AKP ឧត្តរមានជ័យ ថ្ងៃទី២៩ ខែមិថុនា ឆ្នាំ២០២៦--វេទិកាផ្សព្វផ្សាយ និងពិគ្រោះយោបល់ ជាយន្តការប្រជាធិបតេយ្យដ៏មានសារៈសំខាន់នៅថ្នាក់ក្រោមជាតិ ដើមី្បផ្តល់ឱកាសជូនបងប្អូនប្រជាពលរដ្ឋបានជួបជុំ សាកសួរ ដេញដោល និងលើកឡើងនូវរាល់កង្វល់ សំណើ សំណូមពរផ្ទាល់មាត់ ជូនដល់ថ្នាក់ដឹកនាំក្រុង ដើមី្បរួមគ្នាដោះស្រាយ និងតម្រង់ទិសផែនការអភិវឌ្ឍន៍មូលដ្ឋានឱ្យចំតម្រូវការជាក់ស្តែង។ នេះជាប្រសាសន៍របស់ លោកស្រី អាត ស្រីមុំ ប្រធានក្រុមប្រឹក្សាក្រុងសំរោង ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុងសំរោង ឆ្នាំ២០២៦ នាព្រឹកថ្ងៃចន្ទថ្ងៃទី២៩ ខែមិថុនា ឆ្នាំ២០២៦នេះ នៅសាលាសង្កាត់បន្សាយរាក់ ក្រុងសំរោង ខេត្តឧត្តរមានជ័យ។

វេទិកាដ៏មានសារៈសំខាន់នេះមានការអញ្ជើញចូលរួមពីសំណាក់ លោក ផុន ចាន់និល អភិបាល នៃគណៈអភិបាលក្រុងសំរោង លោក លោកស្រីសមាជិកក្រុមប្រឹក្សាក្រុង, លោក លោកស្រីអភិបាលរងក្រុង, លោកនាយក នាយករងរដ្ឋបាល, ថ្នាក់ដឹកនាំការិយាល័យ អង្គភាពជំនាញជុំវិញក្រុង, ក្រុមប្រឹក្សាសង្កាត់, អាជ្ញាធរមូលដ្ឋានភូមិ, តំណាងអង្គភាពពាក់ព័ន្ធ ព្រមទាំងបងប្អូនប្រជាពលរដ្ឋ សរុបចំនួន១៤៦នាក់។

លោកស្រីមានប្រសាសន៍បន្តថា នៅក្នុងអង្គវេទិកា ថ្នាក់ដឹកនាំរដ្ឋបាលក្រុងសំរោង បានធ្វើការផ្សព្វផ្សាយជាសាធារណៈនូវរាល់សមិទ្ធផលធំៗ លទ្ធផលបច្ចេកទេស និងវឌ្ឍនភាពការងារដែលរដ្ឋបាលក្រុងសម្រេចបាននាពេលកន្លងមក ដើមី្បបង្ហាញពីតម្លាភាព និងគណនេយ្យភាពចំពោះមុខពលរដ្ឋឱ្យបានទូលំទូលាយ ដោយផ្តោតការពិភាក្សាយ៉ាងហ្មត់ចត់លើវិស័យសំខាន់ៗរួមមាន៖ ការពង្រឹងគុណភាពនៃការផ្តល់សេវាសាធារណៈ ការងារគ្រប់គ្រងបរិស្ថាន អនាម័យ និងសំរាម ព្រមទាំងការងារសន្តិសុខ ភូមិ-ឃុំមានសុវត្ថិភាព និងសណ្តាប់ធ្នាប់សង្គម។

សូមបញ្ជាក់ថា វេទិកាបានប្រព្រឹត្តទៅក្នុងបរិយាកាសស្និទ្ធស្នាល បើកចំហ និងប្រកបដោយស្មារតីទទួលខុសត្រូវខ្ពស់ ដោយបងប្អូនប្រជាពលរដ្ឋ និងតំណាងសហគមន៍បានចូលរួមឡើងថ្លែងមតិយោបល់ ដេញដោល និងដាក់ជូននូវរាល់សំណើ សំណូមពរនានាយ៉ាងផុសផុល។ រាល់មតិយោបល់ និងសំណើទាំងនោះ លោកស្រីប្រធានក្រុមប្រឹក្សា និងលោកអភិបាលក្រុងសំរោង ព្រមទាំងប្រធានការិយាល័យជំនាញ ធ្វើការបកស្រាយ ពន្យល់ភ្លាមៗ និងបានកត់ត្រាទទួលយកដោះស្រាយជាជំហានៗ ទៅតាមសមត្ថកិច្ច និងលទ្ធភាពជាក់ស្តែង ព្រមទាំងត្រៀមដាក់បញ្ចូលទៅក្នុងផែនការ និងកម្មវិធីវិនិយោគអភិវឌ្ឍន៍ក្រុងសម្រាប់ឆ្នាំបន្ទាប់ ៕

ដោយ ទិត ស្រ៊