AKP ភ្នំពេញ ថ្ងៃទី២៧ ខែមិថុនា ឆ្នាំ២០២៦--សម្ដេចមហាបរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការដោះស្រាយបញ្ហា ប្រទេសជាតិ និងប្រជាជន ទឹកដី ឯករាជ្យភាពជាតិ អាយុជីវិតរបស់ប្រជាជនគឺជារឿងអាទិភាពរបស់រាជរដ្ឋាភិបាល។

ការថ្លែងលើកពីចំណុចអាទិភាពនេះ ធ្វើឡើងក្នុងកម្មវិធីសំណេះសំណាល មហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរ ទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា នៅមជ្ឈមណ្ឌលសាលសន្និបាត និងពិព័រណ៍កោះពេជ្រ នាព្រឹកថ្ងៃទី២៧ ខែមិថុនា ឆ្នាំ២០២៦នេះដោយសម្ដេចធិបតី បានអះអាងថា ការពារទឹកដី គឺត្រូវតែការពារ ហើយការចរចាត្រូវតែធ្វើទៅមុខដោយប្រើប្រាស់ច្បាប់អន្តរជាតិឱ្យអស់លទ្ធភាព។

បើតាមសម្ដេចធិបតី ប្រសិនបើវៃគ្នា ទោះ៣០ឆ្នាំ ក៏មិនចប់ដែរ ព្រោះវៃទៅវៃមក ដូច្នេះហើយទើបរាជរដ្ឋាភិបាលរក្សាស្ថានភាពឱ្យត្រជាក់ ដើម្បីបានសេចក្ដីសុខ ទុកឱកាសពង្រឹងសេដ្ឋកិច្ច និងជួយដល់ប្រជាពលរដ្ឋ​ ជៀសវាងបង្កើនការលំបាកដល់ប្រជាពលរដ្ឋ។
ក្រៅពីនោះ រាជរដ្ឋាភិបាលបានប្ដេជ្ញាដោះស្រាយបញ្ហាជាច្រើនទៀត ជាពិសេសវះកាត់ការឆបោកប្រព័ន្ធបច្ចេកវិទ្យា ដើម្បីលើកកិត្ដិយសប្រទេសកម្ពុជាលើឆាកអន្តរជាតិ៕

ដោយ៖ គង់ សិរីរ័ត្ន, រូបថត៖ គល់ រ៉េននី