AKP ព្រះសីហនុ ថ្ងៃទី១ ខែកក្កដា ឆ្នាំ២០២៦--លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ នៅថ្ងៃទី១ ខែកក្កដា ឆ្នាំ២០២៦ បានអញ្ជើញដឹកនាំកិច្ចប្រជុំ ស្តីពីផលប៉ះពាល់សម្រាប់គម្រោងបង្កើតរោងចក្រផលិតសារធាតុគីមី (ស័ង្ក សី អុកស៊ីត Zinc Oxide) របស់ក្រុមហ៊ុន អ័រលន ហ្ស៉ីន អ៉ីនដាសទ្រី ខេមបូឌា ឯ.ក. ស្រុកព្រៃនប់ និងផ្សព្វផ្សាយពីលទ្ធផលបឋម នៃការសិក្សាវាយតម្លៃហេតុផលប៉ះពាល់បរិស្ថានពេលលេញ (EIA) សម្រាប់គម្រោងបង្កើតរោងចក្រផលិតសារធាតុគីមីឧស្សាហកម្មរបស់ក្រុមហ៊ុន អ័រអូក ថេកណូឡូជី ឯ.ក. មានទីតាំងនៅស្រុកស្ទឹងហាវ ខេត្តព្រះសីហនុ ដោយមានការចូលរួមពីមន្ទីរ អង្គភាពពាក់ព័ន្ធ ។

កិច្ចប្រជុំបានធ្វើការពិភាក្សា និងវាយតម្លៃយ៉ាងយកចិត្តទុកដាក់ពីមន្ទីរ អង្គភាពពាក់ព័ន្ធនានា ដើម្បីធានាថា ការបង្កើតរោងចក្រទាំងពីរមិនមានផលប៉ះពាល់បរិស្ថាន និងសង្គមពេញលេញចំពោះប្រជាពលរដ្ឋដែលរស់នៅជុំវិញតំបន់អភិវឌ្ឍន៍របស់ក្រុមហ៊ុនទាំងពីរ។

កិច្ចប្រជុំនេះ និងពិភាក្សានេះបានផ្តោតសំខាន់លើពីរចំណុចដូចខាងក្រោម៖
១.ការពិភាក្សាពិគ្រោះយោបល់លទ្ធផលបឋម នៃការ សិក្សាវាយតម្លៃហេតុផលការប៉ះពាល់បរិស្ថានពេញលេញ (EIA) សម្រាប់គម្រោងបង្កើតរោងចក្រផលិតសារធាតុគីមី (ស័ង្ក សីអុកស៊ីត Zinc Oxide) របស់ក្រុមហ៊ុន អ័រលន ហ្ស៉ីន អ៊ីនដាសទ្រី ខេមបូឌា ឯ.ក. ដែលមានទីតាំងស្ថិតនៅតំបន់សេដ្ឋកិច្ចពិសេស អាយ អេស អាយ ក្នុងភូមិសាស្ត្រភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។

២.កិច្ចប្រជុំពិភាក្សាពិគ្រោះយោបល់ដើម្បីផ្សព្វផ្សាយពីលទ្ធផលបឋម នៃការ សិក្សាវាយតម្លៃហេតុផល ប៉ះពាល់បរិស្ថានពេញ លេញ (EIA) សម្រាប់គម្រោងបង្កើតរោងចក្រផលិតសារធាតុគីមីឧស្សា ហកម្មរបស់ក្រុមហ៊ុន អ័រអូក ថេកណូឡូជី ឯ.ក. ដែលមានទីតាំងនៅតំបន់សេដ្ឋកិច្ចពិសេស ខេមបូឌា-ស៊ីណូមេធលលើក ម៉េធៀរៀល ក្នុងភូមិសាស្ត្រភូមិឬទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ។

‎ បន្ទាប់ពីបានធ្វើការពិភាក្សាយ៉ាងល្អិតល្អន់រួចមក លោក ឡុង ឌីម៉ង់ អភិបាលរងខេត្តព្រះសីហនុ បានវាយតម្លៃខ្ពស់ចំពោះការចូលរួមបញ្ចេញមតិរបស់តំណាងមន្ទីរ អង្គភាពពាក់ព័ន្ធក្នុងការចូលរួមជំរុញ ការវិនិយោគ ស្របតាមគោលនយោបាយរបស់រាជរដ្ឋាភិបាល ក្នុងការលើកទឹកចិត្តជំរុញការវិនិយោគនៅខេត្តព្រះសីហនុ ដែលមានទុនវិនិ យោគក្រោម ៥លានដុល្លាអាមេរិក ហើយកម្មវិធីពិសេសជំរុញការវិនិយោគនេះ ត្រូវបានអ្នកវិនិយោគកំពុងយកចិត្តទុកដាក់មកធ្វើការបណ្តាក់ទុនវិនិយោគតាមរយៈអនុគណៈកម្មាធិការវិនិយោគខេត្តព្រះសីហនុ ក្នុងការជួយសម្របសម្រួលនូវឯកសារ និងការលើកលែងពន្ធថែម ទៀតផង ។ ហើយបច្ចុប្បន្នមានអ្នកវិនិយោគមកពីបរទេសនាំគ្នាមកវិនិយោគ នៅខេត្តព្រះសីហនុកាន់តែច្រើនឡើង ៕

ដោយ ងូ សុមុនី