AKP សៀមរាប ថ្ងៃទី៤ ខែកក្កដា ឆ្នាំ២០២៦ -- ឯកឧត្តម ប៊ុន ថាឫទ្ធិ អ្នកតំណាងរាស្ត្រមណ្ឌលសៀមរាប​រួមនឹងក្រុមការងារនៅព្រឹកថ្ងៃទី​៤​ ខែកក្កដា ឆ្នាំ២០២៦ បានចុះជួបសំណេះសំណាលសួរសុខទុក្ខនិងនាំយកអំណោយជាគ្រឿងឧបភោគបរិភោគរួមនិងថវិកា​ជូនដល់ក្រុមគ្រួសារកងទ័ពចំនួន៥០គ្រួសារដែលរស់នៅក្នុងឃុំស្វាយស ស្រុកវ៉ារិន  ខេត្តសៀមរាប​ ដែលមានសមាជិកគ្រួសារកំពុងបំពេញភារកិច្ចនៅជួរមុខប្រយុទ្ធតតាំងជាមួយចោរឈ្លានពានថៃ។

ឯកឧត្តម ប៊ុន ថាឫទ្ធិ អ្នកតំណាងរាស្ត្រមណ្ឌលសៀមរាបបានមានប្រសាសន៍ថា ដើម្បីធានាថាគ្រួសារកងទ័ពនៅសមរភូមិក្រោយមិនមានការខ្វះខាត និងដើម្បីបញ្ជាក់ថាកងទ័ពនៅជួរមុខមិននៅឯកោឡើយ ដោយមានការគាំទ្រជានិច្ចពីថ្នាក់ដឹកនាំ និងរាជរដ្ឋាភិបាល ហើយក្នុងនាមតំណាងរាស្រ្តការចុះសួរសុខទុក្ខប្រជាពលរដ្ឋ គឺជាកាតព្វកិច្ចដ៏សំខាន់មួយ ដើម្បីស្វែងយល់ពីសុខទុក្ខ ការលំបាក និងសំណូមពរផ្ទាល់របស់ប្រជាពលរដ្ឋនៅតាមមូលដ្ឋាន ហើយក៍ជាសកម្មភាពមនុស្សធម៌ដ៏សំខាន់ដែលតែងតែធ្វើឡើងដើម្បីលើកទឹកចិត្តដល់កងកម្លាំងជួរមុខដែលកំពុងបំពេញបេសកកម្មការពារជាតិផងដែរ ។

ឯកឧត្តម ប៊ុន ថាឫទ្ធិ​បន្តថា យើងអាចដេកលក់ស្រួល ប្អូនៗក្មួយៗអាចទៅសាលារៀនដោយរីករាយ ហើយប្រទេសជាតិអាចអភិវឌ្ឍទៅមុខបាន ក៏ដោយសារតែមានការលះបង់ដ៏ធំធេងពីសំណាក់បងប្អូនកងទ័ព ដែលកំពុងឈរជើងការពារទឹកដីយ៉ាងអង់អាចក្លាហាននៅតាមខ្សែបន្ទាត់ព្រំដែន។

ឯកឧត្តមក៍បានថ្លែងបញ្ជាក់ថា បងប្អូនជាភរិយា ជាមាតាបិតា ឬជាកូនៗរបស់យុទ្ធជនយើង ត្រូវរស់នៅឆ្ងាយពីស្វាមី ពីកូន ឬពីឪពុក ដែលពួកគាត់កំពុងបំពេញភារកិច្ចការពារជាតិមាតុភូមិ ហើយ ការលះបង់របស់បងប្អូននៅទីនេះ គឺពិតជាមានតម្លៃមិនអាចកាត់ថ្លៃបានឡើយ ព្រោះបងប្អូនគឺជា "បង្អែកដ៏រឹងមាំផ្នែកខាងក្រោយ" ដែលធ្វើឱ្យយុទ្ធជនយើងនៅជួរមុខ មានទឹកចិត្តប្រយុទ្ធ និងបំពេញភារកិច្ចដោយគ្មានការបារម្ភ​ហើយបើសិនបងប្អូនមានការលំបាកអ្វីមួយសូមប្រាប់មកអាជ្ញាធរភូមិ ឃុំ ដើម្បីរួមដោះស្រាយការងារ និងកង្វល់ជូន និងសូមជឿជាក់លើការដឹកនាំរបស់រាជរដ្ឋាភិបាល ពិសេសសម្តេចតេជោ និងសម្តេចធិបតី នូវចំណាត់ការការពារសន្តិសុខ ការពារអធិបតេយ្យដែលកន្លងមកយើងធ្វើការងារការទូតច្បាប់ផងដែរ។

ក្នុងនាមអ្នកតំណាងរាស្ត្រ ឯកឧត្តម ប៊ុន ថាឫទ្ធិ​ ​ក៍បានមានប្រសាសន៍ថា នឹងបន្តគាំទ្រ និងជំរុញរាល់គោលនយោបាយទាំងឡាយណាដែលលើកកម្ពស់ជីវភាព និងគាំពារដល់កងទ័ព ក៏ដូចជាគ្រួសារកងទ័ពឱ្យកាន់តែប្រសើរឡើងហើយក្នុងពេលនេះដែរ ក៏ជាដំណាក់កាលដែលយើងមិនអាចអត់ធ្មត់តទៅទៀតបានចំពោះការឈ្លានពានរបស់ថៃ ហើយសូមកុំជឿលើការញុះញង់របស់ជនអគតិមួយចំនួន ដែលរិះរកវិធីជាមួយថៃដើម្បីបំបែកបំបាក់សាមគ្គីភាពផ្ទៃក្នុង។

ឯកឧត្តម ប៊ុន ថាឫទ្ធិ អ្នកតំណាងរាស្ត្រមណ្ឌលសៀមរាបបានមានប្រសាសន៍បន្ថែមថា ថ្ងៃនេះក្រុមការងារចុះជួយឃុំស្វាយស បាននាំយកមកជាមួយនូវគ្រឿងឧបភោគបរិភោគ សម្ភារៈប្រើប្រាស់ និងថវិកាបន្តិចបន្តួច ដែលជាទឹកចិត្តសប្បុរសធម៌ ដើម្បីជួយសម្រាលបន្ទុកជីវភាពបងប្អូនមួយគ្រា។ អំណោយទាំងនេះ ទោះបីជាមិនបានបំពេញរាល់តម្រូវការរបស់បងប្អូនទាំងអស់ក៏ពិតមែន ប៉ុន្តែវាជា "ទឹកចិត្ត គិតគូរ និងការដឹងគុណ" យ៉ាងជ្រាលជ្រៅបំផុតចេញពីបេះដូងរបស់យើងខ្ញុំទាំងអស់គ្នា ចំពោះវីរភាពរបស់គ្រួសារកងទ័ពផងដែរ ៕

ដោយ ឃុត សៅ