AKP ភ្នំពេញ ថ្ងៃទី២៤ ខែមិថុនា ឆ្នាំ២០២៦--ក្រោយការចាប់ឆ្នោតចែកពូល នៅដើមសប្តាហ៍នេះ គឺក្រុមបាល់ទាត់ជម្រើសជាតិនារីកម្ពុជា ស្ថិតនៅក្នុងពូល B ជាមួយក្រុមនារីទីម័រខាងកើត និងក្រុមការពារម្ចាស់ជើងឯក ឥណ្ឌូណេស៊ី នៅក្នុងការប្រកួតបាល់ទាត់នារីពានរង្វាន់អាស៊ាន (ASEAN Women’s Cup 2026) ឆ្នាំ២០២៦ នៅប្រទេសម៉ាឡេស៊ី ពីថ្ងៃទី១០-២២ ខែកក្កដា ឆ្នាំ២០២៦។

ពានរង្វាន់នារីអាស៊ានឆ្នាំ២០២៦ មាន៦ក្រុមចូលរួមប្រជែងជើងឯក ដោយពូល A មានម្ចាស់ផ្ទះ ម៉ាឡេស៊ី សិង្ហបុរី និងឡាវ ខណៈពូល B មានក្រុមការពារជើងឯក ២០២៥ ក្រុមឥណ្ឌូណេស៊ី ក្រុមជើងឯករង កម្ពុជា និងទីម័រខាងកើត។ ក្នុងជំនួបមិត្តភាពអន្តរជាតិ២ប្រកួត ថ្មីៗកន្លងមកនេះ គឺក្រុមនារីកម្ពុជា ឈ្នះ១ និងស្មើ១ ដោយក្នុងនោះ ក្រុមកម្ពុជាស្មើជាមួយម្ចាស់ផ្ទះ ឥណ្ឌូណេស៊ី ១-០ កាលពីថ្ងៃទី០៩ ខែមិថុនា ២០២៦ និងក្រុមកម្ពុជាបានយកឈ្នះក្រុមសិង្ហបុរី ៥-០ កាលពីថ្ងៃទី០៦ ខែមិថុនា ២០២៦។

លោក ឃួន ឡាបូរ៉ាវី គ្រូបង្វឹកក្រុមបាល់ទាត់នារីជម្រើសជាតិកម្ពុជាបានដាក់គោលដៅ និងរំពឹងកូនក្រុមអាចលេងដល់ថ្ងៃចុងក្រោយ ក្នុងពានរង្វាន់ ASEAN Women’s Cup 2026នេះ។ លោកលើកឡើងថា ក្រុមបាល់ទាត់នារីកម្ពុជានឹងអាចឆ្លងផុតវគ្គចែកពូល ដោយផ្អែកលើបទពិសោធន៍ធ្លាប់ជួបឥណ្ឌូណេស៊ីជាច្រើនលើកកន្លងមក ពិសេសជំនួបមិត្តភាពអន្ដរជាតិ ក្នុងខែមិថុនានេះ ដែលបញ្ចប់ដោយលទ្ធផលស្មើគ្នា ខណៈឥណ្ឌូណេស៊ីបាននាំចូលកីឡាការិនីចូលសញ្ជាតិថ្មីៗមួយចំនួន។ ចំពោះក្រុមជម្រើសជាតិនារីទីម័រខាងកើត លោកគិតថា ទីម័រខាងកើតនឹងមិនមានអ្វីប្រែប្រួលខ្លាំងទេ បើទោះជាលោកមិនបានឃើញពួកគេលេង ១ឆ្នាំក្តី។

ព្រឹត្តិការណ៍បាលទាត់នារី ASEAN Women’s Cup នឹងជ្រើសរើសបេក្ខភាពជ័យលាភី៣ក្រុមពីចំណាត់ថ្នាក់លេខ១ ដល់លេខ៣ ដើម្បីចូលរួមប្រកួតជើងឯកបាល់ទាត់នារីអាអាស៊ាន (ASEAN Women’s Championship ជាមួយបេក្ខភាព ៥ក្រុមទៀតកំពុងឈររង់ចាំ។ គួររម្លឹកថា ASEAN Women’s Cup 2024 ក្រុមនារីកម្ពុជាទទួលបានជើងឯករង បន្ទាប់ពីបានប្រកួតចាញ់ក្រុមឥណ្ឌូណេស៊ី ១-៣ នៅវគ្គផ្តាច់ព្រ័ត្រ ឆ្នាំ២០២៤ ខណៈជម្រើសជាតិនារីសិង្ហបុរី ទទួលបានចំណាត់ថ្នាក់លេខ៣៕

ដោយ ហេង ណាលីន (រូបភាពឯកសារ៖ FFC)