AKPកំពង់ធំថ្ងៃទី០១ខែកក្កដាឆ្នាំឆ្នាំ២០២៦--លោកសាយ គឹមឡមអភិបាលស្រុកស្ទោង លើកទឹកចិត្តប្រជាពលរដ្ឋត្រូវត្រៀមលក្ខណៈក្នុងការបោះទៅឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំក្រោយក្នុងឱកាសអញ្ជើញជួបសំណេះសំណាលសួរសុខទុក្ខនិងចែកស្បៀងឧបត្ថម្ភដល់ពុកម៉ែបងប្អូនងាយរកហានិភ័យនៅភូមិធ្លក ឃុំចំណាលើ ស្រុកស្ទោង ខេត្តកំពង់ធំនាព្រឹកថ្ងៃទី០១ ខែកក្កដា ឆ្នាំ២០២៦។

លោកអភិបាលស្រុកបានសង្កត់ធ្ងន់ថាពុកម៉ែបងប្អូនគ្រប់រូបដែលគ្រប់អាយុ១៨ឆ្នាំ ដែលបានចុះឈ្មោះបោះឆ្នោតរួចហើយឬពុំទាន់បានទៅចុះឈ្មោះបោះឆ្នោត សូមអញ្ជើញត្រៀមខ្លួនត្រៀមលក្ខណៈ និងឯកសារអត្តសញ្ញាណពាក់ព័ន្ធសម្រាប់ទៅចុះឈ្មោះបោះឆ្នោតដែលនឹងប្រព្រឹត្តទៅនៅខែតុលាចុងឆ្នាំនេះនិងទៅពិនិត្យបញ្ជីឈ្មោះបោះឆ្នោតឱ្យបានគ្រប់ៗគ្នា ដើម្បីប្រាកដប្រជាថាយើងមានឈ្មោះសម្រាប់បោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំក្រោយនេះ។

ទន្ទឹមនឹងនេះលោកអភិបាលស្រុកបានលើកទឹកចិត្តដល់អាជ្ញាធរភូមិឃុំត្រូវយកចិត្តទុកដាក់ខ្ពស់ក្នុងការតាមដាន និងបង្កលក្ខណៈជូនពុកម៉ែបងប្អូនប្រជាពលរដ្ឋឬជូនដំណឹងឱ្យបានទូលំទូលាយដើម្បីពួកគាត់បានទៅចុះឈ្មោះបោះឆ្នោតបានគ្រប់ៗគ្នា។អាជ្ញាធរឃុំចំណា លើត្រូវយកចិត្តទុកដាក់ខ្ពស់លើជីវភាពរស់នៅប្រចាំថ្ងៃរបស់ប្រជាពលរដ្ឋនៅក្នុងមូលដ្ឋានរបស់ខ្លួន ជាពិសេសពុកម៉ែបងប្អូនដែលងាយរងហានិភ័យត្រូវតាមដាននិងធ្វើបញ្ជីបច្ចុប្បន្នភាពឱ្យបានត្រឹមត្រូវ ដើម្បីងាយស្រួលក្នុងការជួយឧបត្ថម្ភគាំទ្រពីថ្នាក់ដឹកនាំគ្រប់លំដាប់ថ្នាក់ និងក្រុមការងារចុះមូលដ្ឋានឃុំចំណាលើផងដែរ។

ឆ្លៀតក្នុងឱកាសនោះដែរលោកក៏បានណែនាំដល់បន្ថែមដល់អាជ្ញាធរឃុំចំណាលើ ត្រូវធ្វើការផ្សព្វផ្សាយណែនាំដល់ប្រជាពលរដ្ឋឱ្យបានទូលំទូលាយក្នុងការធ្វើអនាម័យបរិស្ថាន នៅតាមគេហដ្ឋានក៏ដូចជានៅតាមផ្លូវសាធារណៈ ជាពិសេសនៅតាមអមសងខាងផ្លូវតុងថ្មីដែលបានដឹកនាំកសាងដោយឯកឧត្តម ចាន់ ស៊ីណាត ប្រធានក្រុមការងារចុះមូលដ្ឋានឃុំចំណាលើ ។

សូមបញ្ជាក់ថាពុកម៉ែបងប្អូនប្រជាពលរដ្ឋមេរោងហានិភ័យចំនួន១០គ្រួសារទទួលបាននូវគ្រឿងឧបភោគបរិភោគសម្លៀកបំពាក់មួយចំនួន និងថវិកា១ម៉ឺនរៀលដោយឡែកលោកស្រី ស្តើង សុខា ដែលកំពុងព្យាបាលជំងឺនៅផ្ទះទទួលបាននូវថវិកាបន្ថែម ១៥ម៉ឺនរៀល៕

ដោយ៖ ស៊ុម វណ្ណា