AKP ភ្នំពេញ ថ្ងៃទី២៤ ខែមិថុនា ឆ្នាំ២០២៦-- មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានសម្តែងការស្វាគមន៍ចំពោះចំណាប់អារម្មណ៍របស់បណ្ឌិត្យសភា និងក្រុមអ្នកវិនិយោគទុនចិន ក្នុងការវិនិយោគលើវិស័យសំខាន់ៗមួយចំនួនក្នុងនោះដូចជា៖ បច្ចេកទេសពីការដាំដុះរហូតដល់កែច្នៃ ការវិនិយោគលើវិស័យជលផល អភិវឌ្ឍន៍កំពង់ផែ ឃ្លាំងស្តុក ការអភិវឌ្ឍន៍លើរុក្ខជាតិសម្រាប់ធ្វើថ្នាំបុរាណ និងការនាំចេញផលិតផលកសិកម្មទៅប្រទេសចិន។

ថ្លែងក្នុងជំនួបពិភាក្សាជាមួយបណ្ឌិត្យសភាវិទ្យាសាស្ត្រសង្គមផ្លូវសូត្រហៃខូ និងក្រុមអ្នកវិនិយោគទុនចិន នៅថ្ងៃទី២៣ ខែមិថុនា ឆ្នាំ២០២៦ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានស្វាគមន៍ដោយបានផ្តល់អនុសាសន៍ និងជម្រាបព័ត៌មានសំខាន់ៗចំនួន ៣ចំណុច ដល់ភាគីចិន រួមមាន៖ ទី១. គោលនយោបាយលើកទឹកចិត្តវិនិយោគិន៖ រាជរដ្ឋាភិបាលកម្ពុជាមានច្បាប់វិនិយោគថ្មី និងការផ្ដល់ឋានៈជា គម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ដែលផ្តល់អត្ថប្រយោជន៍ជាច្រើនដល់អ្នកវិនិយោគ។ ទី២. ការបើកទីផ្សារនាំចេញកសិផលទៅប្រទេសចិន ដោយនាពេលថ្មីៗនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសម្ពោធជាផ្លូវការនូវការដឹកជញ្ជូនកសិផលកម្ពុជាឆ្លងកាត់ពីប្រទេសកម្ពុជាទៅកាន់ទីផ្សារប្រទេសចិន ដោយឆ្លងកាត់ប្រទេសឡាវរួមមាន៖ ផ្លែទុរេន ចេក ស្វាយ មៀនប៉ៃលិន ដំឡូងមី និងអង្ករ។

ក្នុងជំនួបពិភាក្សានោះ ឯកឧត្តម គី ច័ន្ទរំដួល បានស្នើឱ្យភាគីចិនពិនិត្យលទ្ធភាពសហការជាមួយស្រាវជ្រាវរួមគ្នាជាមួយបណ្ឌិត្យសភាវិទ្យាសាស្រ្តកសិកម្មកម្ពុជាលើការអភិវឌ្ឍន៍វិស័យជលផល និងការស្រាវជ្រាវលើការអភិវឌ្ឍរុក្ខជាតិសម្រាប់ធ្វើថ្នាំបុរាណ។

គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងពិធីនេះ ភាគីចិនបានទទួលយកអនុសាសន៍របស់ឯកឧត្តម គី ច័ន្ទរំដួល ហើយនឹងជួយផ្សព្វផ្សាយដល់វិនិយោគិនចិន ដើម្បីជំរុញឱ្យមានការចាប់អារម្មណ៍មកវិនិយោគលើវិស័យកសិកម្មនៅកម្ពុជាបន្ថែមទៀត៕

ដោយ៖ មករា