AKP ‎ភ្នំពេញ ថ្ងៃទី៣០ ខែមិថុនា ឆ្នាំ២០២៦-- ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំបើកដំណើរការ (Kick-off Meeting) ដើម្បីចាប់ផ្តើមអនុវត្តគម្រោងរៀបចំផែនការមេអាងទន្លេដែលមានភាពធន់ នៅសាលប្រជុំគណៈកម្មាធិការជាតិទន្លេមេគង្គកម្ពុជា នាថ្ងៃអង្គារទី៣០ ខែមិថុនា ឆ្នាំ២០២៦។

កិច្ចប្រជុំនេះមានការអញ្ជើញចូលរួមពីសំណាក់ថ្នាក់ដឹកនាំ និងមន្ត្រីជំនាញនៃក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា អាជ្ញាធរទន្លេសាប តំណាងធនាគារអភិវឌ្ឍន៍អាស៊ី (ADB) ព្រមទាំងក្រុមទីប្រឹក្សាបច្ចេកទេសជាច្រើនរូប។

ឯកឧត្ដមរដ្ឋលេខាធិការបានបញ្ជាក់ថា កិច្ចប្រជុំនេះរៀបចំឡើងក្នុងគោលបំណងពិនិត្យរួមគ្នាលើគោលដៅ សារៈសំខាន់ និងវិសាលភាពនៃគម្រោង ព្រមទាំងពិភាក្សាផ្លាស់ប្តូរមតិយោបល់ ដើម្បីកែលម្អលើវិធីសាស្ត្របច្ចេកទេស និងយុទ្ធសាស្ត្រនានាដែលបានស្នើឡើង សម្រាប់អនុវត្តភារកិច្ចចម្បងៗរបស់ក្រុមការងារ។

អង្គប្រជុំក៏បានពិនិត្យ និងឯកភាពលើការរៀបចំរចនាសម្ព័ន្ធគ្រប់គ្រង ព្រមទាំងបានកំណត់កាលវិភាគច្បាស់លាស់ សម្រាប់ដំណាក់កាលនៃការចាប់ផ្តើមអនុវត្តគម្រោងឱ្យទទួលបានលទ្ធផលប្រកបដោយប្រសិទ្ធភាពខ្ពស់៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)