AKP ភ្នំពេញ ថ្ងៃទី២៥ ខែមិថុនា ឆ្នាំ២០២៦--ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានស្នើឱ្យអភិបាលរាជធានីខេត្តចាត់វិធានការឱ្យទាន់ពេលវេលាករណីគ្រឿងញៀនក្នុងភូមិសាស្ត្ររបស់ខ្លួន ជៀសវាងមានការរាយការណ៍ពីពលរដ្ឋហើយ បែរជាកម្លាំងមានសមត្ថកិច្ចធ្វើការយឺតយ៉ាវ។

ការស្នើនេះ ធ្វើឡើងក្នុងពិធីអបអរសាទរទិវាជាតិប្រយុទ្ធប្រឆាំងគ្រឿងញៀន នាព្រឹកថ្ងៃទី២៦ ខែមិថុនា ឆ្នាំ២០២៦នេះ  ដោយឯកឧត្តមសន្តិបណ្ឌិត នេត សាវឿន បានសង្កត់ធ្ងន់ថា បើចាត់វិធានការមិនទាន់ទេ វានឹងបំផ្លាញអនាគត សិស្សានុសិស្ស និងយុវជនរបស់យើង។

ឯកឧត្តមសន្តិបណ្ឌិត នេត សាវឿន បានថ្លែងថា« កន្លងមកក៏មានពលរដ្ឋរអ៊ូរទាំ ភាពយឺតយ៉ាវនៃការបង្រ្កា​ប​ពេលពលរដ្ឋរាយការណ៍ និងពេលខ្លះសូម្បីតែខ្ញុំមើលឃើញតាមរបាយការណ៍ប្រចាំបញ្ជា App No Drug ខ្លះក៏ឃើញមានភាពយឺតយ៉ាវស្រាវជ្រាវមិនទាន់ពេលវេលា »។

ឯកឧត្តមសន្តិបណ្ឌិត ក៏បានស្នើឱ្យ ឯកឧត្តម លោកជំទាវ អភិបាលខេត្ត ត្រូវតែសកម្ម រហ័សនិងទាន់ពេលវេលាចាប់ពីពេលនេះតទៅ។

យោងតាមសារលិខិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២៦ បានឱ្យដឹងថា សម្រាប់ឆ្នាំ២០២៥ កន្លងទៅ ក៏ដូចជាពាក់កណ្តាលនៃឆ្នាំ២០២៦នេះ ពិភពលោកបានកំពុងវិវត្តទៅរកស​ភា​​ពមួយដែលពោរពេញទៅដោយភាពផុយស្រួយ គ្រោះថ្នាក់ និងមិនប្រាកដប្រជា ដែលបានជះឥទ្ធិពល យ៉ាងគំហុកចំពោះក្របខ័ណ្ឌនយោបាយ សេដ្ឋកិច្ច និងសន្តិសុខ ដែលបច្ច័យអវិជ្ជមានទាំងនេះ ក៏បានក្លា​យ​ជាឱកាស ឱ្យក្រុមឧក្រិដ្ឋជន បន្តនិងបង្កើនសកម្មភាពឧក្រិដ្ឋកម្ម និងពង្រីកបណ្តាញចាក់ស្រេះ ព្រមទាំងផ្សារភ្ជាប់បទល្មើស គ្រឿងញៀនជាមួយនឹងបទល្មើសមិនប្រពៃណីជាច្រើន ដែលបង្កជាបញ្ហាប្រឈមស្មុគស្មាញថ្មីៗបន្ថែមទៀត។

យោងលើតថភាពប្រឈមដ៏ស្រួចស្រាល់និងប្រកបដោយហានិភ័យទាំងនេះ ការិយាល័យអង្គការសហប្រជាជាតិ ទទួលបន្ទុកកិច្ចការគ្រឿងញៀន និងឧក្រិដ្ឋកម្ម (UNODC)  បានកំណត់ ខ្លឹមសារនៃប្រធានបទទិវាសម្រាប់ឆ្នាំ២០២៦នេះ ដោយផ្តោតទៅលើអត្ថន័យដែលបញ្ជាក់ថា: បញ្ហាគ្រឿងញៀន លើសកលលោក គឺនៅតែជាបញ្ហាដ៏រ៉ាំរ៉ៃក្នុងសង្គម និងគួបផ្សំជាមួយបញ្ហាប្រឈមស្មុគស្មាញថ្មីៗបន្ថែមទៀត ដែលកើតមានក្នុងយុគសម័យជឿនលឿននេះ គឺតម្រូវទាមទារឱ្យប្រទេសទាំងអស់មានការឆ្លើយតបប្រក​ប​ដោ​យ ភាពច្នៃប្រឌិតខ្ពស់។

យោងលើអត្ថន័យខ្លឹមសារនៃប្រធានបទអន្តរជាតិនេះ រាជរដ្ឋាភិបាលកម្ពុជា បានសំយោគនូវ ខ្លឹមសារនិងសម្រេចកំណត់យកប្រធានបទនៃទិវាសម្រាប់កម្ពុជាយើងគឺ «រួមគ្នាឆ្លើយតបបញ្ហាគ្រឿងញៀនក្នុងបរិបទថ្មី ប្រកបដោយភាពច្នៃប្រឌិត»៕​

ដោយ៖ គង់ សិរីរ័ត្ន,រូបថត៖ យឹម សុវឌ្ឍនា