AKP ព្រះសីហនុ ថ្ងៃទី២៤ ខែមិថុនា ឆ្នាំ២០២៦-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ អញ្ជើញដឹកនាំគណៈប្រតិភូខេត្តព្រះសីហនុ ចុះសួរសុខទុក្ខនាយ នាយរង និងពលទាហានកងពលតូចលេខ៤ និងនាំយកអំណោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត នូវគ្រឿងចក្រអេស្តាវ៉ាទ័រ គ្រឿងឧប ភោគបរិភោគ និងថវិកា ជូនវីរកងទ័ព និងគ្រួសារវីរកងទ័ពនៅសមភូមិមុខ ស្ថិតនៅភូមិពងទឹក ឃុំអំពិល ស្រុកបន្ទាយអំពិល ខេត្តឧត្ដរមានជ័យ នាព្រឹកថ្ងៃពុធ ទី២៤ ខែមិថុនា ឆ្នាំ២០២៦។

ក្នុងឱកាសចុះសួរសុខទុកវីរកងទ័ពទិសខេត្តឧត្តរមានជ័យ មានការទទួលស្វាគមន៍ពីលោក ហោ ជីនវីរយុទ្ធ អភិបាលរង នៃគណៈអភិបាលខេត្តឧត្តរមានជ័យ និងឯកឧត្តម ឧត្តមសេនីយ៍ឯក កែវ ផា មេបញ្ជាការរងកងទ័ពជើងគោក មេបញ្ជាការកងពលធំអន្តរាគមន៍លេខ២ និងជា ប្រធានគណៈបញ្ជាការឯក ភាពសមភូមិទិសទី៣ យោធភូមិភាពទី៤ ព្រំដែនកម្ពុជា-ថៃ។

ឯកឧត្តម ម៉ាង ស៊ីណេត បានថ្លែងថា តាងនាមក្រុមប្រឹក្សាខេត្ត គណៈអភិបាលខេត្ត មន្ត្រីរាជការ ព្រះសង្ឃ និងប្រជាពលរដ្ឋខេត្តព្រះសីហនុ មានមោទនភាពដែលបានមកដល់ទីនេះជាថ្មីម្តងទៀត ព្រមទាំងបានពាំនាំផ្តំាផ្ញើពីសមរភូមិក្រោយមកដល់វីរកងទ័ពកម្លាំងសមភូមិមុខ ជាពិសេសសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា សូមផ្ញើជូនពរបងៗ និងប្អូនវីរកងទ័ពទាំងអស់មានសុខភាពល្អ ឈ្នះអស់មារសត្រូវ។ ជាមួយគ្នានោះ ឯកឧត្តមអភិបាលខេត្តក៏បានវាយតម្លៃខ្ពស់ដល់វីរកងទ័ពដែលបានឈរជើងនៅទីនេះ ដែលមានប្រជាពលរដ្ឋ១៧លាននាក់នៅពីក្រោយនៅជាប់ជាមួយវីរកងទ័ព ព្រោះបងប្អូននៅសមរភូមិមុខបានលះបង់ និងធ្វើពលិកម្មគ្រប់សពបែបយ៉ាង ដើម្បីការពារជាតិ មាតុភូមិ និងប្រជាពលរដ្ឋជួរក្រោយ ទោះបីបងៗមានការលំបាកនៅសមភូមិមុខ ក៏ប៉ុន្តែពួកយើងនៅសមភូមិក្រោយនៅតែគាំទ្រចំពោះបងប្អូនសមភូមិមុខជានិច្ច ហើយទឹកចិត្តរបស់ប្រជាពលរដ្ឋនៅតែចងចាំចំពោះវីរភាពកងទ័ពសមភូមិមុខ។ ក្នុងពេលប្រទេសជាតិមានសង្ក្រាម មន្ត្រីរាជការ និងប្រជាពលរដ្ឋនៅខេត្តព្រះសីហនុ ក៏បានធ្វើសកម្ម ភាពមនុស្សធម៌សម្រាប់វេចខ្ចប់សម្ភារ គ្រឿងឧបភោគ បរិភោគ ដើម្បីចែកជូនដល់វីរកងទ័ព ក៏ដូចជាប្រជាពលរដ្ឋ (ជនភៀសសឹក)។

ឯកឧត្តមអភិបាលខេត្តបានបញ្ជាក់ថា ទិសដៅរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាមានប្រៀបតាមលក្ខណៈការទូត និងលក្ខណៈច្បាប់ ដើម្បីធានាស្ថេរភាពនៅតាមខ្សែបន្ទាត់ព្រំដែន ដែលជាសមិទ្ធផលយូរអង្វែង។ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា បានធ្វើការបញ្ចប់សង្គ្រាមផ្ទៃក្នុង ដោយធ្វើការចរចាធ្វើ ឱ្យកម្ពុជាមានសុខសន្តិភាពពេញផ្ទៃប្រទេស ដើម្បីផលប្រយោជន៍ជាតិ និងប្រជានជន និងសូមអគុណសន្តិភាពដែលបានកំណត់ព្រំដែនសន្តិភាព មិត្តភាព កិច្ចសហប្រតិបត្តិការ និងព្រំដែនដែលមានការអភិវឌ្ឍ។

ឯកឧត្តមអភិបាលខេត្តជឿជាក់ថា ការដឹកនាំរបស់សម្តេចធិបតី ហ៊ុន ម៉ាណែត ក្នុងការដឹកនាំអភិវឌ្ឍប្រទេសរកសុខសន្តិភាព ហើយយើងជាមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋនៅសមភូមិក្រោយគាំទ្រយ៉ាងពេញទំហឹងដល់វីរកងទ័ពនៅសមភូមិមុខ ក្នុងកិច្ចការការពារជាតិ មាតុភូមិ និងប្រជាពលរដ្ឋកម្ពុជា។ យើងនៅសមរភូមិក្រោយរួមគ្នាជាមួយសមភូមិមុខក្នុងការអនុវត្តគោលនយោបាយ និងការគាំទ្ររាជរដ្ឋាភិបាល។ ភាពជោគជ័យរួមរបស់យើងទាំងអស់គ្នា គឺការពង្រឹងស្មារតីសាមគ្គីភាព ការថែក្សាសុខភាពដោយអនុវត្តនូវបទបញ្ជារបស់រាជរដ្ឋាភិបាលក្នុងកិច្ចការពារទឹកដីរបស់យើងឱ្យបាន១០០ភាគរយ ឈានទៅសម្រេចចក្ខុវិ ស័យកម្ពុជាឆ្នាំ២០៥០។ សូមជូនពរឱ្យលោកមេបញ្ជាការ មេបញ្ជាការរង និងពលទាហានទាំងអស់ទទួលបានសុខភាពល្អ និងជ័យជម្នះគ្រប់ភារកិច្ច។

អំណោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិតសម្រាប់អង្គភាពចំនួនពីរ ក្នុងនោះ កងពលតូចអន្តរាគមន៍លេខ៤ (អង្គភាពសម្ព័ន្ធមេត្រីភាព) មាន អង្ករ ៥តោន ទឹកសុទ្ធ ៣០០កេស ត្រីចំហុយ ៣០០គីឡូក្រាម ជ្រូកសាច់ ៣ក្បាល ស្មើ២៤០គីឡូក្រាម ត្រីងៀតសមុទ្រ ១០០គីឡូ ភេសជ្ជៈផ្អែម ៤០កេស នំសណ្តែកដី ២០០ថង់ អេស្កាវ៉ាទ័រ ១គ្រឿង កុំព្យូទ័រ Labtop ១គ្រឿង និងថវិកា ៤០លានរៀល។ ដោយឡែកឧបត្ថម្ភជូនកងពលតូចលេខ២ អង្ករ ៥តោន ទឹកសុទ្ធ ២០០កេស ត្រីចំហុយ ២០០គីឡូក្រាម ជ្រូកសាច់ ៣ក្បាល ស្មើ ២៤០គីឡូក្រាម។ សូមបញ្ជាក់ថា នេះជាការនាំយកអំណោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិតចែកជូនវីរកងទ័ពជួរមុខលើកទី៣ ក្នុងឆ្នាំ២០២៦ ដោយលើកទី១ កាលពីខែកុម្ភៈ លើកទី២ ខែមេសា និងលើកទី៣នេះខែមិថុនា ២០២៦៕

ដោយ ងូ សុមុនី