AKP ភ្នំពេញ ថ្ងៃទី២៩ ខែមិថុនា ឆ្នាំ ២០២៦--ឯកឧតម លី ធុជ បានអំពាវនាវដល់ប្រទេសទាំងអស់ រើសយកភាពជាដៃគូ និងកិច្ចសហប្រតិបត្តិការជាជាងការប្រឈមមុខដាក់គ្នា ។ 

ឯកឧត្តម លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីន បានអំពាវនាវបែបនេះ ខណៈឯកត្ដម ចូលរួមជាវាគ្មិន និងចែករំលែកអំពីបទពិសោធន៍កម្ពុជា នៅក្នុងកិច្ចពិភាក្សាកម្រិត ខ្ពស់ក្រោមប្រធានបទAsia-Pacific in Motion: New Powers, Old Rivalries ដែលប្រព្រឹត្តទៅក្នុងអំឡុងពេលនៃវេទិកា Dubrovnik Forum ២០២៦  កាលពីរសៀលថ្ងៃទី២៨ ខែមិថុនា ឆ្នាំ២០២៦ ។ 

ឯកឧត្តម លី ធុជ បានបញ្ជាក់ថា ស្វ័យភាពការសន្ទនា និងច្បាប់អន្តរជាតិ គឺមានសារៈសំខាន់សម្រាប់សន្តិភាព និងស្ថិរ ភាពនៅក្នុងតំបន់អាស៊ី-ប៉ាស៊ីហ្វិក ខណៈពេលមានការកើន ឡើងនៃពហុប៉ូល។ ផ្អែកលើបទពិសោធន៍កម្ពុជា ការប្រកួតប្រជែងរវាងមហាអំណាច មិនគួរធ្វើឱ្យប្រទេសតូចៗខាតបង់ឡើយ។ ប្រទេសកម្ពុជាបានរក្សាឯករាជ្យភាពរបស់ខ្លួន ដោយ រក្សាភាពជាដៃគូជាមួយប្រទេសនានាប្រកបដោយតុល្យភាពផ្អែកលើការគោរពនិងផ្តល់ផលប្រយោជន៍គ្នាទៅវិញទៅមក និងផលប្រយោជន៍ជាតិ។

ឯកឧត្តមទេសរដ្ឋមន្ត្រី លី ធុជ ក៏បានលើកឡើងអំពីតួនាទីសំខាន់របស់អាស៊ាន ក្នុងការរក្សាបានការសន្ទនារវាងប្រទេសមានឥទ្ធិពលក្នុងតំបន់ និងគូសបញ្ជាក់ថា វិធានការការទូត និងកសាងទំនុកចិត្ត គឺជាឧបករណ៍សំខាន់ក្នុងការទប់ស្កាត់ជម្លោះ កសាងទំនុកចិត្ត និងបង្កើនភាពធន់របស់តំបន់។ 

ឯកឧត្តម លី ធុជ ក៏បានអំពាវនាវដល់ប្រទេសទាំងអស់រើសយកភាពជាដៃគូនិងកិច្ចសហប្រតិបត្តិការជាជាងការប្រឈមមុខដាក់គ្នា និងបានគូសបញ្ជាក់ថា ភាពរីកចម្រើនលូតលាស់របស់តំបន់អាស៊ី-ប៉ាស៊ីហ្វិក មិនគួរត្រូវបានចាត់ទុកថាជាការគំរាមកំហែងនោះទេ ប៉ុន្តែគួរចាត់ទុកជាឱកាសដ៏ល្អ សម្រាប់ភាពជាដៃគូ សន្តិភាព និងវិបុលភាពរួមគ្នា ៕

ដោយ៖ សួស សំរិត