AKP ភ្នំពេញ ថ្ងៃទី២៩ ខែមិថុនា ឆ្នាំ២០២៦–ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រឹកថ្ងៃទី២៩ ខែមិថុនា ឆ្នាំ២០២៦ បានដឹកនាំកិច្ចប្រជុំស្ដីពីការធ្វើទំនើបកម្មសៀវភៅសិក្សាគោល និងនីតិវិធីលក្ខណៈបច្ចេកទេសក្នុងការជ្រើសរើសក្រុមហ៊ុនអន្តរជាតិអភិវឌ្ឍសៀវភៅសិក្សាគោល ដោយកិច្ចប្រជុំ បានពិនិត្យ ពិភាក្សាយ៉ាងលម្អិតលើរបាយការណ៍នៃការវាយតម្លៃក្រុមហ៊ុនអន្តរជាតិដែលត្រូវតាក់តែង បោះពុម្ពសៀវភៅ និងវឌ្ឍនភាពនៃការធ្វើទំនើបកម្មសៀវភៅសិក្សាគោល ដែលក្នុងនោះបានគូសរំលេចនូវចំណុចគន្លឹះមួយចំនួនដូចខាងក្រោម៖

ការលើកកម្ពស់គុណភាពសៀវភៅសិក្សាគោល៖ ដើម្បីធ្វើបច្ចុប្បន្នភាព និងធ្វើទំនើបកម្មខ្លឹមសារ វិធីសាស្ត្របង្រៀន និងរូបរាងរចនានៃសៀវភៅសិក្សាគោលឱ្យស្របតាមស្តង់ដារអន្តរជាតិ និងការវិវត្តនៃបច្ចេកវិទ្យាអប់រំទំនើប។ ការធានាតម្លាភាព និងស្តង់ដារក្នុងការជ្រើសរើសដៃគូ៖ ដើម្បីពិភាក្សា និងកំណត់ឱ្យបានច្បាស់លាស់នូវនីតិវិធី លក្ខខណ្ឌ និងលក្ខណៈបច្ចេកទេសក្នុងការជ្រើសរើសក្រុមហ៊ុនអន្តរជាតិដែលមានបទពិសោធន៍ និងជំនាញខ្ពស់មកទទួលបន្ទុកអភិវឌ្ឍសៀវភៅសិក្សាគោលនេះ។ ឆ្លើយតបនឹងតម្រូវការទីផ្សារការងារសកល៖ ដើម្បីធានាថា សៀវភៅសិក្សាថ្មីៗដែលនឹងត្រូវផលិតឡើងអាចជួយបណ្ដុះបណ្ដាលសិស្សានុសិស្សកម្ពុជាឱ្យមានចំណេះដឹង បំណិន និងសមត្ថភាពអាចប្រកួតប្រជែងបានទាំងក្នុងកម្រិតតំបន់ និងពិភពលោក។

បន្ទាប់ពីស្ដាប់បទបង្ហាញស្ដីពីនីតិវិធីលក្ខណៈបច្ចេកទេស ក្នុងការជ្រើសរើសក្រុមហ៊ុនអន្តរជាតិអភិវឌ្ឍសៀវភៅសិក្សាគោល និងកិច្ចពិភាក្សារួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍គន្លឹះមួយចំនួនជូនក្រុមការងារដើម្បីអនុវត្តការងារបន្ត ដូចជា សូមចុះទៅពិនិត្យដោយផ្ទាល់ដល់តាមសាលារៀន ដើម្បីស្វែងយល់លម្អិតពីស្ថានភាព និងប្រសិទ្ធភាពនៃការអនុវត្តកម្មវិធីសិក្សាបច្ចុប្បន្នត្រូវជួបពិភាក្សាពិនិត្យឱ្យលម្អិត និងគ្រប់ជ្រុងជ្រោយពីគ្រប់សមាសភាពពាក់ព័ន្ធទាំងបឋមសិក្សា មធ្យមសិក្សា ដោយផ្ដោតលើវិធីសាស្ត្របង្រៀន ការបណ្ដុះបណ្ដាលគ្រូ និងការឆ្លើយតបនឹងការលើកកម្ពស់លទ្ធផលតេស្ត PISA ត្រូវកំណត់ស្តង់ដារសៀវភៅឱ្យច្បាស់ ដោយសូមស្នើឱ្យភាគីខាងក្រុមហ៊ុនផ្ដល់ជូនគំរូសៀវភៅដែលគេធ្លាប់សរសេរ និងបោះពុម្ពពីមុនមក សូមផ្ដោតលើវិធីសាស្ត្របង្រៀន និងប្រព័ន្ធបណ្ដុះបណ្ដាលគ្រូ ត្រូវមានភ្ជាប់ជាមួយសៀវភៅណែនាំគ្រូ តម្លៃ (ទាំងតម្លៃនៃការតាក់តែង និងការបោះពុម្ពសូមរៀបចំជាយុទ្ធសាស្ត្រ ដើម្បីគាំទ្រដល់ការកែលម្អលទ្ធផលតេស្ត PISA និងត្រូវដាក់បញ្ចូលវិធីសាស្ត្របង្រៀនដូចនៅសាលារៀនជំនាន់ថ្មី (NGS)៕

ដោយ៖ ចាន់ សុភឿន (ប្រភព៖ ក្រសួងអប់រំ)