AKP កំពង់ស្ពឺ ថ្ងៃទី២៥ ខែមិថុនា ឆ្នាំ២០២៦--ក្រុមហ៊ុនដំឡើងគ្រឿងចក្រសំណង់ដ៏ធំមួយរបស់ធុរៈជននៃប្រទេសវៀតណាមបានបង្ហាញមហិច្ឆតាបើករោងចក្រដំឡើងគ្រឿងចក្រសំណង់នៅក្នុងខេត្តកំពង់ស្ពឺ ក្រោមទុនវិនិយោគរាប់លានដុល្លារសហរដ្ឋអាមេរិក។ នេះបើតាមប្រសាសន៍របស់លោក ចាន់ ហ៊ុន អគ្គនាយកក្រុមហ៊ុន តាធីផាត ខូអិលធីឌី(TA THI PHAT Co.,LTD) ក្នុងជំនួបជាមួយឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ។

លោក ចាន់ ហ៊ុន អគ្គនាយកក្រុមហ៊ុន តា ធី ផាត ខូអិលធីឌី(TA THI PHAT Co.,LTD)ប្រចាំកម្ពុជាបានមានប្រសាសន៍ថា ធុរៈជនរបស់ប្រទេសវៀតណាមគឺមានរោងចក្រដំឡើងគ្រឿងចក្រសំណង់ដ៏ធំនៅក្នុងទីក្រុងហាណូយ ក្រោមទុនវិនិយោគប្រមាណជា៧៥០លានដុល្លាសហរដ្ឋអាមេរិក។ក្រោយពីដំណើរការបានជោគជ័យលើជំនួញនេះ ធុរៈជនវៀតណាមមានមហិច្ឆតាពង្រីករោងចក្របន្ថែមដោយជ្រើសយកប្រទេសកម្ពុជា ជាបុត្រសម្ព័ន្ធ ពិសេសគឺខេត្តកំពង់ស្ពឺជាខេត្តគោលដៅ ហើយសម្រាប់រោងចក្របុត្រសម្ព័ន្ធនេះក្រុមហ៊ុនបានគ្រោងទុនវិនិយោគរាប់លានដុល្លារផងដែរ។

លោក ចាន់ ហ៊ុន ក៏បានលើកឡើងផងដែរថា ការជ្រើសយកប្រទេសកម្ពុជា ពិសេសខេត្តកំពង់ស្ពឺជាខេត្តគោលដៅគឺដោយសារតែមើលឃើញកត្តានៃសុខសន្តិភាព ស្ថេរភាពនយោបាយ ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី និងដោយមើលឃើញពីសក្តានុពលនៃខេត្តនេះក្នុងការដំឡើងរោងចក្រ។

ក្នុងជំនួបនោះដែរ លោក ចាន់ ហ៊ុន អគ្គនាយកក្រុមហ៊ុនប្រចាំកម្ពុជាក៏បានបញ្ជាក់ផងដែរថា គម្រោងរបស់ក្រុមហ៊ុននិងចាប់ដំណើរការនៅដើមឆ្នាំ២០២៧លើផ្ទៃដីប្រមាណជាង២ហិកតាជាជំហ៊ានដំបូង ដោយការដាក់តាំងលក់គ្រឿងចក្រដែលមានស្រាប់ដំឡើងនៅប្រទេសវៀតណាម ដោយអតិថិជនអាចរំលោះ ឬជួល ហើយក្រោយមកក្រុមហ៊ុននឹងដាក់រោងចក្រដើម្បីដំឡើងគ្រឿងចក្រទាំងនេះ នៅក្នុងខេត្តកំពង់ស្ពឺជាជំហ៊ានទី២ ដែលអាចផ្តល់ឱកាសការងារយ៉ាងច្រើនដល់ប្រជាពលរដ្ឋក្នុងខេត្តនេះ។

ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានសម្តែងនូវការត្រេកអរ និងស្វាគមន៍នូវវត្តមានក្រុមហ៊ុន តា ធី ផាត ខូអិលធីឌី(TA THI PHAT Co.,LTD)នៅលើទឹកដីខេត្តកំពង់ស្ពឺ។ក្នុងនាមអាជ្ញាធរ ពិសេសរដ្ឋបាលខេត្ត និងចូលរួមសម្របសម្រួលយ៉ាងពេញទំហឹងដល់ដំណើរការរបស់ក្រុមហ៊ុន ដែលមកផ្តល់ឱកាសការងារដល់ប្រជាពលរដ្ឋក្នុងខេត្តនេះ ជាងនេះគឺបានចូលរួមចំណែកក្នុងការអភិវឌ្ឍន៍ខេត្តកំពង់ស្ពឺឱ្យកាន់តែរីកចម្រើនបន្ថែមទៀត៕

ដោយ ម៉ែន ប៊ុនធីម