‌‎AKP កំពង់ស្ពឺ ថ្ងៃទី0៦ ខែកក្កដា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺ និងលោកជំទាវ ម៉េង វ៉ាន់ដានីន រួមជាមួយឯកឧត្តម លោក លោកស្រី ក្នុងជួរគណៈកម្មាធិការសាខា និងប្រធានមន្ទីរ-អង្គភាពជុំវិញខេត្ត បានអញ្ជើញចុះសួរសុខទុក្ខក្មួយៗកុមារា កុមារី ចំនួន ១៣៤នាក់ ដែលមានជំងឺគ្រុនឈាម ហើយកំពុងសម្រាកព្យាបាលនៅមន្ទីរពេទ្យបង្អែកខេត្តកំពង់ស្ពឺ។
‎

ឆ្លៀតក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការសាខា បានពាំនាំនូវប្រសាសន៍សាកសួរសុខទុក្ខ និងក្តីនឹករលឹកយ៉ាងជ្រាលជ្រៅបំផុតពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរ និងយកចិត្តទុកដាក់ខ្ពស់បំផុតចំពោះសុខុមាលភាព និងជីវភាពរស់នៅរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនទុកឱ្យពលរដ្ឋណាម្នាក់រងគ្រោះដោយមិនបានដឹងឮ និងមិនបានទទួលការជួយឧបត្ថម្ភនោះឡើយ។
‎

ទន្ទឹមនឹងនេះ ឯកឧត្តមបណ្ឌិត ប្រធានគណៈកម្មាធិការសាខា ក៏បានថ្លែងអំណរគុណ និងកោតសរសើរយ៉ាងក្រៃលែងចំពោះស្មារតីលះបង់ និងការខិតខំប្រឹងប្រែងរបស់ថ្នាក់ដឹកនាំ មន្ត្រីសុខាភិបាល ជាពិសេសលោកគ្រូពេទ្យ អ្នកគ្រូពេទ្យទាំងអស់ ដែលបាននិងកំពុងបំពេញភារកិច្ចយ៉ាងសកម្មទាំងយប់ទាំងថ្ងៃ ក្នុងការជួយសង្គ្រោះ ថែទាំអ្នកជំងឺ។ ឯកឧត្តមបណ្ឌិត ក៏បានលើកទឹកចិត្តដល់ក្រុមគ្រូពេទ្យឱ្យបន្តខិតខំយកចិត្តទុកដាក់ បញ្ចេញអស់កម្លាំងកាយចិត្ត និងជំនាញវិជ្ជាជីវៈ ដើម្បីព្យាបាលបងប្អូនប្រជាពលរដ្ឋ ក៏ដូចជាក្មួយៗកុមារតូចៗឱ្យបានជាសះស្បើយឆាប់រហ័ស ដើម្បីបានវិលត្រឡប់ទៅជួបជុំក្រុមគ្រួសារវិញ។
‎

ជាមួយគ្នានោះដែរ ឯកឧត្តមបណ្ឌិត បានផ្តាំផ្ញើដល់អាណាព្យាបាល និងបងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឱ្យបានខ្ពស់ចំពោះជំងឺគ្រុនឈាម ក្នុងរដូវវស្សានេះ ដោយត្រូវអនុវត្តន៍តាមការណែនាំរបស់ក្រសួងសុខាភិបាល។ ប្រកាន់ខ្ជាប់នូវគោលការណ៍រស់នៅស្អាត ផឹកស្អាត។ រួមគ្នាលុបបំបាត់ជម្រកមូសខ្លាឱ្យបានទាន់ពេលវេលា។ ក្នុងឱកាសចុះសួរសុខទុក្ខនោះដែរ សាខាកាកបាទក្រហមខេត្តកំពង់ស្ពឺ បានឧបត្ថម្ភដល់កុមារដែលកំពុងសម្រាកព្យាបាលជំងឺគ្រុនឈាមទាំង ១៣៤នាក់ ដោយក្នុងម្នាក់ៗទទួលបានថវិកាចំនួន ៥ម៉ឺនរៀល ដើម្បីជួយសម្រាលបន្ទុកគ្រួសារមួយផ្នែកផងដែរ៕

ដោយ ម៉ែន ប៊ុនធីម