AKP បន្ទាយមានជ័យ ថ្ងៃទី០៥ ខែកក្កដា ឆ្នាំ២០២៦ -- ក្នុងបរិយាកាសដ៏កក់ក្តៅនាខេត្តបន្ទាយ មានជ័យ ឯកឧត្តម កែ គឹមយ៉ាន សមា ជិកគណៈអចិន្ត្រៃយ៍ គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូ លដ្ឋានខេត្ត បានគូសបញ្ជាក់យ៉ាងច្បាស់អំពីភាពរឹងមាំនៃសាមគ្គីភាព និងការប្តេជ្ញាចិត្តខ្ពស់ក្នុងការថែរក្សាសុខសន្តិ ភាព ដែលជាមូលដ្ឋានគ្រឹះនៃកំណើនសេដ្ឋកិច្ចជាតិ។ ថ្លែងនៅក្នុងពិធីសំណេះសំណាលជា មួយមន្ត្រីគណបក្ស និងយុវជនក្រុងប៉ោយប៉ែត កាលពីរសៀលថ្ងៃទី០៤ ខែកក្កដា ឆ្នាំ២០២៦ ឯកឧត្តម កែ គឹមយ៉ាន បានចាត់ទុកជោគជ័យនៃកិច្ចការងារបក្ស និងរាជរដ្ឋាភិបាលកន្លងមក គឺជាលទ្ធផលនៃការរួបរួមគ្នាជាធ្លុងមួយរវាងមន្ត្រី និងប្រជាពលរដ្ឋគ្រប់មជ្ឈដ្ឋាន។

ឯកឧត្តមបានកោតសរសើរដោយស្មោះចំពោះវីរភាពរបស់ប្រជាពលរដ្ឋ កងកម្លាំង និងក្រុមការងារក្នុងខេត្តបន្ទាយមានជ័យ ដែលបានបង្ហាញស្មារតីជាតិនិយមយ៉ាងមុតស្រួចក្នុងអំឡុងពេលប្រឈមមុខនឹងកងទ័ពថៃឈ្លានពាន មកលើដែនអធិបតេយ្យភាពកម្ពុជានិងការជួយដោះស្រាយទុក្ខលំបាកជូនប្រជាពលរដ្ឋនៅតាមបណ្តោយព្រំដែន។ ឯកឧត្តមចាត់ទុកការរួមសុខរួមទុក្ខនេះ ថាជាកម្លាំងចលករដ៏សំខាន់ដែលធ្វើឱ្យគណបក្សប្រជាជនកម្ពុជាទទួលបានជំនឿទុកចិត្តយ៉ាងពេញទំហឹងពីប្រជា ពលរដ្ឋគ្រប់អាណត្តិ។

ក្នុងឱកាសនោះ ឯកឧត្តម កែ គឹមយ៉ាន បានលើកឡើងពីភាពជោគជ័យនៃការដឹកនាំប្រកបដោយថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបន្តនូវមាគ៌ានយោបាយដ៏ត្រឹមត្រូវរបស់ សម្តេចតេជោ ហ៊ុន សែន។ តាមរយៈការដឹកនាំដ៏ឈ្លាសវៃនេះ កម្ពុជាសម្រេចបានកំណើនសេដ្ឋកិច្ចប្រមាណ ៤,២% ក្នុងឆមាសទី១ ឆ្នាំ២០២៦ ដែលនេះជាសក្ខីភាពបញ្ជាក់ថា ទោះបីស្ថិតក្នុងបរិបទពិភពលោកមានភាពស្មុគស្មាញក្តី ក៏កម្ពុជានៅតែរក្សាបាននូវស្ថិរភាព និងការអភិវឌ្ឍន៍។

ជាមួយនោះ ឯកឧត្តម កែ គឹមយ៉ាន បានដាក់ចេញនូវអនុសាសន៍គន្លឹះ សម្រាប់មន្ត្រីគ្រប់លំដាប់ថ្នាក់ត្រូវការពារឱ្យ បានដាច់ខាតនូវសុខសន្តិភាព និងស្ថិរភាពនយោបាយ ដែលជាចំណុចស្នូលនៃការអភិវឌ្ឍន៍។ រួមគ្នាការពារជាតិ សាសនា ព្រះមហា ក្សត្រ និងអធិបតេយ្យភាពជាតិ។ បន្តពង្រឹងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ដើម្បីធានាបាននូវភាពសុខដុមរមនាក្នុងសង្គម។ ការជួបសំណេះសំណាលនេះ មិនត្រឹមតែជាការថ្លែងអំណរគុណដល់មន្ត្រីមូលដ្ឋានប៉ុណ្ណោះទេ ប៉ុន្តែថែមទាំងជាសារនយោបាយដ៏សំខាន់មួយ ដើម្បីពង្រឹងស្មារតី និងឯកភាពផ្ទៃក្នុងឆ្ពោះទៅរកការអភិវឌ្ឍខេត្តបន្ទាយមានជ័យ ឱ្យកាន់តែរីកចម្រើនថែមទៀត៕

ដោយ ៖ឈុនសារ៉ាត