AKP បន្ទាយមានជ័យ ថ្ងៃទី២៥ ខែមិថុនា ឆ្នាំ២០២៦--ក្នុងកិច្ចប្រជុំដ៏មានសារៈសំខាន់មួយ នាព្រឹកថ្ងៃទី២៥ ខែមិថុនា ឆ្នាំ២០២៦ លោកជំទាវ ឈុត ដាលីន សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តបន្ទាយមានជ័យ បានធ្វើការក្រើនរម្លឹកយ៉ាងមុតមាំដល់មន្ត្រីជំនាញ និងអាជ្ញាធរគ្រប់លំដាប់ថ្នាក់ ឱ្យបង្កើនការយកចិត្តទុកដាក់ខ្ពស់បំផុតលើកិច្ចការពារ និងលើកកម្ពស់សិទ្ធិស្ត្រី និងកុមារ ដោយចាត់ទុកថា នេះគឺជាមូលដ្ឋានគ្រឹះមិនអាចខ្វះបានសម្រាប់វឌ្ឍនភាពនៃសង្គមជាតិ។

ក្នុងកិច្ចប្រជុំសាមញ្ញលើកទី២៤ ប្រចាំខែមិថុនា និងកិច្ចប្រជុំប្រចាំឆមាសទី១ ឆ្នាំ២០២៦ អាណត្តិទី៤ នៃគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ដែលមានការចូលរួមពីអភិបាលរងស្រុក កងកម្លាំងប្រដាប់អាវុធ មន្ទីរអង្គភាពជុំវិញខេត្ត និងតំណាងអង្គការដៃគូពាក់ព័ន្ធ លោកជំទាវប្រធានបានគូសបញ្ជាក់ពីចំណុចស្នូល ដែលអាជ្ញាធរត្រូវអនុវត្តនោះការអនុវត្តគោលនយោបាយរាជរដ្ឋាភិបាល លោកជំទាវបានរំលឹកឡើងវិញនូវឆន្ទៈនយោបាយដ៏មុតស្រួចរបស់រាជរដ្ឋាភិបាល ដែលតែងតែចាត់ទុកស្ត្រីជា «ឆ្អឹងខ្នង» នៃសេដ្ឋកិច្ច និងកុមារជា «ទំពាំងស្នងឫស្សី» ដូច្នេះគ្រប់ស្ថាប័នត្រូវធានាថា សកម្មភាពអភិវឌ្ឍន៍ទាំងអស់ត្រូវមានការរួមបញ្ចូលយេនឌ័រ និងកិច្ចការពារកុមារជាចម្បង។

ការតាមដាន និងដោះស្រាយបញ្ហាជាក់ស្តែងតាមរយៈការវាយតម្លៃលទ្ធផលឆមាសទី១ ឆ្នាំ២០២៦ លោកជំទាវបានជំរុញឱ្យសមាជិកគណៈកម្មាធិការទាំងអស់ ត្រូវចុះផ្ទាល់ដល់មូលដ្ឋាន ដើម្បីស្វែងរកកង្វល់របស់ស្ត្រី និងកុមារ ជាពិសេសក្នុងករណីងាយរងគ្រោះ ដើម្បីធ្វើអន្តរាគមន៍ឱ្យបានទាន់ពេលវេលា។

កិច្ចសហការជាយុទ្ធសាស្ត្រ លោកជំទាវបានសង្កត់ធ្ងន់លើការកសាងភាពជាដៃគូជាមួយអង្គការសង្គមស៊ីវិល និងវិស័យឯកជន ដើម្បីពង្រីកវិសាលភាពនៃការគាំពារសង្គម ធានាឱ្យបាននូវសមធម៌ និងការអភិវឌ្ឍន៍ដែលមិនទុកនរណាម្នាក់ចោល។

ក្នុងឱកាសនោះ លោកជំទាវ ឈុត ដាលីន ក៏បានថ្លែងកោតសរសើរចំពោះការខិតខំប្រឹងប្រែងរបស់មន្ត្រីគ្រប់លំដាប់ថ្នាក់ក្នុងឆមាសកន្លងមក ប៉ុន្តែលោកជំទាវបានដាក់ចេញនូវ «បេសកកម្មថ្មី» សម្រាប់ឆមាសទី២ ដោយតម្រូវឱ្យមានការត្រួតពិនិត្យការងារជាប្រចាំ និងការទទួលខុសត្រូវខ្ពស់ក្នុងការដោះស្រាយរាល់សំណូមពរដែលពាក់ព័ន្ធនឹងសុខុមាលភាពស្ត្រី និងកុមារក្នុងខេត្ត។

កិច្ចប្រជុំនេះ មិនត្រឹមតែជាការបូកសរុបលទ្ធផលការងារប៉ុណ្ណោះទេ ប៉ុន្តែគឺជាការក្រើនរម្លឹកដល់គ្រប់ស្ថាប័នទាំងអស់ ឱ្យបង្វែរការយកចិត្តទុកដាក់កាន់តែខ្លាំងទៅលើសកម្មភាពអប់រំ ការការពារពីអំពើហិង្សា និងការលើកកម្ពស់កម្រិតជីវភាពស្ត្រី ដើម្បីធានាបាននូវភាពសុខដុមរមនាក្នុងសង្គមជាតិទាំងមូល៕

ដោយ ឈុន សារ៉ាត