AKP ភ្នំពេញ ថ្ងៃទី០៦ ខែកក្កដា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) បានមានប្រសាសន៍កាលពីថ្ងៃសៅរ៍ថាគ្រួសាររបស់លោក វ៉ាលេនប៊ឺក និងសហគមន៍ធុរកិច្ចស៊ុយអែតគួរតែបន្តដើរតួនាទីយ៉ាងសកម្មក្នុងការលើកទឹកចិត្តរដ្ឋាភិបាលស៊ុយអែតឱ្យបន្តគោលនយោបាយសមហេតុផល និងជាក់ស្តែងចំពោះប្រទេសចិន ដោយជួយសាធារណជនស៊ុយអែតទទួលបានការយល់ដឹងពិតប្រាកដអំពីប្រទេសចិន និងជំរុញការគាំទ្រពីសាធារណជនឱ្យកាន់តែរឹងមាំសម្រាប់ការកែលម្អទំនាក់ទំនងទ្វេភាគី។

លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន (CPC) បានធ្វើការកត់សម្គាល់នេះ ក្នុងអំឡុងពេលជួបជាមួយ លោក ចាកូប វ៉ាលេនប៊ឺក (Jacob Wallenberg) ប្រធានក្រុមប្រឹក្សាភិបាលនៃក្រុមហ៊ុន Investor AB ដែលមានមូលដ្ឋាននៅប្រទេសស៊ុយអែត។

លោក វ៉ាង បាននិយាយថា គ្រួសាររបស់លោក វ៉ាលេនប៊ឺក មានទំនាក់ទំនងយ៉ាងជ្រាលជ្រៅជាមួយប្រទេសចិន។ ក្នុងនាមជាសម្ព័ន្ធភាពអឺរ៉ុបដំបូងគេមួយដែលចូលទៅក្នុងទីផ្សារចិនបន្ទាប់ពីការកែទម្រង់ និងការបើកចំហរបស់ប្រទេសចិន វាបានដើរតួនាទីយ៉ាងសំខាន់ និងជាគំរូ និងបានរួមចំណែកយ៉ាងពិសេសដល់ទំនាក់ទំនងចិន-ស៊ុយអែត។

លោកបាននិយាយថា ក្រោមការដឹកនាំរបស់ប្រធានាធិបតីចិន លោក ស៊ី ជីនពីង (Xi Jinping) និងបក្ស CPC ប្រទេសចិនកំពុងដើរតាមមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន និងទទួលបានការគាំទ្រពីប្រជាជន ហើយកំពុងជំរុញទំនើបកម្មចិនលើគ្រប់វិស័យ។

លោក វ៉ាង បានមានប្រសាសន៍ថា ការអភិវឌ្ឍរបស់ប្រទេសចិនមានសន្ទុះខាងក្នុងដ៏រឹងមាំ និងតក្កវិជ្ជាប្រវត្តិសាស្ត្រច្បាស់លាស់។ លោកបានបន្ថែមថា ប្រទេសចិននឹងបន្តអនុវត្តន៍តាមទស្សនវិជ្ជាអភិវឌ្ឍន៍ថ្មី ដើម្បីណែនាំការអភិវឌ្ឍដែលមានគុណភាពខ្ពស់ ជំរុញតម្រូវការក្នុងស្រុកជាបន្តបន្ទាប់ ពង្រីកការបើកចំហរដែលមានស្តង់ដារខ្ពស់ រក្សាគោលការណ៍នៃពាណិជ្ជកម្មសេរី និងសេដ្ឋកិច្ចទីផ្សារ ចែករំលែកឱកាសអភិវឌ្ឍន៍ជាមួយពិភពលោក និងលើកកម្ពស់ការកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ។

ចំណែកលោក វ៉ាលេនប៊ឺក បាននិយាយថា ក្រុមហ៊ុនរបស់លោកបានចូលទីផ្សារចិនក្នុងទសវត្សរ៍ឆ្នាំ១៩៧០ និង១៩៨០ ដោយបានឃើញផ្ទាល់ភ្នែកនូវដំណើរការនៃការកែទម្រង់ និងការបើកចំហរបស់ប្រទេសចិន បានចូលរួមយ៉ាងទូលំទូលាយក្នុងការផ្លាស់ប្តូរ និងកិច្ចសហប្រតិបត្តិការរវាងប្រទេសស៊ុយអែត និងប្រទេសចិននៅទូទាំងវិស័យផ្សេងៗ និងទទួលបានអត្ថប្រយោជន៍យ៉ាងច្រើនពីដំណើរការនេះ។

លោក វ៉ាលេនប៊ឺក បាននិយាយថា ប្រទេសចិនសម្រេចបាននូវសមិទ្ធផលអភិវឌ្ឍន៍គួរឱ្យកត់សម្គាល់ ដោយការប្រកួតប្រជែងផ្នែកសេដ្ឋកិច្ចនិងឥទ្ធិពលអន្តរជាតិរបស់ខ្លួននៅតែបន្តកើនឡើង៕

ដោយ៖ មូល មិនា (ប្រភព៖ ភីបផលដេលី)