AKP ភ្នំពេញ ថ្ងៃទី២៩ ខែមិថុនា ឆ្នាំ២០២៦--ក្រុមប្រតិភូកីឡាជំនាញរបស់កម្ពុជាចំនួន៧រូប ដែលបានចូលរួមវគ្គបណ្តុះបណ្តាលស្តីពីការគ្រប់គ្រងវិស័យកីឡាប្រកួតប្រជែងសម្រាប់ប្រទេសកំពុងអភិវឌ្ឍន៍មានរយៈពេល២សប្តាហ៍ នៅសាធារណរដ្ឋប្រជាមានិតចិនបានបញ្ចប់ដោយជោគជ័យ ដោយតំណាងប្រតិភូកីឡាកម្ពុជាបានចាត់ទុកថា វគ្គបណ្តុះបណ្តាលនេះបានពង្រឹងទាំងចំណេះដឹង ទស្សនវិស័យ ជំនាញគ្រប់គ្រង និងបណ្តាញសហប្រតិបត្តិការអន្តរជាតិ ដែលជាមូលដ្ឋានសម្រាប់ការអភិវឌ្ឍវិស័យកីឡាប្រកួតប្រជែងនៅកម្ពុជាឱ្យកាន់តែមានប្រសិទ្ធភាព និងស្របតាមស្តង់ដាអន្តរជាតិផងដែរ។

នេះជាការគូសបញ្ជាក់របស់លោកស្រី ហង់ ស៊ីមន អនុប្រធានមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា និងជាអគ្គលេខាធិការ សហព័ន្ធកីឡារាំកម្ពុជាប្រាប់ទីភ្នាក់ងារសារព័ត៌មានកម្ពុជា AKP នៅយប់ថ្ងៃទី២៩ ខែមិថុនា ឆ្នាំ២០២៦ ពីប្រទេសចិន និងកំពុងធ្វើដំណើរចាកចេញពីប្រទេសចិនឆ្ពោះមកមាតុប្រទេសវិញ ដោយគ្រោងនឹងមកដល់អាកាសយានដ្ឋានអន្តរជាតិតេជោ នៅយប់ថ្ងៃទី២៩ ខែមិថុនា ឆ្នាំ២០២៦នេះ។

លោកស្រី ហង់ ស៊ីមន បានគូសបញ្ជាក់ថា វគ្គបណ្តុះបណ្តាលនេះមានអ្នកចូលរួមចំនួន៣៦រូបមកពី១០ប្រទេស ដូចជាហ្ស៊កដានី អេហ្ស៉ីប កម្ពុជា ហ្គាមប៊ី ប៊ុលហ្គារី កេនយ៉ា ស៊ូដង់ខាងត្បូង ហ្គ្រេនដា តុងហ្គោ ណាមីប៊ី។
លទ្ធផលសំខាន់ៗ រួមមាន៖ បង្កើនចំណេះដឹងអំពីគោលនយោបាយ និងប្រព័ន្ធគ្រប់គ្រងវិស័យកីឡាប្រកួតប្រជែងរបស់ប្រទេសចិន។ ស្វែងយល់ពីការរៀបចំ និងអភិវឌ្ឍអត្តពលិក ចាប់ពីការជ្រើសរើសទៅដល់ការហ្វឹកហាត់កម្រិតខ្ពស់។ រៀនពីការគ្រប់គ្រងមជ្ឈមណ្ឌលហ្វឹកហាត់ក្រុមជម្រើសជាតិ និងសហព័ន្ធកីឡា។ ទទួលបានចំណេះដឹងអំពីវិទ្យាសាស្ត្រកីឡា រួមមានការហ្វឹកហាត់ អាហារូបត្ថម្ភ វេជ្ជសាស្ត្រកីឡា និងការវិភាគទិន្នន័យ។ ស្វែងយល់ពីការរៀបចំ និងគ្រប់គ្រងព្រឹត្តិការណ៍កីឡាថ្នាក់ជាតិ និងអន្តរជាតិ។ សិក្សាពីការប្រើប្រាស់បច្ចេកវិទ្យា និងនវានុវត្តន៍ក្នុងការគ្រប់គ្រង និងអភិវឌ្ឍវិស័យកីឡា។ ចែករំលែកបទពិសោធន៍ជាមួយមន្ត្រីកីឡាពីប្រទេសផ្សេងៗ និងពង្រីកបណ្តាញកិច្ចសហប្រតិបត្តិការអន្តរជាតិ។

បន្ថែមពីលើនេះ លោកស្រីអនុប្រធានមជ្ឈមណ្ឌលជាតិហ្វឹកហ្វឺនកីឡាបានឱ្យដឹងទៀតថា ប្រតិភូកីឡាកម្ពុជាទៅទស្សនកិច្ចសិក្សានៅមជ្ឈមណ្ឌលហ្វឹកហាត់សាកលវិទ្យាល័យ និងស្ថាប័នកីឡាឈានមុខរបស់ប្រទេសចិន ដើម្បីសិក្សាពីការអនុវត្តជាក់ស្តែង។ ពង្រឹងសមត្ថភាពក្នុងការរៀបចំផែនការ និងអនុវត្តយុទ្ធសាស្ត្រអភិវឌ្ឍវិស័យកីឡាប្រកួតប្រជែងនៅប្រទេសកម្ពុជា។ អាចយកចំណេះដឹង និងបទពិសោធន៍ដែលទទួលបានមកអនុវត្តក្នុងការលើកកម្ពស់គុណភាពការគ្រប់គ្រង ការហ្វឹកហាត់ និងការអភិវឌ្ឍអត្តពលិក ដើម្បីបង្កើនសមត្ថភាពប្រកួតប្រជែងនៅថ្នាក់តំបន់ និងអន្តរជាតិ។

លោកស្រី ហង់ ស៊ីមន សង្កត់ធ្ងន់ថា វគ្គបណ្តុះបណ្តាលនេះបានពង្រឹងទាំងចំណេះដឹង ទស្សនវិស័យ ជំនាញគ្រប់គ្រង និងបណ្តាញសហប្រតិបត្តិការអន្តរជាតិ ដែលជាមូលដ្ឋានសម្រាប់ការអភិវឌ្ឍវិស័យកីឡាប្រកួតប្រជែងនៅកម្ពុជាឱ្យកាន់តែមានប្រសិទ្ធភាព និងស្របតាមស្តង់ដាអន្តរជាតិ។ ក្នុងនាមប្រតិភូកីឡាកម្ពុជា លោកស្រីបានថ្លែងអំណរគុណយ៉ាងជ្រាលជ្រៅចំពោះក្រសួងអប់រំ យុវជន និងកីឡាកម្ពុជា និងគណៈកម្មាធិការជាតិអូឡាំពិកកម្ពុជា ចំពោះការគាំទ្រ ការលើកទឹកចិត្ត និងការជឿទុកចិត្តជាបន្តបន្ទាប់ក្នុងការផ្តល់ជូននូវឱកាសដ៏សំខាន់នេះ។

លោកស្រីក៏ថ្លែងអំណរគុណយ៉ាងជ្រាលជ្រៅចំពោះសាស្ត្រាចារ្យ អ្នកជំនាញ អ្នករៀបចំ និងបុគ្គលិកទាំងអស់ចំពោះការខិតខំប្រឹងប្រែង ការលះបង់ និងបដិសណ្ឋារកិច្ចដ៏កក់ក្តៅសម្រាប់កម្មវិធីទាំងមូល។ យើងសង្ឃឹមយ៉ាងស្មោះស្ម័គ្រថា មិត្តភាព និងកិច្ចសហប្រតិបត្តិការដ៏រឹងមាំរវាងរដ្ឋាភិបាលនៃសាធារណរដ្ឋប្រជាមានិតចិន និងរាជរដ្ឋាភិបាកកម្ពុជានឹងបន្តរីកចម្រើនកាន់តែរឹងមាំ និងនៅតែជាភាពជាដៃគូដ៏យូរអង្វែងនាពេលអនាគត ជាពិសេស តាមរយៈវិស័យកីឡា និងទំនាក់ទំនង កិច្ចសហប្រតិបត្តិការអន្តរជាតិឱ្យកាន់តែរឹងមាំនាពេលអនាគត។

គួរបញ្ជាក់ថា ការចូលរួមរបស់មន្ត្រីកីឡាកម្ពុជា ក្នុងវគ្គនៅប្រទេសចិន នាពេលនេះ ដោយមានកិច្ចសហប្រតិបត្តិការរវាងក្រសួងសេដ្ឋកិច្ច និងពាណិជ្ជកម្មនៃសាធារណរដ្ឋប្រជាមានិតចិន និងគណៈកម្មាធិការជាតិអូឡាំពិកកម្ពុជា (NOCC)។ គណ:ប្រតិភូកម្ពុជាដឹកនាំដោយលោក ផាត់ បញ្ញាសុជាតក៍ លោកស្រី ហង់ ស៊ីមន អនុប្រធានមជ្ឈមណ្ឌលជាតិហ្វឹកហ្វឺនកីឡា និងលោកស្រី ចៅ សុគន្ធី អនុប្រធាននាយកដ្ឋានកីឡាជំនាញ និងកីឡាមហាជន ព្រមទាំងមន្រ្តីសហព័ន្ធកីឡាជាតិផងដែរ៕

ដោយ ហេង ណាលីន (រូបភាព៖ មន្ត្រីកីឡាកម្ពុជា)