AKP កំពង់ធំ ថ្ងៃទី0២ ខែកក្កដា ឆ្នាំ២០២៦--លោក សាយ គឹមឡម អភិបាលស្រុកស្ទោង លើកទឹកចិត្តអ្នកផ្គត់ផ្គង់អាហារពេលព្រឹកតាមសាលាបឋមសិក្សា ត្រូវប្រើប្រាស់ផលិតផលនៅក្នុងសហគមន៍។ លោកអភិបាលស្រុកបានជំរុញលើកទឹកចិត្តដូច្នេះក្នុងឱកាលអញ្ជើញជួបសំណេះសំណាល និងទស្សនកិច្ចការទទួលទានអាហារពេលព្រឹករបស់សិស្សានុសិស្សនៃសាលាបឋមសិក្សាធ្លក ស្ថិតនៅក្នុងឃុំចំណាលើ ស្រុកស្ទោង ខេត្តកំពង់ធំ នាព្រឹកថ្ងៃទី២ ខែកក្កដា ឆ្នាំ២០២៦។

លោកអភិបាលស្រុកបានបញ្ជាក់ថា បច្ចុប្បន្ននេះបន្លែ ត្រី សាច់ ស៊ុត ដែលជាផលិតផលមានគុណភាព សុវត្ថិភាព គ្មានប្រើប្រាស់សារធាតុគីមី ដែលមិនប៉ះពាល់ដល់សុខភាពនៅក្នុងសហគមន៍តាមបណ្តាភូមិ/ឃុំ នានា ហេតុនេះអ្នកផ្គត់ផ្គង់ត្រូវតែទៅសហការដើម្បីទទួលទិញនូវផលិតផលទាំងនោះមកផ្គត់ផ្គង់ចម្អិនជាអាហារពេលព្រឹកសម្រាប់សិស្សជាប្រចាំ ដែលជាផ្នែកមួយនៃការលើកកម្ពស់សុខភាពសិក្សានិងសុខភាពសាធារណៈផងដែរ។

ជាមួយគ្នានេះលោកអភិបាលស្រុកក៏បានលើកទឹកចិត្តដល់ចុងភៅ លោកគ្រូអ្នកគ្រូ សិស្សានុសិស្សត្រូវ សហការនិងអនុវត្តន៍បានខ្ជាប់ខ្ជួននូវអនាម័យ៣ល្អ ជាពិសេសធ្វើអនាម័យសម្ភារផ្ទះបាយឱ្យបានស្អាត និងសុវត្ថិភាព ការចម្អិនម្ហូបរៀងរាល់ពេល និងអនាម័យគ្រប់ស្ថានភាពទាំងអស់នៅក្នុងរោងបាយ។ ទន្ទឹមនឹងនេះ លោក សាយ គឹមឡម អភិបាលស្រុកស្ទោង បានសន្យាធ្វើតុបាយវែងថ្មីចំនួន៦ ជូនសិស្សានុសិស្សសម្រាប់ហូបអាហារពេលព្រឹកដែលនឹងប្រគល់ជូនក្នុងពេលឆាប់ៗនេះ។

សូមបញ្ជាក់ថា សាលាបឋមសិក្សាធ្លកមានសិស្សសរុប ១៧៥នាក់ (ស្រី៨៥នាក់) គ្រូសរុប ៧នាក់ (ស្រី៤នាក់) និងមាន៧ថ្នាក់៕

ដោយ ស៊ុម វណ្ណា