AKP បន្ទាយមានជ័យ ថ្ងៃទី៣០ ខែមិថុនា ឆ្នាំ២០២៦--លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ដល់កម្លាំងនគរបាលប៉ុស្តិ៍រដ្ឋបាលឃុំ-សង្កាត់ទាំងអស់ ត្រូវបន្តយកចិត្តទុកដាក់ខ្ពស់លើការផ្តល់សេវារដ្ឋបាលជូនប្រជាពលរដ្ឋក្នុងមូលដ្ឋានឱ្យបានល្អប្រសើរ ត្រឹមត្រូវ និងទាន់ពេលវេលា ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។

ការជំរុញ និងដាស់តឿនបែបនេះ បានធ្វើឡើងក្នុងឱកាសដែលលោកស្នងការ បានអញ្ជើញចុះត្រួតពិនិត្យការងាររដ្ឋបាលផ្ទាល់ នៅប៉ុស្តិ៍នគរបាលរដ្ឋបាលសង្កាត់កំពង់ស្វាយ នៃអធិការដ្ឋាននគរបាលក្រុងសិរីសោភ័ណ កាលពីរសៀលថ្ងៃទី២៩ ខែមិថុនា ឆ្នាំ២០២៦។ សកម្មភាពចុះពង្រឹងយន្តការការងារដល់មូលដ្ឋាននេះ គឺធ្វើឡើងដោយអនុវត្តន៍តាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិក្នុងការលើកកម្ពស់ប្រសិទ្ធភាពការងារ និងខិតជិតប្រជាពលរដ្ឋ។

អនុសាសន៍គន្លឹះរបស់លោកស្នងការ បំពេញតួនាទីជាជំនាញ មន្ត្រីនគរបាលប៉ុស្តិ៍ទាំងអស់ត្រូវយល់ដឹងច្បាស់ពីតួនាទី ភារកិច្ច និងវិន័យកងកម្លាំង។ បម្រើប្រជាពលរដ្ឋជាចម្បង រាល់ការស្នើសុំសេវារដ្ឋបាល (ដូចជាសៀវភៅស្នាក់នៅ សៀវភៅគ្រួសារ ឬលិខិតស្នាមផ្សេងៗ) ត្រូវតែធ្វើឡើងដោយតម្លាភាព លឿនរហ័ស និងគ្មានការរើសអើង។ 

ពង្រឹងជំនឿទុកចិត្ត និងសុវត្ថិភាពមូលដ្ឋាននៅក្នុងកិច្ចប្រជុំណែនាំនោះ លោកឧត្តមសេនីយ៍ត្រី សឿម សារិទ្ធ បានសង្កត់ធ្ងន់ថា ប៉ុស្តិ៍នគរបាលរដ្ឋបាលគឺជាកន្លែងរដ្ឋបាលដំបូងបង្អស់ដែលនៅជិតស្និទ្ធបំផុតជាមួយប្រជាពលរដ្ឋ។ ដូច្នេះ ឥរិយាបថ ល្បឿន និងភាពស្មោះត្រង់ក្នុងការបម្រើសេវា គឺជារឿងចាំបាច់បំផុតក្នុងការបង្កើតទំនុកចិត្តរវាងប្រជាពលរដ្ឋ និងសមត្ថកិច្ច។ 

ទន្ទឹមនឹងការងាររដ្ឋបាល លោកស្នងការក៏បានរំលឹកដល់កងកម្លាំងទាំងអស់ ត្រូវបន្តយកចិត្តទុកដាក់លើការងារសន្តិសុខ សណ្តាប់ធ្នាប់សាធារណៈ និងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ឱ្យកាន់តែមានប្រសិទ្ធភាពខ្ពស់បន្ថែមទៀត៕

ដោយឈុនសារ៉ាត