AKP ភ្នំពេញ ថ្ងៃទី០២ ខែកក្កដា ឆ្នាំ២០២៦--នៅទីបញ្ជាការ កងការពារព្រំដែនលេខ៦០១ បានរៀបចំពិធីបើកវគ្គហ្វឹកហ្វឺនបំប៉នជំនាញការពារព្រំដែន ជូននាយទាហាន នាយទាហានរង និងពលទាហានរបស់កងការពារព្រំដែនលេខ៦០១ ឆ្នាំ២០២៦ ដែលពិធីនេះប្រព្រឹត្តទៅ ក្រោមអធិបតីភាព ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរងយោធភូមិភាគពិសេស តំណាងដ៏ខ្ពង់ខ្ពស់ ឯកឧត្ដម មេបញ្ជាការយោធភូមិភាគពិសេស កាលពីថ្ងៃទី០១ ខែកក្កដា ឆ្នាំ២០២៦។

របាយការណ៍ស្វាគមន៍ក្នុងពិធីនេះ លោកវរសេនីយ៍ឯក លន់ លុច មេបញ្ជាការ កងការពារព្រំដែនលេខ ៦០១ បានថ្លែងអំណរគុណយ៉ាងជ្រាលជ្រៅចំពោះ ឯកឧត្ដម មេបញ្ជាការរងយោធភូមិភាគពិសេស ដែលបានចំណាយពេលដ៏មានតម្លៃផ្ដល់កិត្តិយស អញ្ជើញជាអធិបតីក្នុងពិធីបើកវគ្គហ្វឹកហ្វឺនរបស់កងការពារព្រំដែនលេខ ៦០១ នាឱកាសនេះ ។

អញ្ជើញសំណេះសំណាល និងផ្ដាំផ្ញើនាឱកាសនេះ ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរងយោធភូមិភាគពិសេស បានថ្លែងកោតសរសើរចំពោះ អង្គភាពកងការពារព្រំដែនលេខ ៦០១ ដែលបានខិតខំយកចិត្តទុកដាក់បំពេញភារកិច្ចទាំងការងារស្នូល និងការកសាងជំរុំជម្រករបស់អង្គភាព ព្រមទាំងបំពេញការងារភារកិច្ចដែលថ្នាក់លើប្រគល់ជូន សម្រេចបានលទ្ធផលល្អប្រសើរជាបន្តបន្ទាប់ ។
នាក្នុងឱកាសនេះ ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរងយោធភូមិភាគពិសេស បានធ្វើការផ្ដាំផ្ញើដល់សិក្ខាកាមទាំងអស់ត្រូវខិតខំប្រឹងប្រែងយកចិត្តទុកដាក់អស់ពីកម្លាំងកាយចិត្ត ក្នុងការហ្វឹកហ្វឺនរៀនសូត្រ យកចិត្តទុកដាក់ស្ដាប់នូវគ្រូឧទ្ទេសនាមមេរៀន ទាំងនៅក្នុងថ្នាក់ក៏ដូចជានៅលើទីលានហ្វឹកហាត់ ដើម្បីបង្កើនសមត្ថភាពរបស់បុគ្គលម្នាក់ៗអោយសមស្របទៅតាមសម័យកាលបច្ចេកវិទ្យាទំនើបកម្មកងទ័ពនាពេលបច្ចុប្បន្ន ។

ទន្ទឹមនឹងនោះ ឯកឧត្ដម មេបញ្ជាការរងយោធភូមិភាគពិសេស បានផ្ដាំផ្ញើដល់សិក្ខាកាមទាំងអស់ ត្រូវគោរពវិន័យកងទ័ព គោរពបទបញ្ជាឲ្យបានម៉ឺងម៉ាត់ ពង្រឹងសាមគ្គីភាពផ្ទៃក្នុងរវាងគ្នានឹងគ្នាឲ្យបានរឹងមាំ ទោះបីក្នុងកាលៈទេសៈណាក៏ដោយ ត្រូវចេះរស់នៅជាលក្ខណៈសមូហភាព ចេះជួយទុក្ខធុរៈគ្នា ចេះពន្យល់ណែនាំគ្នា ក្នុងនាមជាមិត្តរួមអាវុធ ដើម្បីពង្រឹងគុណភាពវគ្គសិក្សា ឲ្យទទួលបានលទ្ធផលខ្ពស់ ដើម្បីការពារបូរណៈភាពទឹកដី៕

ដោយ៖ សំ សាម៉ន,ប្រភព៖ កងទ័ពជើងគោក