AKP ភ្នំពេញ ថ្ងៃទី២៣ ខែមិថុនា ឆ្នាំ២០២៦--ឯកឧត្តម ម៉ាង ស៊ីណេត អភិ បាលខេត្តព្រះសីហនុ និងឯកឧត្តម លី រស្មី រដ្ឋលេខាធិការក្រសួងរៀបចំដែននគររូបនីយកម្ម និងសំណង់ កាលពីរសៀលថ្ងៃចន្ទទី២២ ខែមិថុនា ឆ្នាំ២០២៦បានអញ្ជើញដឹកនាំលោកអភិបាលរងខេត្ត លោកនាយករដ្ឋបាលសាលាខេត្ត ប្រធានមន្ទីរ អង្គភាពពាក់ពន្ធ័ និងក្រុមហ៊ុនសាងសង់ (មហានគរ) ចុះពិនិត្យវឌ្ឍនភាពគម្រោងសាងសង់អគាររដ្ឋបាលសាលាខេត្តព្រះសីហនុ ដែលមានទីតាំងស្ថិត នៅសង្កាត់លេខ៣ ក្រុងព្រះសីហនុ និងបើកកិច្ចប្រជុំពិនិត្យតាមដានត្រួតពិនិត្យផ្ទៀងផ្ទាត់លទ្ធផលដែលសម្រេចបាន និងកែសម្រួលនៅចំណុចខ្វះខាតមួយចំនួន។

តាមរបាយការណ៍បឋម ស្តីពីការងារសាងសង់អគាររដ្ឋបាលសាលាខេត្តព្រះសីហនុ បានឪ្យដឹងថា គិតត្រឹមថ្ងៃទី២២ ខែមិថុនា ២០២៦នេះ ដំណើការសាងសង់អគាររដ្ឋបាលសាលាខេត្តបានប្រមាណជាង ៧៥ភាគរយ គ្រោងនឹងបញ្ចប់នៅខែកញ្ញា ឆ្នាំ២០២៦ ដាក់ឪ្យដំណើរការជាផ្លូការ។

អគាររដ្ឋបាលសាលាខេត្តព្រះសីហនុ មានបណ្តោយ ១០២ម៉ែត្រ ទទឹង ១០១ម៉ែត្រ កម្ពស់ ៦ជាន់ ដែលបានចាប់ផ្តើមបញ្ចុះបឋមសិលាសាងសង់កាលពីថ្ងៃទី៧ ខែមីនា ឆ្នាំ២០២២ កន្លងមក ។ 

ក្នុងឪកាសនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ និង ឯកឧត្តម លី រស្មី រដ្ឋលេខាធិការក្រ សួងរៀបចំដែនដី បានដឹក នាំចុះពិនិត្យវឌ្ឍនភាពការងារសាងសង់អគាររដ្ឋ បាលសាលា ខេត្តព្រះសីហនុថ្មី ដោយបានធ្វើការណែនាំដល់ក្រុមហ៊ុនមហានគរ ត្រូវពន្លឿនការងារ សាងសង់ស្របតាមបទដ្ឋានបច្ចេកទេសទៅតាមផែនការ និងសាងសង់តាមរចនាបទខ្មែរ ទន្ទឹមនោះក៏បានដឹកនាំកិច្ចប្រជុំកែសម្រួលនូវចំណុ ចខ្វះខាតមួយចំនួនទៅតាម លក្ខណបច្ចេកទេស ដើម្បីធានាគុណភាពប្រើប្រាស់បានយូ ។ 

អគាររដ្ឋបាលសាលាខេត្តព្រះសីហនុ គឺជាអគារមួយដែលមានទំហំធំ ទំនើបស្របតាមលក្ខណៈ នៃការរីកចម្រើនរបស់ ប្រទេសជាតិ និងសាងសង់តាមរចនាបទខ្មែរ ដែលមានចំណត​រថយន្ត និងម៉ូតូនៅផ្នែកខាងក្រោមអគារ ធ្វើឱ្យការចតយានយន្តគ្រប់ប្រភេទប្រកប ដោយលក្ខណបច្ចេកទេស និងមានសោភណភាព ហើយក៏ជាកន្លែងធ្វើការប្រកបដោយផាសុខភាព និងមានសាលប្រជុំធំទូលាយថែមទៀតផង ដើម្បីឆ្លើយតបទៅនឹងការជឿជាក់របស់រាជរដ្ឋាភិបាល ដែល បានកំណត់ខេត្តព្រះ សីហនុ ជាប៉ូលសេដ្ឋកិច្ច ជាតំបន់សេដ្ឋកិច្ចពិសេសគំរូពហនុបំណង ដែលមាន ផ្លូវគមនាគមន៍តភ្ជាប់ទៅកាន់បណ្តារាជធានី ខេត្តក្នុងប្រទេសកម្ពុជា​ និងជាការតភ្ជាប់ផ្លូវសមុទ្រទឹកជ្រៅរបស់កម្ពុជា ក៏ដូចជាការតភ្ជាប់ផ្លូវអាកាសទៅកាន់ពិភពលោកបានទៀតផង៕

ដោយ៖ ងូ សុមុនី