AKP ព្រះសីហនុ ថ្ងៃទី២៥ ខែមិថុនា ឆ្នាំ២០២៦-- ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ នារសៀលថ្ងៃព្រហស្បតិ៍ទី២៥ ខែមិថុនា ឆ្នាំ២០២៦នេះបានអញ្ជើញទទួលអំណោយទឹកបរិសុទ្ធពីក្រុមហ៊ុនស្ត្រីងធមជាតិ ជីវសា គឺជាទឹកស្ត្រីងធម្មជាតិចំនួន ៥០០កេស ជូនរដ្ឋបាលខេត្តព្រះសីហនុ សម្រាប់ប្រើប្រាស់ក្នុងការងារសង្គម និងការងារមនុស្សធម៌នៅខេត្តព្រះសីហនុ។

ទឹកស្ត្រីងធម្មជាតិ ជីវសា គឺជាទឹកស្ត្រីងធម្មជាតិ ដែលមានប្រភពមកពីជួរភ្នំខ្នងផ្សារ ខេត្តកំពង់ស្ពឺ បង្កើតឡើងដោយស្មាដៃកូនខ្មែរ និងសម្រាប់ប្រជាជនកម្ពុជា ។ ជីវសា គឺជានិមិត្តសញ្ញា នៃភាពបរិសុទ្ធ សុខភាព និងភាពជឿជាក់ ជាមួយរសជាតិស្រស់បំព្រងពោរពេញទៅដោយថាមពល ។

ជីវសា គឺជាជម្រើសដ៏ល្អសម្រាប់យើងគ្រប់គ្នា ដែលជាផលិតផលរបស់ប្រទេសកម្ពុជា ដែលមានអាស័យដ្ឋានផ្ទះលេខ៥ ផ្លូវ ៥០ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ។

ជាមួយគ្នានេះដែរ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងអំណគុណយ៉ាងជ្រាលជ្រៅចំពោះក្រុមហ៊ុន ទឹកស្ត្រីងធម្មជាតិ ជីវសា ដែលបានឧបត្ថម្ភទឹកបរិសុទ្ធចំនួន ៥០០កេស មកដល់រដ្ឋបាលខេត្តព្រះសីហនុ ដើម្បីឱ្យរដ្ឋបាលខេត្តសម្រាប់យកទៅប្រើប្រាស់ក្នុងការងារសង្គម ការងារមនុស្សធម៌នៅខេត្តព្រះសីហនុ ព្រមទាំងបានជូនពរលោកនាយកក្រុមហ៊ុន និងសហការីទាំងអស់ទទួលបាននូវពុទ្ធពរទាំងប្រាំប្រការ គឺ អាយុ វណ្ណ: សុខ: ពល: និងបដិភាណៈ កុំបីឃ្លៀងឃ្លាតឡើយ និងសូមឱ្យក្រុមហ៊ុន ផលិតទឹកបរិសុទ្ធស្ត្រីង ជីវសាកាន់តែមានការគាំទ្របន្ថែមទៀត និងការជឿទុកចិត្តរបស់អតិថិជនទិញទឹកស្ត្រីងធម្មជាតិ ជីវសា កាន់តែច្រើនទៀត៕

ដោយ ងូ សុមុនី