AKP សៀមរាប ថ្ងៃទី០៦ ខែកក្កដា ឆ្នាំ២០២៦-- អង្គការអង្គការសម្ព័ន្ធភាព ដើម្បីអភិរក្សធនធានជលផល ហៅកាត់ (FACT) និងអង្គការដៃគូជាច្រើនទៀតសហការជាមួយក្រសួងមហាផ្ទៃនៅព្រឹកថ្ងៃទី០៦ ខែកក្កដា ឆ្នាំ២០២៦ បានរៀបចំសិក្ខាសាលាស្តីអំពីការណែនាំ និងជំរុញលើកទឹកចិត្តដល់ក្រុមប្រឹក្សា ឃុំ សង្កាត់ ព្រមទាំងភាគីពាក់ព័ន្ធ ដើម្បីប្រើប្រាស់កញ្ចប់ថវិកាឃុំសង្កាត់ សម្រាប់គាំទ្រដល់ការគ្រប់គ្រងធនធានធម្មជាតិ ធនធានជលផល និងការអភិវឌ្ឍសេដ្ឋកិច្ចរបស់ប្រជាពលរដ្ឋនៅមូលដ្ឋាន។

ឯកឧត្ដម អ៊ុ ម៉ារ៉ា រដ្ឋលេខាធិការក្រសួងមហាផ្ទៃ បានមានប្រសាសន៍ថា សិក្ខាសាលានេះបានបង្ហាញលទ្ធផលវេទិកាថ្នាក់ជាតិ លើកទី១ និងទី២ និងវឌ្ឍនភាពរបស់អង្គការ FACT និងអង្គការដៃគូជាតិ-អន្តរជាតិ ដែលបាននិងកំពុងអនុវត្តការងារនៅវិស័យធនធានធម្មជាតិ និងធនធានជលផលក្នុងតំបន់ទាំង៣ គឺតំបន់បឹងទន្លេសាប ទន្លេមេគង្គ និងតំបន់ឆ្នេរ និងផ្សព្វផ្សាយចំណេះដឹងថ្មីៗ ស្តីពីច្បាប់គោលនយោបាយ អនុក្រឹត្យ និងបទដ្ឋានគតិយុត្តផ្សេងៗ ដែលពាក់ព័ន្ធនឹងការគ្រប់គ្រងនិងប្រើប្រាស់ធនធានធម្មជាតិ-ធនធានជលផល និងសេដ្ឋកិច្ចហិរញ្ញវត្ថុនៅថ្នាក់ក្រោមជាតិ។

ឯកឧត្តមបានបន្តថា កម្ពុជា ជាប្រទេសដែលសំបូរទៅដោយប្រភពធនធានជលផល ដែលបានចូលរួមចំណែកយ៉ាងសំខាន់ដល់ការលើកកម្ពស់សេដ្ឋកិច្ចជាតិ ដូចជាការផ្តល់ការងារ មុខរបរចិញ្ចឹមជីវិតដល់ប្រជាជនក្រីក្រនៅមូលដ្ឋាន និងសន្ដិសុខស្បៀងជាដើម។ បច្ចុប្បន្ននេះ ធនធានជលផលបាននឹងកំពុងប្រឈមចំពោះមុខនូវបញ្ហាចម្បងៗដូចជា ការកើនឡើងនូវការនេសាទហួសកម្រិត ដោយសារកំណើនប្រជាជន ការប្រែប្រួលអាកាសធាតុធ្វើឱ្យគោករីងរាគបឹង និងកន្លែងអភិរក្ស ការបំពុលបរិស្ថាន ជាដើម។ដូចនេះឯកឧត្តមសូមលើកទឹកចិត្តឱ្យ ប្រើប្រាស់កញ្ចប់ថវិកាឃុំសង្កាត់ សម្រាប់គាំទ្រដល់ការគ្រប់គ្រងធនធានធម្មជាតិ ធនធានជលផល និងការអភិវឌ្ឍសេដ្ឋកិច្ចរបស់ប្រជាពលរដ្ឋនៅមូលដ្ឋាន។

លោក យុក សេងឡុង នាយកប្រតិបត្ដិនៃអង្គការអង្គការសម្ព័ន្ធភាព ដើម្បីអភិរក្សធនធានជលផលបានមានប្រសាសន៍ថា ឃុំ/សង្កាត់ មានតួនាទីសំខាន់ក្នុងការរៀបចំផែនការអភិវឌ្ឍន៍មូលដ្ឋាន និងការគ្រប់គ្រងធនធានសាធារណៈ ដើម្បីឆ្លើយតបទៅនឹង តម្រូវការរបស់ប្រជាពលរដ្ឋ។ កញ្ចប់ថវិកាឃុំ/សង្កាត់ គឺជាយន្តការហិរញ្ញវត្ថុដ៏សំខាន់មួយ ដែលអាចចូលរួមគាំទ្រដល់ការ គ្រប់គ្រងធនធានធម្មជាតិ ការការពារបរិស្ថាន ការបន្សំនឹងការប្រែប្រួលអាកាសធាតុ និងការលើកកម្ពស់ជីវភាពរស់នៅ របស់ប្រជាពលរដ្ឋ ស្របតាមអាទិភាព និងតម្រូវការជាក់ស្តែងរបស់មូលដ្ឋាន។ លោកបានបន្ដថា ដោយមើលឃើញពីសារៈសំខាន់នៃតួនាទីរដ្ឋបាលថ្នាក់ក្រោមជាតិ ក្នុងការគាំទ្រដល់ការគ្រប់គ្រងធនធានធម្មជាតិ បរិស្ថាន និងការបន្សំនិងការប្រែប្រួលអាកាសធាតុ ទើបមានការរៀបចំសិក្ខាសាលានេះឡើង ដើម្បីចែករំលែកបទពិសោធន៍ ការណែនាំនិងពិភាក្សា អំពីការប្រើប្រាស់កញ្ចប់ថវិកាឃុំ/សង្កាត់ សម្រាប់គាំទ្រដល់ការ គ្រប់ គ្រងធនធានធម្មជាតិ ធនធានជលផល និងការអភិវឌ្ឍសេដ្ឋកិច្ចរបស់ប្រជាពលរដ្ឋមូលដ្ឋាន៕

ដោយ ឃុត សៅ