AKP ព្រះសីហនុ ថ្ងៃទី៤ ខែកក្កដា ឆ្នាំ៣០២៦ -- នៅរសៀលថ្ងៃសៅរ៍ទី៤ ខែកក្កដា ឆ្នាំ២០២៦ ឯកឧត្តម ម៉ាង ស៊ីណេត អភិបាល នៃគណៈអភិ បាលខេត្តព្រះសីហនុ បានអញ្ជើញដឹកនាំកិច្ចប្រជុំពិនិត្យ និងពិភាក្សា ស្តាប់បទបង្ហាញលើសេចក្តីព្រាងគម្រោងប្លង់មេ ដើម្បីកែលម្អរមណីយដ្ឋានទឹកធ្លាក់ក្បាលឆាយ ដែលមានទីតាំងស្ថិតនៅសង្កាត់លេខ១ ក្រុងព្រះសីហនុ។

លោក លូភួង ដាវ៉ាលីន អនុប្រធានមន្ទីររៀបចំដែនដីនគរូបនីយកម្មសំណង និងសុរិយោដីខេត្តព្រះសីហនុ ធ្វើបទបង្ហាញសេចក្តីព្រាងផែនការ ដើម្បីពិនិត្យប្លង់មេគម្រោងកែលម្អរមណីយដ្ឋានទឹកធ្លាក់ក្បាលឆាយឱ្យក្លាយជាតំបន់ទេសចរណ៍បែបធម្មជាតិដ៏សម្បូរបែប និងផ្តល់អត្ថប្រយោជន៍ដល់សង្គម និងសេដ្ឋកិច្ចតាមរយៈការចូលរួមអភិរក្ស និងបង្កើតការងារ រួមទាំងអភិវឌ្ឍសេដ្ឋកិច្ចក្នុងមូលដ្ឋាន និងចូលរួមការពារបរិស្ថាន ព្រមទាំងការអភិរក្សធនធានធម្មជាតិ បង្កើតផលិត ផលទេសចរណ៍ថ្មីៗ ការទាក់ទាញភ្ញៀវទេសចរជាដើម ហើយក៏ជាគម្រោងប្រណិតមួយនៅព្រះរាជាណាចក្រកម្ពុជា តាមរយៈការបម្រើសេវាកម្មបដិសណ្ឋារកិច្ចភ្ជាប់ទៅនឹងប្រព័ន្ធអេកូឡូស៊ីព្រៃឈើធម្មជាតិ និងទឹកធ្លាក់ ដើម្បីបង្កើតគោលដៅអេកូទេសចរណ៍ផ្សារភ្ជាប់នឹងប្រព័ន្ធអេកូឡូស៊ី ដោយមានការការពារ និងការស្តារប្រព័ន្ធអេកូឡូស៊ីព្រៃឈើធម្មជាតិ ដែលនៅជុំវិញ ជាពិសេសផ្តល់ឱកាសការងារជូនប្រជាពលរដ្ឋនៅក្នុងមូលដ្ឋាន និងបញ្ច្រាបការយល់ដឹងជាសាធារណអំពីសារៈសំខាន់ៗ នៃព្រៃឈើធម្មជាតិ និងទឹកធ្លាក់ដែលជាគោលដៅអភិវឌ្ឍហេដ្ឋារចនាសម្ព័ន្ធរូបវន្តរួមមានប្រព័ន្ធផ្លូវ ទឹក ភ្លើង  តំបន់ស្នាក់នៅ មជ្ឈមណ្ឌលសិក្សាស្រាវជ្រាវផ្តល់សេវាកម្ម និងផលិតផលទេសចរណ៍ថ្មីៗបែបទស្សនទានអេកូទេសចរណ៍ប្រណិត ក្នុងការចូលរួមអភិរក្ស និងការពារធនធានធម្មជាតិក្នុងតំបន់គម្រោង ចំពោះយុទ្ធសាស្ត្រគន្លឹះ នៃការវិនិ យោគគម្រោងអេកូទេសចរណ៍រមណីយដ្ឋានទឹកធ្លាក់ក្បាលឆាយ ក្នុងនោះមានដូចជា៖ ១.គ្រប់គ្រងការកំណត់តម្លៃក្នុងស្រុក និងអន្តរជាតិ, ២.កំណត់អត្តសញ្ញាណទីផ្សារ, ៣.ការអភិវឌ្ឍន៍រចនាសម្ព័ន្ធ និងសេវាកម្មទេសចរណ៍, ៤.ការបង្កើតសោភ័ណភាព និងភាពទាក់ទាញក្នុងតំបន់វិនិយោគ, ៥.អំណោយផល ទីតាំងភូមិសាស្ត្រ, ៦.ការរៀបចំចំណតរថយន្តឱ្យធំទូលាយ និងមានសណ្តាប់ធ្នាប់, ៧.ធានាសន្តិសុខ និងរបៀបរៀបរយ, ៨.បន្ទប់ទឹកសាធា រណៈឱ្យបានស្អាតស្របតាមស្តង់ ដារអនាម័យ, ៩.អាងលេងទឹកបែបធម្មជាតិ ដែលកែ ច្នៃដោយមិនប៉ះពាល់ដល់បរិស្ថាន ចំពោះទីកន្លែងសម្តែងសិល្បៈ និងវប្បធម៌សម្រាប់បង្ហាញអំពីទម្រង់បែបបទប្រពៃណីបុរាណផ្សេងៗដល់ភ្ញៀវទេសចរណ៍ជាតិ និងអន្តរជាតិអញ្ជើញមកទស្សនា ក្នុងនោះក៏មានទីតាំងកញ្ចុះអង្គុយលេងសម្រាប់លម្ហែកាយ និងអគារលក់វត្ថុអនុស្សាវរីយ៍រួមទាំងតាំងពិព័រណ៍ផលិតផលក្នុងស្រុក ដោយក្នុងនោះក៏បានបង្កើតសួនផ្កាចម្រុះពណ៌ ដើម្បីបង្កើនសោភ័ណភាព រួមទាំងសួនបន្លែចម្រុះដែលជាលក្ខណៈធម្មជាតិ និងការរៀបចំផ្ទះបាយចំអិនម្ហូបអាហាររបស់អាជីវករឱ្យមានអនាម័យខ្ពស់ និងមានរបៀបរៀបរយ។

បន្ទាប់ពីបានស្ដាប់បទបង្ហាញរួចមក ឯកឧត្តម ម៉ាង ស៊ីណេត អភិបាលខេត្តព្រះសីហនុ បានធ្វើការវាយតម្លៃចំពោះកិច្ចពិភាក្សា លើសេចក្តីព្រាងផែនការ ដើម្បីពិនិត្យប្លង់មេគម្រោងកែលម្អរមណីយ ដ្ឋានទឹកធ្លាក់ក្បាលឆាយ ដើម្បីប្រមូលធាតុចូលពីមន្ទីរ អង្គភាពពាក់ព័ន្ធ និងបានឯកភាពលើបទបង្ហាញគម្រោងអភិវឌ្ឍប្លង់មេកែ លម្អរមណីយដ្ឋានទឹកធ្លាក់ក្បាលឆាយ ក៏ប៉ុន្តែត្រូវពិនិត្យតាមដានលើការគ្រប់ គ្រង អភិរក្សព្រៃឈើធម្មជាតិ ព្រមទាំងទឹកធ្លាក់ និងរុក្ខជាតិផ្សេងៗទៀតឱ្យនៅ ពណ៌បៃតង ព្រោះការអភិវឌ្ឍទាមទារការអភិរក្សធនធានធម្មជាតិ និងជីវចម្រុះផងដែរ ។   

ក្នុងឱកាសនោះ ឯកឧត្តម អភិបាល ខេត្តព្រះសីហនុ ក៏បានជំរុញឱ្យក្រុមការងារត្រូវសិក្សាពីគម្រោងអភិវឌ្ឍរយៈពេលវែង ដើម្បីធានាដល់ដំណើរការអភិវឌ្ឍន៍តំបន់អេកូទេសចរណ៍ ព្រៃឈើធម្មជាតិ និងទឹកធ្លាក់ក្បាលឆាយប្រព្រឹត្តទៅរលូនតាមការគ្រោងទុក ដើម្បីបង្កើតការងារជូនប្រជាពលរដ្ឋ ជាពិសេសការបង្កើនជីវភាពរស់នៅរបស់ប្រជាពលរដ្ឋក្នុងមូលដ្ឋានកាន់តែល្អប្រសើរ ព្រមទាំងបង្កើននូវសោភ័ណភាព អនាម័យបរិស្ថាន របៀបរៀបរយ និងសុវត្ថិភាពសាធារណៈជូនទៅដល់ភ្ញៀវទេសចរជាតិ និងអន្តរជាតិដែលមកលេងកម្សាន្តរមណីយដ្ឋានធម្មជាតិក្បាលឆាយនៅពេលខាងមុខកាន់តែច្រើនឡើង ៕

ដោយ ងូ សុមុនី