AKP ភ្នំពេញ ថ្ងៃទី២៣ ខែមិថុនា ឆ្នាំ២០២៦ -- ប្រទេសរុស្ស៊ីត្រូវបានគេរាយការណ៍ថា កំពុងរៀបចំផែនការសកម្មភាពដែលមានតុល្យភាពសម្រាប់ការផ្គត់ផ្គង់ប្រេងឥន្ធនៈនៅក្នុងទីផ្សារក្នុងស្រុករបស់ខ្លួន ខណៈដែលការវាយប្រហារដោយយន្តហោះគ្មានមនុស្សបើក (ដ្រូន) របស់អ៊ុយក្រែនបានធ្វើឱ្យខូចខាតរោងចក្រចម្រាញ់ប្រេងឥន្ធនៈនៅក្រៅបណ្តាញ និងជំរុញឱ្យមានការរឹតបន្តឹងការលក់ប្រេងឥន្ធនៈនៅទូទាំងតំបន់ជាច្រើន។

ឧបនាយករដ្ឋមន្ត្រីរុស្ស៊ី លោក អាឡិចសាន់ដឺរ ណូវ៉ាក់ បានណែនាំដល់មន្ត្រីក្នុងអំឡុងពេលនៃកិច្ចប្រជុំ ស្តីពីស្ថានភាពទីផ្សារប្រេងឥន្ធនៈ ដោយស្នើសុំឱ្យភ្នាក់ងារពាក់ព័ន្ធរៀបចំផែនការសកម្មភាពមួយ។ សេវាប្រឆាំងការផ្តាច់មុខសហព័ន្ធរបស់រុស្ស៊ីត្រូវបានប្រគល់ភារកិច្ចឱ្យតាមដានតម្លៃជាបន្តបន្ទាប់នៅក្នុងវិស័យនេះ និងធ្វើសកម្មភាពយ៉ាងឆាប់រហ័សនៅពេលចាំបាច់។

កិច្ចប្រជុំនេះក៏បានគ្របដណ្តប់លើកិច្ចខិតខំប្រឹងប្រែង ដើម្បីទប់ស្កាត់ការដំឡើងថ្លៃដោយមិនសមហេតុផលសម្រាប់ផលិតផលប្រេងឥន្ធនៈ និងសកម្មភាពប្រឆាំងនឹងការប្រកួតប្រជែង ក៏ដូចជាកម្រិតស្តុកផលិតផលប្រេងឥន្ធនៈបច្ចុប្បន្ននៅទូទាំងប្រទេសផងដែរ។ មន្ត្រីបាននិយាយថា ទីផ្សារប្រេងឥន្ធនៈកំពុងត្រូវបានគ្រប់គ្រងជាប្រចាំ។

រោងចក្រចម្រាញ់ប្រេងជាច្រើននៅក្នុងប្រទេសរុស្ស៊ីត្រូវបានបិទបណ្តាញសម្រាប់ការថែទាំក្នុងចំណោមការវាយប្រហារដោយយន្តហោះគ្មានមនុស្សបើករបស់អ៊ុយក្រែន ដោយទីក្រុងមូស្គូពេលខ្លះបានងាកទៅរកការរឹតបន្តឹងការនាំចេញដើម្បីធានាបាននូវស្ថិរភាពក្នុងស្រុក។ ការកើនឡើងនៃការវាយប្រហារថ្មីៗនេះ បាននាំឱ្យមានការរឹតបន្តឹងការលក់ប្រេងឥន្ធនៈនៅក្នុងតំបន់ផ្សេងៗ៕

ដោយ៖ យា ចិន្ដាខន្ដី (ប្រភព៖ AA-AKP)