AKP ភ្នំពេញ ថ្ងៃទី២៩ ខែមិថុនា ឆ្នាំ២០២៦--ឯកឧត្តមបណ្ឌិត សៅ ជីវ័ន្ត រដ្ឋលេខាធិការ ក្រសួងអភិវឌ្ឍន៍ជនបទ អមដំណើរដោយឯកឧត្តមបណ្ឌិត លឹម អ៊ីវ អនុរដ្ឋលេខាធិការកាលពីថ្ងៃសុក្រទី២៦ខែមិថុនា ឆ្នាំ២០២៦បានដឹកនាំគណ:ប្រតិភូអន្តរ ក្រសួងរួមមាន ក្រុមការងារបច្ចេកទេសនៃនាយកដ្ឋានផ្លូវលំជនបទ ក្រុមការងារ គ.ត.វ និងតំណាងក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីលោកប្រធានមន្ទីរអភិវឌ្ឍន៍ជនបទខេត្តកំពង់ធំបានចុះត្រួតពិនិត្យប្រគល់-ទទួល ១០០% និងប្រគល់-ទទួលបញ្ចប់សុពលភាពសម្រាប់ការងារលើកកម្រិតគុណភាពនិងការងារស្តារឡើងវិញផ្លូវ-ស្ពានចំនួន២គម្រោង៖

-គម្រោងទី១៖ ប្រគល់ទទួល១០០%ការងារលើកកម្រិតគុណភាពផ្លូវ ក្រាលកៅស៊ូពីរជាន់ (DBST)ចំនួន១ខ្សែ ប្រវែង ១១០០ម ទទឹង ៦ម និងចិញ្ចើមផ្លូវសងខាងក្រាលដីល្បាយក្រួស ទទឹងម្ខាងៗ ១,៥ម និងសំណង់សិល្បការ្យមួយចំនួន នៅភូមិបន្ទាយស្ទោង ទៅភូមិចំបក់បញ្ញា ឃុំបន្ទាយស្ទោង ខេត្តកំពង់ធំ។

-គម្រោងទី២៖ បញ្ចប់សុពលភាពការងារស្តារឡើងវិញផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង២០០០ម ទទឹង៦ម ចិញ្ចើមផ្លូវសងខាងក្រាលដីល្បាយក្រួស ទទឹងម្ខាងៗ ០,៥ម និងសំណង់សិល្បការ្យមួយចំនួន ស្ថិតនៅភូមិព្រៃគុយ ឃុំព្រៃគុយ ទៅភូមិក្រចាប់ សង្កាត់អាចារ្យលាក់ ស្រុកកំពង់ស្វាយ ខេត្តកំពង់ធំ។ អនុវត្តដោយនាយកដ្ឋានវិស្វកម្ម ក្រសួងការពារជាតិ។

ឯកឧត្តមបណ្ឌិតនិងក្រុមការងារ បានជួបសំណេះសំណាលជាមួយបងប្អូនប្រជាពលរដ្ឋដែលរស់នៅតាមបណ្តោយផ្លូវ និងបានសំណូមពរឱ្យអាជ្ញាធរនិងប្រជាពលរដ្ឋទាំងអស់ឱ្យចូលរួមថែទាំសមិទ្ធផលផ្លូវនិងស្ពាននៅក្នុងមូលដ្ឋានកុំឱ្យមានរថយន្តដឹកទំនិញលើសចំណុះធ្វើចរាចរណ៍លើផ្លូវ ដើម្បីរក្សាគុណភាពផ្លូវនិងស្ពានឱ្យប្រើប្រាស់បានគង់វង្សយូរអង្វែង។

បន្ទាប់មកគណៈកម្មការអន្តរក្រសួងបានប្រជុំពិភាក្សាជា មួយអ្នកទទួលការនិងអ្នកបច្ចេកទេស ដោយបានឯកភាពទទួលយកលទ្ធផលការងារ ១០០% ចំពោះគម្រោងទី១ និងបញ្ចប់សុពលភាពចំពោះគម្រោងទី ២ ទន្ទឹមនោះដែរគណៈកម្មការក៏បានសំណូមពរដល់អ្នកទទួលការធ្វើការត្រួតពិនិត្យផ្លូវនិងស្ពានខាងលើឲ្យបានល្អដើម្បីឲ្យមានគុណភាពសោភណ្ឌភាពនិងសុវត្ថិភាពក្នុងរយ:ពេល១២ខែបន្តទៀតទៅតាមកិច្ចសន្យា៕

ដោយ៖ ពេជ្រ សំអឿន(ប្រភព៖ក្រសួងអភិវឌ្ឍន៍ជនបទ)