AKP ភ្នំពេញ ថ្ងៃទី០៥ ខែកក្កដា ឆ្នាំ២០២៦ -- នារសៀលថ្ងៃសៅរ៍ទី៤ ខែកក្កដា ឆ្នាំ២០២៦ ឯកឧត្ដម ចាន់ យុត្ថា រដ្ឋលេខាធិការ ក្រសួងធនធានទឹក និងឧតុនិយម បានអញ្ជើញទៅពិនិត្យស្ថានភាពជាក់ស្តែង និងកិច្ចអន្តរាគមន៍សង្គ្រោះស្រូវរដូវវស្សា ដែលកំពុងជួបប្រទះការខ្វះខាតទឹក នៅក្នុងភូមិសាស្ត្រស្រុកស្ទោង ស្រុកកំពង់ស្វាយ និងស្រុកប្រាសាទបល្ល័ង្ក ខេត្តកំពង់ធំ។

យោងតាមរបាយការណ៍របស់មន្ទីរធនធានទឹក និងឧតុនិយមខេត្តកំពង់ធំ គិតត្រឹមដើមខែកក្កដានេះ ស្ថានភាពរបាយទឹកភ្លៀងមានការថយចុះ បណ្តាលឱ្យផ្ទៃដីដាំដុះស្រូវវស្សារបស់ប្រជាពលរដ្ឋរងផលប៉ះពាល់សរុបចំនួន ១៥,០៧៣ ហិកតា ក្នុងនោះផ្ទៃដីដែលកំពុងជួបប្រទះការខ្វះខាតទឹកខ្លាំង និងត្រូវការសង្គ្រោះបន្ទាន់មានចំនួន ១,៧២៥ ហិកតា។

ដើម្បីឆ្លើយតបនឹងស្ថានភាពបន្ទាន់នេះ មន្ទីរធនធានទឹក និងឧតុនិយមខេត្តកំពង់ធំ បានប្រើប្រាស់ម៉ាស៊ីនបូមទឹកចល័តចំនួន ៦ គ្រឿង ជាកិច្ចអន្តរាគមន៍។ 

ក្នុងឱកាសចុះពិនិត្យផ្ទាល់ ដោយពិនិត្យឃើញតម្រូវការទឹកមានកម្រិតខ្ពស់ និងដើម្បីសង្គ្រោះស្រូវប្រជាកសិករឱ្យបានទាន់ពេលវេលា ឯកឧត្ដមរដ្ឋលេខាធិការ បានណែនាំមន្ទីរឱ្យដំឡើងម៉ាស៊ីនបូមទឹកកម្លាំងខ្លាំងចំនួន ១ គ្រឿង បន្ថែមទៀតជាបន្ទាន់៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)