AKP ភ្នំពេញ ថ្ងៃទី០៣ ខែកក្កដា ឆ្នាំ២០២៦-- ឯកឧត្តម ភួន ចន្ថា អនុរដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំក្រុមការងារអន្តរក្រសួង ក្នុងនោះមានតំណាងក្រសួងសេដ្ឋកិច្ច និងហិរញ្ញវត្ថុ ចុះពិនិត្យ វាយតម្លៃ ប្រគល់-ទទួល និងបញ្ចប់សុពលភាព លើវឌ្ឍនភាពការងារហេដ្ឋារចនាសម្ព័ន្ធការពារច្រាំងទន្លេ ចំនួនពីរទីតាំង ស្ថិតក្នុងភូមិសាស្ត្រខេត្តត្បូងឃ្មុំ និងខេត្តកំពង់ចាម នាថ្ងៃទី០៣ ខែកក្កដា ឆ្នាំ២០២៦។

យោងតាមរបាយការណ៍បច្ចេកទេស ការចុះពិនិត្យ និងវាយតម្លៃជាក់ស្តែងនាពេលនេះ គឺធ្វើឡើងចំពោះគម្រោងសំខាន់ៗចំនួនពីរ រួមមាន៖ ទី១) គម្រោងការពារច្រាំងទន្លេមេគង្គ (ជំហានទី១)៖ មានប្រវែង ៣៥០ ម៉ែត្រ ស្ថិតនៅភូមិព្រែកតាហុប ឃុំជីនិក ស្រុកក្រូចឆ្មារ ខេត្តត្បូងឃ្មុំ ដោយលទ្ធផលនៃការអនុវត្តសម្រេចបាន ១០០ ភាគរយ។ ទី២) គម្រោងការពារច្រាំងទន្លេមេគង្គ (ជំហានទី២)៖ មានប្រវែង ៧០០ ម៉ែត្រ ស្ថិតនៅភូមិព្រែកស្ដី ឃុំព្រះអណ្តូង ស្រុកស្ទឹងត្រង់ ខេត្តកំពង់ចាម ដើម្បីពិនិត្យបញ្ចប់សុពលភាព ក្រោយពីបានបញ្ចប់រយៈពេលធានាគុណភាពសំណង់ចំនួន០៦ខែកន្លងមក។

សូមជម្រាបថា សំណង់ការពារច្រាំងទន្លេទាំងពីរទីតាំងនេះ មានហេដ្ឋារចនាសម្ព័ន្ធរូបវន្តរឹងមាំ ដោយបានប្រើប្រាស់បច្ចេកទេសរៀបបាវខ្សាច់ (Geotextile Bags) ប្រកបដោយគុណភាពខ្ពស់ ធន់នឹងរលក កម្លាំងទឹកបុក និងការប្រែប្រួលអាកាសធាតុ ព្រមទាំងផ្តល់នូវសោភ័ណភាពស្រស់ស្អាត ដើម្បីធានាបាននូវនិរន្តរភាពយូរអង្វែងនៃសំណង់ សម្រាប់ជាប្រយោជន៍ដ៏មានតម្លៃជូនដល់សាធារណជន និងបងប្អូនប្រជាពលរដ្ឋនៅក្នុងមូលដ្ឋាន៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)