំបូរ កាលពីរសៀលថ្ងៃទី៦ ខែកក្កដាឆ្នាំ២០២៦ នៅសាលាស្រុកប្រាសាទសំបូរ ដោយមានការចូលរួមពីមន្ត្រីរាជការនិងអាជ្ញាធរពាក់ព័ន្ធជាច្រើននាក់។  

លោក យិន ប៊ុនសាត ត្រូវបានប្រកាសតែងតាំងចូលកាន់មុខតំណែងជាអភិបាលរងនៃគណៈអភិបាលស្រុកប្រាសាទសំបូរថ្មី ជំនួសលោក ម៉ាន់ សារ៉ាត់ ដែលត្រូវផ្លាស់ប្តូរភារកិច្ចនិងទទួលមុខតំណែងថ្មី។

លោក ជា វ៉ាន់ចាន់ បានមានប្រសាសន៍សង្កត់ធ្ងន់ថា ទោះបីជាមានការផ្លាស់ប្តូរថ្នាក់ដឹកនាំថ្មីប៉ុន្តែនិរន្តរភាពការងាររដ្ឋបាលនិងការបម្រើសេវាសាធារណៈជូនប្រជាពលរដ្ឋ មិនត្រូវឱ្យមានការរអាក់រអួលនោះឡើយដើម្បីឆ្លើយតបទៅនឹងទំនុកចិត្តរបស់រាជរដ្ឋាភិបាល ក៏ដូចជាគណៈអភិបាលខេត្តលោកបានជំរុញឱ្យលោកអភិបាលរងស្រុកដែលទើបតែងតាំងថ្មី ត្រូវប្រកាន់ខ្ជាប់នូវគោលការណ៍សំខាន់ៗទាំង ៦ចំណុចរួមមាន៖ ការពង្រឹងសាមគ្គីភាព និងឯកភាពផ្ទៃក្នុងត្រូវចេះសហការគ្នាយ៉ាងជិតស្និទ្ធជាមួយគណៈអភិបាលស្រុក ក្រុមប្រឹក្សាស្រុក កងកម្លាំងប្រដាប់អាវុធ និងមន្ត្រីរាជការគ្រប់លំដាប់ថ្នាក់។ ២.ការលើកកម្ពស់ការផ្តល់សេវាសាធារណៈ ត្រូវយកចិត្តទុកដាក់ពង្រឹងការផ្តល់សេវាសាធារណៈជូនប្រជាពលរដ្ឋ ឱ្យបានឆាប់រហ័ស មានតម្លាភាព គណនេយ្យភាព គ្មានការរើសអើងនិងប្រកាន់ខ្ជាប់នូវវប្បធម៌សេវាសាធារណៈ។ ៣. ការប្រកាន់ខ្ជាប់នូវអភិបាលកិច្ចល្អ និងក្រមសីលធម៌ ត្រូវចងចាំជានិច្ចថា មន្ត្រីរាជការគឺជា “អ្នកបម្រើដ៏ស្មោះត្រង់របស់ប្រជាពលរដ្ឋ” មិនមែនជា "ចៅហ្វាយនាយ" របស់រាស្ត្រនោះទេ។ ៤. ការថែរក្សាសន្តិសុខនិងសណ្តាប់ធ្នាប់សាធារណៈបន្តជំរុញ និងដឹកនាំការអនុវត្ត គោលនយោបាយភូមិ/ឃុំ-សង្កាត់មានសុវត្ថិភាពឱ្យមានប្រសិទ្ធ ភាពខ្ពស់។ ៥. ការចុះមូលដ្ឋាននិងការដោះស្រាយបញ្ហាប្រឈមចុះផ្ទាល់ដល់មូលដ្ឋាន ភូមិ ឃុំ ដើម្បីសួរសុខទុក្ខ ក្តាប់ឱ្យបាននូវបញ្ហាប្រឈម និងតម្រូវការ ចាំបាច់ពិតប្រាកដរបស់ប្រជាពលរដ្ឋ និង ៦.ការខិតខំអភិវឌ្ឍន៍សមត្ថភាពផ្ទាល់ខ្លួន បន្តខិតខំស្រាវជ្រាវ និងស្វែងយល់បន្ថែមអំពីច្បាប់ លិខិតបទដ្ឋានគតិយត្តថ្មីៗ គោលការណ៍ ណែនាំ និងនិតិវិធីរដ្ឋបាល។

ដើម្បីឆ្លើយតបនឹងគោលការណ៍សំខាន់ៗទាំងនេះ លោក យិន ប៊ុនសាត បានធ្វើការប្តេជ្ញាចិត្តយ៉ាងម៉ឺងម៉ាត់៖ ១.ស្មោះត្រង់ជាច់ខាតចំពោះ ជាតិ សាសនា ព្រះមហាក្សត្រ និងគោរពការពារឱ្យបានដាច់ខាត នូវរដ្ឋធម្មនុញ្ញ នៃព្រះរាជាណាចក្រកម្ពុជា ព្រមទាំងការពារសន្តិភាពឱ្យបានគង់វង្ស។ ២.ចូលរួមគាំទ្រ និងអនុវត្តន៍ឱ្យបានក្រោមការដឹកនាំដ៏ឈ្លាសវៃ និងប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ៣.គោរពសេចក្តីសម្រេចនានារបស់ថ្នាក់លើ។ ៤.ខិតខំបម្រើប្រជាពលរដ្ឋដោយស្មោះត្រង់ យកចិត្តទុកដាក់ ដោះស្រាយរាល់បញ្ហាប្រឈមរបស់បងប្អូនជាពលរដ្ឋ។ ៥.ថែរក្សាការពង្រឹងសាមគ្គីភាពនិងឯកភាពផ្ទៃក្នុងឱ្យបានរឹងមាំនិង៦.បន្តខិតខំរៀនសូត្រនិងដកស្រង់បទពិសោធន៍ ទាំងផ្នែកចំណេះដឹង និងជំនាញការងារជាក់ស្តែង ដើម្បីអភិវឌ្ឍន៍សមត្ថភាពខ្លួនជាប្រចាំ ក្នុងការចូលរួមចំណែកកសាង និងអភិវឌ្ឍន៍ស្រុកប្រាសាទសំបូរឱ្យកាន់តែមានការរីកចម្រើនលើគ្រប់វិស័យបន្ថែមទៀត៕

ដោយ ស៊ុម វណ្ណា