AKP កំពង់ធំ ថ្ងៃទី២៤ ខែមិថុនា ឆ្នាំ២០២៦--ប្រធានមន្ទីរព័ត៌មានខេត្តកំពង់ធំ និងក្រុមការងារ បានជួបពិភាក្សាការងារជាមួយលោកនាយក និងលោកនាយករងនៃវិទ្យាល័យរស្មីសោភ័ណ ស្រុកស្ទោង ខេត្តកំពង់ធំ កាលពីថ្ងៃអង្គារ ទី២៣ ខែមិថុនា ឆ្នាំ២០២៦ ដើម្បីសហការត្រៀមរៀបចំយុទ្ធនាការប្រឆាំងព័ត៌មានក្លែងក្លាយ ដំណាក់កាលទី២ ក្រោមប្រធានបទ "និយាយថាទេចំពោះព័ត៌មានក្លែងក្លាយ" ស្របតាមការណែនាំដ៏ខ្ពង់ខ្ពស់របស់ ឯកឧត្តមរដ្ឋមន្ត្រីក្រសួងព័ត៌មាន។

ក្នុងឱកាសនោះ លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានលើកឡើងថាយុទ្ធនាការដ៏មានសារៈសំខាន់នេះ គ្រោងនឹងប្រារព្ធធ្វើឡើងនៅថ្ងៃទី៣ ខែកក្កដា ឆ្នាំ២០២៦ ខាងមុខ នៅបរិវេណវិទ្យាល័យរស្មីសោភ័ណ្ឌ ដោយមានវត្តមានថ្នាក់ដឹកនាំជាន់ខ្ពស់នៃក្រសួងព័ត៌មាន អភិបាលរងនៃគណៈអភិបាលខេត្តមន្ត្រី រាជការមន្ទីរព័ត៌មានខេត្តកំពង់ធំ ព្រមទាំងតំណាងមន្ទីរ-អង្គភាពពាក់ព័ន្ធជាច្រើនរូបទៀតចូលរួមផងដែរ។

កិច្ចពិភាក្សានេះបានផ្តោតសំខាន់លើការរៀបចំផែនការលម្អិត និងការត្រៀមលក្ខណៈគ្រប់ជ្រុងជ្រោយដើម្បីធានាឱ្យកម្មវិធីប្រព្រឹត្តទៅដោយរលូន និងទទួលបានជោគជ័យ។ ទន្ទឹមទាំងនេះ កិច្ចពិភាក្សាបានលើកឡើងអំពីការគ្រប់គ្រងសិស្សចូលរួម ការរៀបចំទីតាំងការរៀបចំសម្ភារៈឧបករណ៍ បំពងសំឡេង និងសណ្ដាប់ធ្នាប់ ព្រមទាំងវិធានការទប់ស្កាត់បញ្ហាប្រឈមនានាដែលអាចកើតមាន។
ជាពិសេសកម្មវិធីនឹងរៀបចំសកម្មភាពផ្សព្វផ្សាយយ៉ាងទូលំទូលាយ ដោយមានការបិទស្ទីកឃ័រ (Sticker) អប់រំ ការលើកប៉ាដា និងផ្ទាំងផ្សព្វផ្សាយ ដែលមានខ្លឹមសារអំពាវនាវឱ្យយុវជននិងសាធារណជនរួមគ្នាប្រយុទ្ធប្រឆាំងព័ត៌មានក្លែងក្លាយ។ ខ្លឹមសារលើស្ទីកឃ័រ និងផ្ទាំងផ្សព្វផ្សាយ គ្រោងនឹងបង្ហាញសារៈសំខាន់ៗដូចជា៖ «គិតមុន ចុច Share» «ផ្ទៀងផ្ទាត់ប្រភព មុននឹងជឿ» «យុវជនឆ្លាតវៃ ត្រូវចេះសួរ ពិនិត្យ និងផ្ទៀងផ្ទាត់» «និយាយថាទេ ចំពោះព័ត៌មានក្លែងក្លាយ»។

ក្រុមការងារក៏បានត្រៀមលក្ខណៈរៀបចំសណ្ដាប់ធ្នាប់ សិស្សានុសិស្សដែលត្រូវចូលរួមយ៉ាងច្រើនផងដែរ។ ក្នុងយុទ្ធនាការនេះដោយរំពឹងថា ការចូលរួមយ៉ាងសកម្មរបស់យុវជននឹងក្លាយជាកម្លាំងដ៏សំខាន់ក្នុងការលើកកម្ពស់ការយល់ដឹងអំពីការប្រើប្រាស់ព័ត៌មាន ប្រកបដោយការទទួលខុសត្រូវ និងការពង្រឹងសមត្ថភាពគិតវិភាគនៅក្នុងយុគសម័យឌីជីថល។

បន្ថែមពីលើកម្មវិធីពិធីការ ក្រុមការងារមន្ទីរព័ត៌មានខេត្តកំពង់ធំ ក៏បានរៀបចំសកម្មភាពកម្សាន្ត ប្រកបដោយអត្ថន័យជាមួយសិស្សានុសិស្ស និងលោកគ្រូ អ្នកគ្រូ ដោយមានការរាំកម្សាន្តទៅតាមចង្វាក់ប្រពៃណី បទចម្រៀងអប់រំ ដែលមានខ្លឹមសារជំរុញឱ្យយុវជន «និយាយថាទេ ចំពោះព័ត៌មានក្លែងក្លាយ»ក្នុងបរិយាកាសសប្បាយរីករាយ និងពោរពេញដោយស្និទ្ធស្នាលនិងសាមគ្គីភាព។

អ្វីដែលកាន់តែទាក់ទាញនោះ គឺកម្មវិធី Challenge សំណួរ-ចម្លើយ ជុំវិញប្រធានបទប្រឆាំងព័ត៌មានក្លែងក្លាយ ដែលបានផ្តល់ឱកាសដល់យុវជនបញ្ចេញចំណេះដឹង និងទស្សនៈរបស់ខ្លួន តាមរយៈការឆ្លើយសំណួរផ្សេងៗទាក់ទងនឹងការផ្ទៀងផ្ទាត់ព័ត៌មាន ការទទួលស្គាល់ព័ត៌មានក្លែងក្លាយ និងតួនាទីរបស់យុវជនក្នុងការទប់ស្កាត់ការចែករំលែកព័ត៌មានមិនពិត។ អ្នកដែលឆ្លើយត្រូវ នឹងទទួលបានវត្ថុអនុស្សាវរីយ៍លើកទឹកចិត្តពីក្រុមការងារ ដែលបានបន្ថែមភាពសប្បាយរីករាយ និងជំរុញការចូលរួមយ៉ាងផុសផុលពីសំណាក់សិស្សានុសិស្ស។ យុទ្ធនាការនេះ មិនត្រឹមតែជាការផ្សព្វផ្សាយអប់រំប៉ុណ្ណោះទេ ប៉ុន្តែជាការបណ្តុះវប្បធម៌ប្រើប្រាស់ព័ត៌មានប្រកបដោយការទទួលខុសត្រូវ ដើម្បីឱ្យយុវជនក្លាយជាពលរដ្ឋឌីជីថល ប្រកបដោយការយល់ដឹង ចេះគិត ពិនិត្យ និងផ្ទៀងផ្ទាត់ មុននឹងជឿ និងចែករំលែកព័ត៌មានទៅកាន់អ្នកដទៃ៕

ដោយ ស៊ុម វណ្ណា (ប្រភព៖មន្ទីរព័ត៌មានខេត្តកំពង់ធំ)