AKP ភ្នំពេញ ថ្ងៃទី២៣ ខែមិថុនា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី កាលពីថ្ងៃចន្ទ បានជួបជាមួយអនុលេខាធិការក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ លោក ហ្កាឌៀ ណេហ្សាមី នៅខាងក្រៅកិច្ចប្រជុំប្រ៊ីកស៍ (BRICS) នៅទីក្រុងញូវដេលី បន្ទាប់ពីកិច្ចពិភាក្សារបស់ទីក្រុងតេអេរ៉ង់ជាមួយសហរដ្ឋអាមេរិកនៅប្រទេសស្វីស។

យោងតាមសេចក្តីថ្លែងការណ៍មួយ ស្តីពីស្ថានទូតអ៊ីរ៉ង់ប្រចាំប្រទេសឥណ្ឌា អ្នកទាំងពីរបានពិភាក្សាអំពីការអភិវឌ្ឍក្នុងតំបន់ កិច្ចសហប្រតិបត្តិការទ្វេភាគី និងការអនុវត្តកិច្ចព្រមព្រៀងសន្តិភាព។

យោងតាមសេចក្តីថ្លែងការណ៍មួយពីក្រសួងការបរទេសចិន បានឱ្យដឹងថា លោក វ៉ាង បាននិយាយថា ចំណុចទាំង១៤ នៃកិច្ចព្រមព្រៀងនេះបង្ហាញពី «ស្មារតីនៃសមភាព ប្រកាន់ខ្ជាប់នូវគោលបំណងនៃធម្មនុញ្ញអង្គការសហប្រជាជាតិ និងស្របតាមបទដ្ឋាននៃទំនាក់ទំនងអន្តរជាតិ»។

លោក វ៉ាង បានសង្កត់ធ្ងន់ថា ការថែរក្សា និងការអនុវត្តអនុស្សរណៈនៃការយោគយល់គ្នានឹងជួយពង្រឹងបទឈប់បាញ់ «ដែលរកបានដោយលំបាក» ដោយបើកឱកាសថ្មីសម្រាប់ទំនាក់ទំនងអ៊ីរ៉ង់-សហរដ្ឋអាមេរិក និងរួមចំណែកដល់ការស្តារសន្តិភាពនៅមជ្ឈិមបូព៌ា។

លោកបានបន្ថែមថា «ក្នុងនាមជាដៃគូយុទ្ធសាស្ត្រដ៏ទូលំទូលាយរបស់អ៊ីរ៉ង់ ប្រទេសចិនតែងតែរក្សាជំហរដ៏យុត្តិធម៌ និងគាំទ្រកិច្ចខិតខំប្រឹងប្រែងទាំងអស់ដែលនាំទៅរកសន្តិភាព គាំទ្រអ៊ីរ៉ង់ក្នុងការការពារអធិបតេយ្យភាពសន្តិសុខ និងសេចក្តីថ្លៃថ្នូរជាតិរបស់ខ្លួន» ព្រមទាំងបានសម្តែងការគាំទ្រចំពោះកិច្ចខិតខំប្រឹងប្រែងរបស់ទីក្រុងតេអេរ៉ង់ក្នុងការកែលម្អទំនាក់ទំនងជាមួយបណ្តាប្រទេសឈូងសមុទ្រ និងរដ្ឋក្នុងតំបន់ដទៃទៀត។

លោក វ៉ាង បាននិយាយថា ប្រទេសចិន «មានឆន្ទៈបន្តផ្តល់ជំនួយតាមរបៀបរបស់ខ្លួន និងដើរតួនាទីស្ថាបនាក្នុងការស្តារសន្តិភាព និងភាពស្ងប់ស្ងាត់ក្នុងតំបន់ឡើងវិញ»។

យោងតាមស្ថានទូតអ៊ីរ៉ង់ បានឱ្យដឹងថា លោក ណេហ្សាមី បានសម្តែងការកោតសរសើរចំពោះការគាំទ្រផ្នែកនយោបាយរបស់ប្រទេសចិន និងបានសង្កត់ធ្ងន់ទៅលើសារៈសំខាន់នៃការពង្រឹងភាពជាដៃគូយុទ្ធសាស្ត្ររវាងទីក្រុងតេអេរ៉ង់ និងទីក្រុងប៉េកាំង ក៏ដូចជាការត្រៀមខ្លួនរបស់អ៊ីរ៉ង់ក្នុងការឆ្លើយតបទៅនឹងការគំរាមកំហែងដែលអាចកើតមានណាមួយ៕

ដោយ៖ យា ចិន្ដាខន្ដី (ប្រភព៖ AA-AKP)