AKP បន្ទាយមានជ័យ ថ្ងៃទី២៨ ខែមិថុនា ឆ្នាំ២០២៦--

ការបង្កើតថ្មី និងការកែច្នៃផ្នែកបច្ចេកវិទ្យាយានយន្តរបស់ប្រជាពលរដ្ឋខ្មែរនៅតាមសហគមន៍ បាននិងកំពុងក្លាយជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចមូលដ្ឋាន។ ជាក់ស្តែង កាលពីរសៀលថ្ងៃសៅរ៍ ទី២៧ ខែមិថុនា ឆ្នាំ២០២៦ ឯកឧត្ដម កែ គឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាឧត្ដមប្រឹក្សាផ្ទាល់ព្រះមហាក្សត្រ បានដឹកនាំក្រុមការងារ និងអាជ្ញាធរមូលដ្ឋាន ចុះជួបសំណេះសំណាល និងពិនិត្យផ្ទាល់ដល់សិប្បកម្មផលិតត្រីចក្រយានយន្តអគ្គិសនី និងគ្រឿងយន្តកសិកម្មរបស់លោក ឈួន សុផាន់ ស្ថិតនៅភូមិចំការតាដោក ឃុំបន្ទាយនាង ស្រុកមង្គលបូរី។

នៅក្នុងឱកាសចុះពិនិត្យខ្សែសង្វាក់ផលិតកម្មនោះ ឯកឧត្ដម កែ គឹមយ៉ាន បានសម្តែងនូវការកោតសរសើរយ៉ាងក្រៃលែងចំពោះភាពច្នៃប្រឌិត និងការខិតខំប្រឹងប្រែងរបស់លោក ឈួន សុផាន់ ដែលបានអភិវឌ្ឍខ្លួនពីម្ចាស់សហគ្រាសម៉ាស៊ីនច្រូតស្រូវ និងគ្រឿងបន្លាស់ មកជាម្ចាស់សិប្បកម្មផលិតត្រីចក្រយានយន្តដើរដោយថាមពលអគ្គិសនី ដ៏មានសក្តានុពលក្នុងតំបន់។

«ការច្នៃប្រឌិតបង្កើតត្រីចក្រយានយន្តអគ្គិសនីនេះ មិនត្រឹមតែបង្ហាញពីសមត្ថភាពដ៏ខ្ពស់របស់កូនខ្មែរប៉ុណ្ណោះទេ ប៉ុន្តែវាបានរួមចំណែកយ៉ាងសំខាន់ក្នុងការកាត់បន្ថយការចំណាយ លើកកម្ពស់វិស័យដឹកជញ្ជូន និងស្របតាមនិន្នាការសកលក្នុងការការពារបរិស្ថានតាមរយៈការប្រើប្រាស់ថាមពលបៃតង»។នេះជា ប្រសាសន៍បញ្ជាក់របស់ឯកឧត្ដម កែ គឹមយ៉ាន។

ដើម្បីជាការលើកទឹកចិត្ត និងជំរុញឱ្យសហគ្រាសក្នុងស្រុកមួយនេះកាន់តែមានការរីកចម្រើន ឯកឧត្ដមបានផ្តល់អនុសាសន៍ និងការណែនាំសំខាន់ៗមួយចំនួនការបន្តស្រាវជ្រាវ និងអភិវឌ្ឍន៍  ជំរុញឱ្យម្ចាស់សិប្បកម្មបន្តអភិវឌ្ឍគុណភាព បច្ចេកវិទ្យា និងរូបរាងរបស់យានយន្តឱ្យកាន់តែទំនើប មានសុវត្ថិភាពខ្ពស់ និងឆ្លើយតបទៅនឹងតម្រូវការទីផ្សារជាក់ស្តែង។

ឯកឧត្តមបានធ្វើការណែនាំឱ្យអាជ្ញាធរគ្រប់លំដាប់ថ្នាក់ បង្កលក្ខណៈងាយស្រួល ជួយសម្របសម្រួល និងគាំទ្រផ្នែកផ្លូវច្បាប់ ក៏ដូចជាការផ្សព្វផ្សាយ ដើម្បីឱ្យផលិតផលក្នុងស្រុកនេះទទួលបានការស្គាល់កាន់តែទូលំទូលាយ។ការពង្រីកសិប្បកម្មបែបនេះ នឹងជួយបង្កើតឱកាសការងារ បណ្តុះបណ្តាលជំនាញបច្ចេកទេសដល់យុវជននៅក្នុងមូលដ្ឋានផ្ទាល់ មិនឱ្យចំណាកស្រុក។

ជាការឆ្លើយតប លោក ឈួន សុផាន់ ម្ចាស់សហគ្រាស បានសម្តែងនូវក្តីរំភើប និងដឹងគុណយ៉ាងជ្រាលជ្រៅចំពោះ ឯកឧត្ដម កែ គឹមយ៉ាន និងក្រុមការងារ ដែលបានចំណាយពេលវេលាដ៏មានតម្លៃចុះមកសួរសុខទុក្ខ និងផ្តល់ការណែនាំដ៏មានសារៈសំខាន់នេះ។ លោកបានប្តេជ្ញាចិត្តថានឹងបន្តខិតខំប្រឹងប្រែងអភិវឌ្ឍន៍សិប្បកម្មនេះឱ្យកាន់តែរីកចម្រើន ដើម្បីបម្រើដល់តម្រូវការរបស់ប្រជាពលរដ្ឋ និងចូលរួមលើកកម្ពស់សេដ្ឋកិច្ចជាតិ។

ការចុះជួបសំណេះសំណាលនេះ មិនត្រឹមតែជាការផ្តល់កម្លាំងចិត្តដល់សហគ្រិនក្នុងស្រុកប៉ុណ្ណោះទេ ប៉ុន្តែវាក៏ជាសញ្ញាណវិជ្ជមានមួយបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំ ចំពោះការអភិវឌ្ឍវិស័យសហគ្រាសធុនតូច និងមធ្យម (SMEs) ដែលជាឆ្អឹងខ្នងនៃសេដ្ឋកិច្ចជាតិ ដើរទន្ទឹមគ្នានឹងការដើរឆ្ពោះទៅរកការប្រើប្រាស់ថាមពលស្អាតនាពេលអនាគត៕

ដោយ ឈុន សារ៉ាត